Zabbuli 21 - Baibuli Ekibono kya Katonda 2014

Okusaaka Musengwa Katonda olw'obughanguzi

¹ Wo Musengwa Katonda, olw'amaani go kyabazinga asangaire; era olw'obuyambi bwo asagambira ghaigulu.

² Omughaire byonabyona by'ayenda, era waamugha kye yasaba.

³ Wamuleetera enkabi edhitaloodheka, era waamuvaaza engule eya zaabu omukenenule.

⁴ Yakusaba obulamu waabumugha, waamugha obughangaazi obw'ebyanda n'ebyanda.

⁵ Ekitiisa kye kikologho olw'obuyambi bwo; wamugha okumanhikana einho n'okufuga.

⁶ Bwenebwene omugha enkabi ebyanda n'ebyanda era musangaavu inho olw'okuba oli naye.

⁷ Kyabazinga yeesiga Musengwa Katonda, era olw'okuba oyo Ali Ghaigulu Yeene amugonza inho, ghazira kimutengeesa naire.

⁸ Aligema abazigu be n'omukono gwe; omukono gwe omusaadha guligema abo abamukyagha boonaboona.

⁹ Bw'aliboneka alibookya n'omuliro ng'ogw'oluyiira. Musengwa Katonda alibasaaniagho mu kiruyi kye; balikeenha n'omuliro.

¹⁰ Kyabazinga alizikiriza abaana baibwe okubamala ku nsi, era taja kulekera okutuusa nga boonaboona abamazeegho.

¹¹ Waire bategeka okumukola akabi oba okuyiiya ngeri y'okumutegamu, entegeka dhaibwe tidhirituukirira;

¹² kuba bw'alibalingirizaamu akalaso ke, balikyuka baalumuka bulumuke.

¹³ Wo Musengwa Katonda, ogulumizibwenga buliidho olw'amaani go. Ife tunaayembanga era twakusaakanga olw'obukumu bwo.