Zabbuli 16 - Baibuli Ekibono kya Katonda 2014

Nsaba Katonda omwesigwa

¹ Wo Katonda wange, nkweghembye nkuuma, niiwe ye neesiga.

² Nze nkoba Musengwa Katonda nti: “Niiwe Musengwa Katonda wange, nzira kikalamu kyonakyona okutoolaku iwe.”

³ Abatuukirivu abali mu nsi balungi inho ebitaloodheka, era mbeesiimisa.

⁴ Abo abagwidhubanira emisambwa, beereetaku beene ebizibu kamaala. Nze tija kubeeyimbaku nga baghaayo emisengo gyaibwe, era tija kusinza misambwa gyaibwe.

⁵ Musengwa Katonda n'ekirungi kyonka kye ndi nakyo, oyo n'ekikopo ekyantegekerwa okunhwa, era obulamu bwange buli mu ngalo dhe.

⁶ Ongabainia ebirungi kamaala, era bwenebwene omugabo gwange gwidhwire bikalamu byereere.

⁷ Nsaaka Musengwa Katonda kuba angalagira, era ni mu bwire ghagati omwoyo gunkobera.

⁸ Buli kaakyeire ndidhi nga Musengwa Katonda andi kumpi era ghazira kisobola kuntengeesa, kuba andi ghano gheene gha mukono gwange omusaadha.

⁹ Kyenva ni nsangaala era ni nsagamba, zeenazeena ni mba mu miraala;

¹⁰ kuba tiwandekulira agho ni bantwala magombe, oba okuleka omwiru wo akutya okuja mu bafu.

¹¹ Ondholeka engira entuusa mu bulamu; gh'oli n'aghali okusangaala okwidhuvu, mu mukono gwo omusaadha n'omuva okusagamba.