Zabbuli 2 - Baibuli Ekibono kya Katonda 2014

Kyabazinga Omulonde wa Katonda

¹ Lwaki amaghanga geesigulana okudheema, n'abantu ni beeteesa ebiziramu?

² Bakyabazinga ab'oku nsi baafungiza, n'abafuzi baibwe beeteesa, badheemere Musengwa Katonda ni kyabazinga ye yasiiga omuzigo.

³ Nga bakoba bati: “Ka twekutule ku ndhegere dhaibwe, era ka twetoole ebikoligo byaibwe mu nkoto!”

⁴ Musengwa Katonda ali ku kityamo kye eky'obwakyabazinga mu igulu, abasekerera era anhooma entegeka dhaibwe edh'ekidoofu.

⁵ Agho nga yeenayeena adhuunie abadhuuka, mu busungu obutiisa einho yaabakoba

⁶ ati: “Kyabazinga wange ye nalonda, namuta ku lusozi lwange olutukuvu Sioni.”

⁷ Agho kyabazinga yaakoba ati: “Ka mbakobere Musengwa Katonda kye yankoba. Yankoba ati, ‘Iwe oli mwana wange, olwaleero nkuzaire.

⁸ Bw'onsaba eky'okufuga amaghanga goonagoona ndidha kukikugha, era nkughe ensi yoonayoona ebe yiyo.

⁹ Amaghanga ago oligamenhamenha n'omwigo ogw'ekyuma, era waagamaniangula ng'oti ntamu ya muwumbi.’ ”

¹⁰ Agho ni imwe bakyabazinga muwulire okulabulwa kuno, era imwe abafuzi ab'oku nsi mwege.

¹¹ Mugheereze Musengwa Katonda nga mumutya,

¹² mumukubire amakiryaivu nga mutengera, tiikulwa nga asungughala, mwazikirira; kuba asungughala mangu. Ba nkabi abo boonaboona Musengwa Katonda b'akuuma.