Zabbuli 19 - Baibuli Ekibono kya Katonda 2014

Ebitonde bya Katonda n'amateekage bimugheesa ekitiisa

¹ Eigulu lyoleka ekitiisa kya Katonda, waikendi yaatukobera oyo Katonda bye yakola n'engalo dhe.

² Buli lunaku lukobera lwinaalwo ekintu ekyo, era buli bwire bwakimanhisaaku ku bwinaabwo obubwiririra.

³ Tibyogera, tibikozesa kibono kyonakyona, oba amamiro gaabyo okuwulirwa,

⁴ aye ate amamiro gaabyo gabitabita mu nsi yoonayoona, era kye bikoba kyatuukira irala ensi y'ekoma. Mu ebyo byene Katonda mwe yazimbira endhuba edhu yaayo.

⁵ Endhuba evaayo ng'oti n'omusaadha eyaakabayiza, era ng'oti n'omulumusi ow'amaani ali kwesunga okulumuka mu ntaka.

⁶ Esituka ku luuyi olundi olw'eigulu, yaasenvula olugendo lwayo okulutuusa ku luuyi lundi. Ghazira kintu kisobola kwegisa ku kwokya kwayo.

Amateeka ga Musengwa Katonda

⁷ Musengwa Katonda yataagho amateeka ge na bwegendereza; gaiza obulamu mu mwoyo oguziriike. Kiisi Musengwa Katonda ky'akoba kyesigika, kifuula azira magezi okuba omugezi.

⁸ Ebiragiro bya Musengwa Katonda bituufu, bisangaaza abo ababigondera; amateeka ga Musengwa Katonda matukuvu, gazibula amaiso.

⁹ Okutya Musengwa Katonda kulungi; era kuligho ebyanda n'ebyanda. Okusala omusango okwa Musengwa Katonda tikubaamu kwekubira; era kuba kutuufu buliidho.

¹⁰ Okusala omusango okwa Musengwa Katonda kwegombebwa okusinga zaabu, waire zaabu ole omukenenule; kudhuudhuula okusinga omudheenene, waire gule ogutoonha obutoonhe okuva mu bisasala.

¹¹ Ate era mu kusala omusango okwa iwe Musengwa Katonda, ole akugondera mw'alabulirwa, n'ole akwekuuma mw'afunira empeera enene.

¹² Naani asobola okubona ensobi dhe mwene? Wo Musengwa Katonda, nsonigha ebisobyo bye ngwamu nga tiidhi.

¹³ Era nkuuma ndobe kugwa mu bisobyo nga ngendereire, otabiganha kunfuga. Olwo ndidha kuba omutukuvu era aziraku musango gwa kibi.

¹⁴ Nkusaba osiime bye ndhogera era osiime n'ebidhuubo ebindi ku mwoyo. Wo Musengwa Katonda, niiwe olubaale mwe neegisa, era niiwe omulwanirizi wange!