Zabbuli 143 - Baibuli Ekibono kya Katonda 2014

Okusaba obuyambi

¹ Wo Musengwa Katonda, wulirisa okusaba kwange. Nga bw'oli omutuufu era omwesigwa, wulira okukweghemba kwange, onkolere kye ndi kukusaba.

² Nze omugheereza wo otandhiza mu bya kwewozaaku, kuba ezira muntu mulamu azira musango mu maiso go.

³ Abazigu bange baamingirira bantuukaku, bankuba bantentena era banta mu nzikiiza bansibira omwo, naaba ng'oti ni bale abaafa eira.

⁴ Kale amaani gampoiremu naaweeramu irala eisuubi.

⁵ Ndidhukira ebiseera ebyabita, neefumintiriza ku ebyo byonabyona bye wakola, era neetegereza ebyo byonabyona by'ojiire ng'oleetagho.

⁶ Nze nsitulira y'oli emikono gyange naakusaba. Ng'eitaka eikalu bwe lyetaaga einho amaadhi, zeena ntyo bwe nhenda einho okuba gh'oli.

⁷ Wo Musengwa Katonda, yangughaku ombeere! Mpoiremu eisuubi. Otaneegisaaku, ndobe kuba ng'oti n'abali e magombe.

⁸ Nkusaba buli nkyo ondholekenga nga bw'ongonza obutalekera, kuba niiwe ye neesiga. Ngalagira bwe mbe neebise, kuba niiwe ye nsaba.

⁹ Wo Musengwa Katonda, numukiire y'oli onkuume, omponie abazigu bange.

¹⁰ Ndhegeresa okukolanga nga bw'oyenda, kuba niiwe Katonda wange! Olw'omwoyo gwo omulungi mbisa mu ngira entuufu.

¹¹ Wo Musengwa Katonda, nkuuma mbe mulamu nga bwe wasuubiza. Olw'obutuufu bwo ntoola mu buzibu.

¹² Era olw'okungonza einho obutalekera, zikiriza abazigu bange boonaboona, osaaniegho abo boonaboona abankyagha; kuba nze nkugondera.