Zabbuli 149 - Baibuli Ekibono kya Katonda 2014

Ebintu byonabyona bisaake Musengwa Katonda

¹ Mwenamwena musaake Musengwa Katonda! Mwembere Musengwa Katonda olwembo oluyaaka; mumusaake nga muli mu bantu be abeesoloiza okumusinza.

² Abaisiraeli ka basangaale olw'oyo Eyabatonda; abantu ab'omu Sioni basagambe olwa Kyabazinga waibwe oyo.

³ Basaake eriina lye nga bakina, nga bakubiraku entongooli n'engoma.

⁴ Musengwa Katonda asangaalira abantu be; abo abawombeefu yaabatuusa ku kitiisa eky'obughanguzi.

⁵ Abantu be ka basagambe inho olw'obughanguzi, era bembe olw'eisanhu nga bali mu buliri bwaibwe.

⁶ Basaake Katonda nga baleekaanira ghaigulu, bageme n'empiima nga buli ndala eri n'obwogi ku ndhuyi dhaayo dhombi,

⁷ bakole omulimo ogw'okwesasuuliza ku maghanga agandi, n'okubonereza abantu abatatya Katonda.

⁸ Basibe bakyabazinga abamaghanga ago n'endhegere, n'abakungu baago babasibe n'empingu,

⁹ babonereze amaghanga ago nga Katonda bwe yalagira. Kino n'ekitiisa eky'obughanguzi obw'abantu ba Katonda. Mwenamwena musaake Musengwa Katonda!