Zabbuli 18 - Baibuli Ekibono kya Katonda 2014

Olwembo lwa Daudi olw'obughanguzi

¹ Wo Musengwa Katonda, nkugonza inho. Niiwe omukuumi wange.

² Musengwa Katonda n'olubaale mwe neegisa, era n'ekifo kyange eky'okwewogomamu, oyo n'antoola aghabi. Musengwa oyo ni Katonda wange, era n'engabo mwe neewoma; n'omulwanirizi wange amponia byonabyona.

³ Ndirira Musengwa Katonda okumbeera, era yaidha yamponia abazigu bange Agwaniire okusaakibwanga.

⁴ Olumbe lwali lunsibye emigugha, omuzigu ng'ayenda kunsaaniagho ng'oti mataba.

⁵ Emigugha egy'e magombe gyaneezungulula, era okufa kwantega olutuula.

⁶ Bwenali ndi mu buzibu nasaba Musengwa Katonda, naalirira Katonda wange ambeere; yawulira amamiro gange ng'ali mu isinzizo, era okulira kwange kwamutuuka mu kutu.

⁷ Olwo ensi yaayuuga yeesunda, emisingi egy'ensozi gyatengeeta era gyadhugumira; kuba agho Musengwa Katonda yali asungughaire.

⁸ Omwosi gwamuva mu nhindo, ate enimi edh'omuliro n'amanda agaaka, byamuva mu kanwa.

⁹ Yaigulagho eigulu yaika ku nsi, nga ghansi gh'ebigere bye ghaligho ekire ekiirugavu bezigizigi.

¹⁰ Yaika ng'ali ku kitonde ekiri n'amaghagha ekyetebwa kerubi, era nga kiri kuguluka naye, yaaziinhuukira mu mpewo.

¹¹ Yeeghemberera enzikiiza, era yeegisa mu bire eby'amaadhi agazigwire.

¹² Mu bimyanso ebyali agho, mwavaamu omugozi n'amanda agaliku enimi edh'omuliro, byaghaguza byabita mu bire eby'amaadhi agazigwire.

¹³ Musengwa Katonda yaatyabuka oti lukuba mu igulu, oyo Ali Ghaigulu Yeene yaayogera n'amamiro ge, nga gali ng'oti n'omugozi era ng'oti n'omuliro ogw'amanda.

¹⁴ Yaalasa obulaso bwe yaasansaania abazigu be; yaamyansa olukuba yaababingagho.

¹⁵ Iwe Musengwa Katonda bwe wabakaabukira n'empiriito ey'omuuka ogw'omu nhindo yo n'ewulirwa, emisingi egy'ensi gyayerulwa, n'entobo y'enhandha yaaboneka.

¹⁶ Okuva ghaigulu eyo yagolola omukono gwe yangema, yaanhinhulula mu maadhi agenda okuumira.

¹⁷ Yamponia abazigu bange ab'amaani n'abo abankyagha; kuba baali ba maani inho okunsinga.

¹⁸ Baanumba ku lunaku lwe nali mu buzibu obutaloodheka, aye Musengwa Katonda yambeera.

¹⁹ Yantuusa mu kifo ekigazi yaabamponia, kuba nali nga nkola by'ayenda.

²⁰ Yansasula ng'ajiira ku butuufu bwange; yampa enkabi dhe kuba nziraku musango.

²¹ Nze njiira ku biragiro bya Musengwa Katonda, era tigwangaku mu kibi kya kudaaliima kuva ku Katonda wange.

²² Ebiragiro bye byonabyona mbigema butiribiri, era mu mateeka ge ghazira lye ngayaalirira.

²³ Mu maiso ge nzira musango, era neekuuma ndobe kugwa mu kibi.

²⁴ Musengwa Katonda kyava n'ansasula ng'ajiira ku butuufu bwange, era ng'ajiira ku ky'okuba nti nzira musango mu maiso ge.

²⁵ Wo Musengwa Katonda, oli mwesigwa eri abo abeesigwa y'oli; oli mulungi eri abo abalungi abaziraku musango.

²⁶ Oli mutukuvu eri abo ab'emyoyo emitukuvu, aye olabukira mangu abo abakozi b'ebibi.

²⁷ Olokola abo abagonvu aye waisa ghansi abo abeetwala nga ba ghaigulu.

²⁸ Wo Musengwa Katonda, onkunaanikiiza eitaala waamingaku enzikiiza.

²⁹ Ku lulwo nsobola okughangula eigye eiramba, era naaghalampa ebisenge mwe beegisa.

³⁰ Katonda ono kiisi ky'akola kiba kituufu; kiisi ky'asuubiza akituukiriza, era yaaba ngabo y'abo abamweyuna okubawonia.

³¹ Ghazira Katonda wundi okutoolaku Musengwa Katonda; ghazira lubaale lundi lwa kwewogomamu okutoolaku Katonda waife oyo.

³² Katonda oyo n'ampa amaani era yantoolera mu ngira ebizibu,

³³ yangumya ebigere ku itaka ng'oti bya mpongo, era yangumiza irala eyo ghaigulu mu nsozi.

³⁴ Andhegeresa okulwana entalo, naasobola okukozesa akalaso kale keene ak'ekyuma eky'ekikomo.

³⁵ Iwe Musengwa Katonda onkuuma era wandokola. Amaani ag'omukono gwo omusaadha gambeera mu bye nkola, era olw'okumbeera kwo ndi mukologho.

³⁶ Ogha ebigere byange okwetaaya nga ghazira angemaku, byaloba kutyerera ni ngwa.

³⁷ Nabingirira abazigu bange naabatuukaku era tyakyusa kwira okutuusa nga mmaze okubamulungula.

³⁸ Nabafumitafumita baaba nga tibasobola kusituka, baagwa ku itaka naabaniinaniinaku.

³⁹ Niiwe owampa amaani ag'okulwana olutalo olwo, abo abaanumba waabasuula ku itaka naabaniinaniinaku.

⁴⁰ Waleetera abazigu bange okukyuka baalumuka, naababona bwa nkoone, naazikiriza abantu abo abankyagha.

⁴¹ Baalira nga benda okubabeera aye ghaabula abawonia; baalirira Musengwa Katonda aye yaaloba kubavugira.

⁴² Nabasekula, naabasa ng'oti nkungu etwalibwa empewo, naabatyankirira ng'oti bityanka eby'omu nguudo.

⁴³ Wamponia abantu abadheemu, wanfuula omufuzi ow'amaghanga kamaala, abantu be nali tiidhi waabafuula bagheereza bange.

⁴⁴ Olwampuliraku bati, baatoolera okugondera ebiragiro byange, abamaghanga agandi baidha ye ndi nga baavula bwavule.

⁴⁵ Emyoyo nga gyabawaamu ira, era baavaayo mu bufo bwaibwe obugumu obw'okwegisaamu nga badhugumira.

⁴⁶ Musengwa Katonda mulamu! Oyo n'olubaale mwe neewogoma, agwaine asaakibwenga; Katonda oyo n'obulokozi bwange, agulumizibwenga!

⁴⁷ Katonda oyo anwaniragho n'abazigu bange, yampangulira amaghanga n'agafuga,

⁴⁸ yamponia abazigu bange. Bwenebwene ombeedie, abo abaanumbagana baasigala ghansi; omponiiza abo abakola eby'obukambwe.

⁴⁹ Kale ni ndidha kukusaakanga mu maghanga goonagoona, era ndidha kwembanga nga nsaaka eriina lyo.

⁵⁰ Katonda agha kyabazinga y'agonza obughanguzi, oyo ye yalonda amwoleka nga bw'amugonza einho, era oyo nga ni Daudi ni baidhukulu be ebyanda n'ebyanda.