Zabbuli 20 - Baibuli Ekibono kya Katonda 2014

Okusabira kyabazinga ng'aja okulwana olutalo

¹ Musengwa Katonda awulire okusaba kwo mu bizibu byo, iwe kyabazinga. Katonda oyo owa Yakobo akuwonie abazigu.

² Akugheereze obuyambi okuva mu isinzizo lye eitukuvu, era akughe obughagizi okuva ku lusozi lwe Sioni.

³ Asiime ebigheebwayo by'omugha byonabyona, era asangaalire emisengo gyo gyonagyona egyokebwa.

⁴ Akughe byonabyona omwoyo gwo bye gwegomba, era akubeere okutuukiriza byonabyona by'otegeike.

⁵ Olwo tukube emizira ng'oghangwire, era tube mu bikuudhuko olw'obughanguzi obwo, nga tusaaka Musengwa Katonda. Musengwa Katonda akughe by'osaba byonabyona.

⁶ Buti ntegeire nga Musengwa Katonda aleetera kyabazinga we ye yasiiga omuzigo okughangula; awulira okusaba kwe ng'ali mu igulu lye eitukuvu, yaamugha obughanguzi obutaloodheka, ng'akozesa omukono gwe omusaadha ogw'amaani.

⁷ Abalwani abandi beesigulira ku bigaali eby'omu lutalo, ate abandi ku mbalaasi, aye ife twesigulira ku maani ga Musengwa Katonda waife.

⁸ Abo balitondoka baagwa ere, aye ife tulisituka twayemerera nga tuli bagumu.

⁹ Wo Musengwa Katonda, gha kyabazinga obughanguzi, tukweghembye wulira okusaba kwaife.