Zabbuli 141 - Baibuli Ekibono kya Katonda 2014

Okusaba okukuumibwa

¹ Wo Musengwa Katonda, ndi kukulirira yangughaku ombeere, era ompulirisenga nga nkwese.

² Ganha okusaba kwange kukutuukeku ng'oti n'akawoowo ak'obubbaani, n'emikono gyange gye nsituliire y'oli gibe ng'oti n'omusengo ogw'eigulo.

³ Wo Musengwa Katonda, omunwa gwange guteeku kuufulu, n'ensaya dhange odhiwumbeku.

⁴ Otanganha kwendanga kukola bibi, n'okumala ebiseera byange nga ndi kutwalirizibwa mu kukola ebibi ghalala n'abo abakozi b'ebibi. Era otanganha kweyimbanga mu bibinuko byaibwe.

⁵ Omuntu omukalamu amala gambonereza oba yandhuuka olw'okungemerwa ekisa, okusinga okuganha ekitiibwa ekimpeebwa abantu ababi, kuba tirekerangaku kusaba nga nvumirira ebikolwa byaibwe ebibi.

⁶ Lwe baligheebwayo y'abo abalibasalira omusango okubasinga, olwo lwe balimanha nga Musengwa Katonda ky'akobye kiba kituufu.

⁷ N'amagumba gaibwe galisuulibwa agho ku munwa ogw'amagombe, ng'oti n'olubaale, lwe bamenhiemenhie, ni baluleka agho ku itaka.

⁸ Aye nze amaiso gange gali ku iwe Musengwa Katonda wange. Niiwe ye neesiga, otandekulira agho mu batemo.

⁹ Nkuuma ndobe kugwa ku mutego gwe banteze, era omponie ndobe kugwa mu lutuula olw'abakozi b'ebibi abo.

¹⁰ Abakozi b'ebibi bagwananga baagwa mu ntuula dhaibwe dheene, aye nze naawona.