Zabbuli 144 - Baibuli Ekibono kya Katonda 2014

Okusaba kwa kyabazinga

¹ Musengwa Katonda asaakibwe, oyo ankuuma n'andhegeresa okulwana entalo.

² Oyo n'ankuuma, era ow'amaani anwanirira n'andokola. Oyo n'amponia ng'oti ngabo mu lutalo, era oyo n'obulumukiro bwange. Oyo n'aghangula amaghanga, yaagampa naagafuga.

³ Wo Musengwa Katonda, omuntu katyo ni ki iwe okumufaaku; omwana ow'omuntu ni ki iwe okumudhuuba?

⁴ Omuntu ali ng'oti muuka buuka gwa mu nhindo; enaku edh'obulamu bwe dhiri ng'oti kinsense ekibita obubite.

⁵ Wo Musengwa Katonda, igulagho eigulu oike ku nsi; gema ku nsozi dhinioke omwosi.

⁶ Myansa olukuba obasansaanie; olase obulaso bwo obabinge.

⁷ Golola omukono gwo okuva ghaigulu eyo, onhinhulule mu maadhi agenda okuumira omponie; ontoole ku bamaghanga agandi abankiriga

⁸ era abaguya buli kiseera, ni bwe baba nga beerayiriire obutaguya.

⁹ Wo Katonda wange, ndidha kukwembera olwembo oluyaaka, nkubireku n'entongooli ey'enkosi eikumi,

¹⁰ iwe ogha bakyabazinga obughanguzi, n'owonia omugheereza wo Daudi.

¹¹ Mponia abazigu bange abakambwe, ontoole ku bamaghanga agandi abankiriga era abaguya buli kiseera, ni bwe baba nga beerayiriire obutaguya.

¹² Batabane baife nga bali kwisuka bagwananga baaba oti bisimbe ebikula n'amaani ni baghala baife baaba ng'oti n'empango endholige, edhigemerera endhu ya kyabazinga mu nsonda.

¹³ Ebyagi byaife bigwananga byaidhula emere eya buli nsambo, n'entaama dhaife dhaazaalagana mitwalo na mitwalo,

¹⁴ n'ente dhaife dhaazaalagana aghazira kusondhola oba okufiisa. N'ebibuga byaife byona bigwananga byaloba kulumbibwa bazigu, enguudo dhaamu dhaabulamu enduulu n'okulira.

¹⁵ Beesiimye abo abali mu mbeera ng'oti n'eyo. Beesiimye abali ni Musengwa Katonda nga ni Katonda waibwe!