Zabbuli 22 - Baibuli Ekibono kya Katonda 2014

Okulira era n'okusaaka Katonda

¹ Katonda wange, Katonda wange, lwaki ondekuliire agho? Lwaki oba ghala otyo n'otanhamba, n'okuwologoma kwange ni kutakutuukaku naire?

² Wo Katonda wange, ndira omusana gwonagwona, aye waaloba kundhiramu; naalira n'obwire aye naaloba kufuna kuwoleeraku naire.

³ Ate nga niiwe Omutukuvu, asaakibwa Isiraeli yoonayoona.

⁴ Niiwe badhaadha baife ye baataamu obwesige, baakwesiga era waabawonia.

⁵ Baakulirira era waabalokola; baakwesiga era waabawonia okuswala.

⁶ Aye nze ndi ng'oti lugereegere tikaali muntu, ndi nseko dha balamu era abantu ye banhooma.

⁷ Boonaboona bambona ng'omudoofu, bankongoola, baatengeesa n'emitwe nga bakoba bati:

⁸ “Yeesiga Musengwa Katonda, lwaki buti tamuwonia? Oba nga Musengwa Katonda amugonza lwaki tamuyamba?”

⁹ Ate nga niiwe owantoola mu nda ya maama, ni bwe nali ku mabeere nga nhonka ng'onkuuma.

¹⁰ Mu kuva mu nda nateebwa mu ngalo dho, era kasookanga maama anzaala niiwe Katonda wange.

¹¹ Otamba ghala, ebizibu bineezungulwire, ate ghazira wa kuunhamba.

¹² Abazigu kamaala baneezungulwire ng'oti gate galume; oti ni gale geene agafulagani agava ku itale ku Bashani.

¹³ Baasaamiriiza eminwa, bali ng'oti mpologoma eyeeruga ng'ate bw'ewologoma.

¹⁴ Zeenazeena mpoiremu ndi kiwooboloolo, buli igumba liviire ku buyungiro bwalyo, omwoyo gunseeneine.

¹⁵ Amaani gankaze ng'oti n'olujo olukalanga, olulimi lwaneesibira ku kibuno naasigala agho mu nkungu ng'omufu.

¹⁶ Ekikuukuulu eky'abakozi ab'ebibi kineezungulwire, bali ng'oti gabwa geene. Banfumiite engalo n'ebigere.

¹⁷ Amagumba gange goonagoona geegeze, abazigu baaningaku baaneerolera.

¹⁸ Bagabana ebivaalo byange nga bakuba akalulu, babone buli muntu ky'atwala.

¹⁹ Aye Musengwa Katonda, otamba ghala! Niiwe omuyambi wange, yangughaku ombeere.

²⁰ Mponia empiima, otoole obulamu bwange mu maino g'embwa edho.

²¹ Mponia okuliibwa empologoma edho omponie okufulibwa n'amayiga g'embogo edho.

²² Ndidha kukoberanga abantu bange by'onkoleire; ndidha kukusaakanga nga ndi mu bantu abeesoloiza okukusinza.

²³ Musaake Musengwa Katonda imwe mwenamwena abamutya. Mumughe ekitiisa imwe mwenamwena baidhukulu ba Yakobo! Mumutye imwe mwenamwena Abaisiraeli,

²⁴ kuba taloba kufaayo oba okutuumya amaiso oyo adaaga; bwenebwene tamulekulira agho, aye amuwulirisa buli lw'amulirira.

²⁵ Nga ndi mu bantu kamaala abeesoloiza, ndikusaaka olw'ebyo by'okola. Ndighaayo kye neeyama, nga ndi mu maiso g'abo abakutya.

²⁶ Abaavu balirya baiguta; abo abanoonia Musengwa Katonda balimusaaka! Mbendeza mubenga bwera ebyanda n'ebyanda!

²⁷ Okuva ku ndhuyi dhoonadhoona edh'ensi amaghanga galiidhukira Musengwa Katonda. Galikyuka gaira y'ali; ebika byonabyona birimusinza;

²⁸ kuba obufuzi bwonabwona bwa Musengwa Katonda, era oyo n'afuga amaghanga.

²⁹ Bwenebwene abo boonaboona ab'oku nsi abeekudumbaza, n'abo boonaboona abantu obuntu abafa, balyeyala mu maiso ge nga kw'otaire na kiisi muntu atasobola kwekuuma mwene nga mulamu.

³⁰ Ense edh'abaliiragho dhirimugheereza, abantu balighayira oluse olwidha ku Musengwa Katonda,

³¹ era balikobera abo abaja okuzaalibwa, nga Musengwa Katonda bw'awonia abantu be.