Zabbuli 147 - Baibuli Ekibono kya Katonda 2014

Okusaaka Katonda Aghanga Ebintu Byonabyona

¹ Mwenamwena musaake Musengwa Katonda! Nga kirungi okwemba enhembo edhisaaka Katonda waife! Olw'ekisa kye agwaine okwemberwa enhembo edhimusaaka.

² Musengwa Katonda ali kuzimba Yerusalemu buyaaka; ali kwiza Abaisiraeli abaali abanhage.

³ Abo abawoiremu amaani abaizaamu amaani, yaasiba ebighero ku mabwa gaibwe.

⁴ Oyo n'eyasalagho muunienie bwe dhibe dhaage obungi, era dhoonadhoona yaadhigha amaina gaadho.

⁵ Musengwa Katonda waife mukologho era wa buyinza, ali n'amagezi agatawaayo.

⁶ Musengwa Katonda asitusa abo abaniinirirwa, aye abakozi ab'ebibi yaabasuula ku itaka.

⁷ Mwembere Musengwa Katonda nga mumusiima; mutabulemu n'entongooli nga mwembera Katonda waife.

⁸ Aghemba ku igulu ebire, yaasindika amaadhi agagwa ku nsi era yaameza eisubi ku nsozi.

⁹ Agha ensolo emere yaadho, era atyo bw'akola n'amakoova amato, bwegaba gali kulira endhala.

¹⁰ Eisanhu lye tiriri mu kuba na mbalaasi dha maani, waire okuba n'abalwani ab'amaani,

¹¹ aye asangaalira abo bamutya, abo abasuubirira mu kugonza kwe okutakoma.

¹² Imwe ab'omu Yerusalemu, musaake Musengwa Katonda! Imwe ab'omu Sioni Musaake Katonda waimwe!

¹³ Agumya emiryango gyaimwe, era yaagha enkabi abantu baimwe.

¹⁴ Akuuma ensalosalo edh'ekiketezo kyaimwe nga dhirimu emiraala, era yaabagha emere enkalamu yeene nga ya mwero.

¹⁵ Agha ensi ebiragiro, era ky'alagiire bakigondera mangu.

¹⁶ Asindika omugozi gwaghemba ku itaka nga gutukula inho, ate yaafuumuula olufu ng'oti nkungu.

¹⁷ Amansa omugozi ng'oti bubaale; ghazira asobola kugumira kiinhogogo ky'asindika.

¹⁸ Agho yaalagira omugozi gwasaanuuka era yaatuma empewo, amaadhi gaakuuluula.

¹⁹ Akobera Yakobo obukwenda bwe, yaakobera Isiraeli ebiragiro bye n'amateeka ge.

²⁰ Ekyo takikolerangaku nsi yindi yoonayoona, era tibaidhi by'alagira. Mwenamwena musaake Musengwa Katonda!