Zabbuli 24 - Baibuli Ekibono kya Katonda 2014

Musengwa Katonda ni Kyabazinga Omukologho

¹ Ensi ya Musengwa Katonda n'ebigiriku byonabyona; n'Abantu boonaboona abali ku nsi ba Musengwa Katonda;

² kuba n'eyagikola, yaagizimba ku nhandha eri ghansi ghaayo, era yaakuba emisingi gyayo ghansi gh'entobo y'enhandha.

³ Naani oyo aikirizibwa okuniina ku lusozi lwa Musengwa Katonda? Era naani aikirizibwa okwingira mu isinzizo lye eitukuvu?

⁴ N'oyo ow'omwoyo omunaabuufu era akola ebituufu; oyo atasinza bitali Katonda, oba okulayirira obwereere.

⁵ Musengwa Katonda aja kumugha enkabi; Katonda omulokozi we taja kumubonamu kibi kyonakyona.

⁶ Abantu abali ng'oti n'oyo n'abanoonia Katonda, era ni baidha mu maiso ga Katonda wa Yakobo.

⁷ Mwigulegho endhigi bukalamu, mughaluzeeyo endhigi enkaire edh'eira, Kyabazinga omukologho aingire.

⁸ Naani oyo Kyabazinga omukologho? Ni Musengwa Katonda, ow'amaani agataloodheka era Aghanga Ebintu Byonabyona Musengwa Katonda oyo aghangula mu buli lutalo.

⁹ Mwigulegho endhigi bukalamu mughaluzeeyo endhigi enkaire edh'eira, Kyabazinga omukologho aingire.

¹⁰ Naani oyo Kyabazinga omukologho? Musengwa Katonda Afuga Amagye ni Kyabazinga omukologho.