Zabbuli 17 - Baibuli Ekibono kya Katonda 2014

Okusaba okw'omutuufu eyeezungulwirwa abazigu

¹ Wo Musengwa Katonda, wulira okulira kwange nga nkusaba oyoleke obutuufu bwo. Ntegera kutu owulirise okusaba kwange okuziramu kuguya.

² Lingirira ensonga mu butuufu bwayo, oyoleke nga bwenzira musango.

³ Oidhi omwoyo gwange, oidha waagukyalira obwire, waaneekebeedha wankenenula, aye ghaabula ekibi ky'ondhagaanamu. Tyogera bya buguya

⁴ ng'oti n'abandi bwebakola. Ngondera by'olagira era neeghala okukola ebikolwa eby'obukambwe.

⁵ Buliidho ntambulira mu ngira ye wandholeka, aghazira kugivaamu na kudaaliima.

⁶ Wo Katonda wange, nkusaba kuba iwe ondhiramu. Tega kutu owulire bye nkoba.

⁷ Yoleka okugonza kwo mu nsambo eyeewuninkiriza, iwe awonia abo abalumuka abazigu baibwe, ni baidha okwewogoma gh'oli gha mukono gwo omusaadha.

⁸ Nkuuma ng'oti mboni ya liiso lyo; mpambaatira ng'oti n'enkoko bw'ekola obwana bwayo.

⁹ Omponie abakozi b'ebibi abenda okunzikiriza, abazigu abo era abaisi abanzingiiza.

¹⁰ Abantu abo bazira kusaasira mu myoyo gyaibwe naire, era mu kanwa baidhwire kwesaakiriza.

¹¹ Baanondoola era buti banzingiiza; baaningiriire butatemya basobole okunsuula ghansi.

¹² Bali ng'oti mpologoma nto eyeeteeze, eyenda okundhuzayuza.

¹³ Wo Musengwa Katonda, idha olwane n'abazigu bange obaghangule! Kozesa empiima yo omponie, nve mu ngalo dh'abakozi b'ebibi.

¹⁴ Wo Musengwa Katonda, kozesa omukono gwo omponie abantu abazira mugabo ghandi, okutoolaku mu bulamu obw'oku nsi. Baiguse okudaagadaaga kwe wabaterekera, ghasigale naghooku okundi okumala okwigusa n'abaana baibwe n'okubasina, ate balekereghooku n'abaidhukulu.

¹⁵ Aye nze ndidha kulingiriranga amaiso go, kuba nziraku musango. Buli lwe nnaazuukanga ndidha kubanga musangaavu okukubona nga bw'oli.