Zabbuli 145 - Baibuli Ekibono kya Katonda 2014

Olwembo olusaaka Musengwa Katonda

¹ Wo Katonda wange era Kyabazinga wange, ndidha kukusaakanga olw'obukulu bwo, era nkusiimenga ebyanda n'ebyanda.

² Buli kaakyeire ndidha kukusiimanga era nkusaakenga ebyanda n'ebyanda.

³ Musengwa Katonda mukologho, era ni yenka agwaine okusinzibwa; ghazira muntu ategeera bukalamu bukologho bwe.

⁴ Buli luse lwa bantu lwidhanga kukobera olulwiraku ebyewuunhisa bye wakola, lwogerenga ku bikolwa byo eby'amaani.

⁵ Baidha kughayanga ku kitiisa kyo n'obwakyabazinga bwo, ninze zeena neefumintirizenga ku bikolwa byo ebyewuninkiriza.

⁶ Abantu baidha kughayanga ku bye wakola eby'amaani, ninze zeena nkoberenga abantu nga bw'oli omukologho.

⁷ Baidha kulomboodhanga nga bw'oli omulungi einho, bembenga inho ku butuufu bwo.

⁸ Musengwa Katonda wa kivunika era asaasira, alwagho okusungughala era agonza inho abantu obutalekera.

⁹ Musengwa Katonda mulungi eri abantu boonaboona, alumirwa kiisi kye yakola.

¹⁰ Wo Musengwa Katonda, ebitonde byo byonabyona biidha kukusaakanga, n'abantu bo boonaboona abakutya baidha kukusiimanga.

¹¹ Baidha kughayanga ku kitiisa eky'obwakyabazinga bwo, bakoberenga abantu nga bw'oli ow'obukumu,

¹² olwo abantu bamanhe ebikolwa byo eby'amaani n'obulungi obw'ekitiisa eky'obwakyabazinga bwo.

¹³ Obwakyabazinga bwo bwa byanda na byanda, era oja kufuga abantu ense n'ense. Musengwa Katonda mwesigwa mu by'akoba byonabyona era asaasira mu by'akola.

¹⁴ Musengwa Katonda atoola abo abali mu buzibu, ate abawoiremu eisuubi yaabaizaamu amaani.

¹⁵ Ebitonde byonabyona biringirira ku iwe, okubigha emere yaabyo mu kiseera ekituufu.

¹⁶ Obigha byonabyona byafuna, ghaabulagho ekisigala nga kikaayenda.

¹⁷ Musengwa Katonda akola byonabyona mu butuufu era wa kivunika mu by'akola.

¹⁸ Abo abasaba Musengwa Katonda, Musengwa Katonda oyo tabasuulirira, abo ababa nga bamusabye n'omwoyo omulala.

¹⁹ Abo boonaboona abamutya awulira okulira kwaibwe yaabawonia, era yaabagha bye benda.

²⁰ Musengwa Katonda akuuma obulamu bw'abo abamugonza, aye abakozi b'ebibi boonaboona aidha kubazikiriza.

²¹ Nze ndidha kusaakanga Musengwa Katonda, na buli kitonde kisaakenga eriina lye eitukuvu ebyanda n'ebyanda.