Zabbuli 140 - Baibuli Ekibono kya Katonda 2014

Okusaba okughangula abazigu

¹ Wo Musengwa Katonda, ntoola mu buyinza bw'abakozi b'ebibi; omponie abantu bano abakambwe,

² abayiiya okukola ebibi, ni basiikuula entalo ekiseera kyonakyona.

³ Enimi dhaibwe dhiita ng'oti misota; n'eminwa gyaibwe giri ng'oti girimu busagwa bwa kiyiri.

⁴ Wo Musengwa Katonda, nkuuma ababi balobe kungemaku; omponie abantu abo abakambwe abali kweteesa okunsuula.

⁵ Abantu bano abeekuluntaza banteze omutego; bantega n'olutuula n'emigugha, ni mu ngira ye mbitamu baasimamu ebiina okuntega.

⁶ Nze nkoba Musengwa Katonda nti: “Niiwe Katonda wange.” Wo Musengwa Katonda, wulira bye ndi kukusaba, onhambe.

⁷ Wo Musengwa Katonda, niiwe Musengwa Katonda wange ow'amaani anwanirira era n'ankuuma mu lutalo.

⁸ Wo Musengwa Katonda, otaganha babi abo kye benda kituukirire; entegeka dhaibwe edh'okuunumya ka dhife dhityo.

⁹ Waire baneezungulwire, otabaganha kumpangula; ebibi bye bandhogeraku byonabyona ka bibairirengaku.

¹⁰ Omuliro ogw'amanda ka gubamagalikeku gubasiriize, basuulibwe mu biina eyo ye batasobola kuva.

¹¹ Abo abaghaama banaibwe ka babule ekibajiira obukalamu ku nsi kuno; obuzibu obw'okulalakulala bwidhire abakola eby'obukambwe bubazikirize.

¹² Wo Musengwa Katonda, ndidhi nti olwanirira abadaazibwadaazibwa, waalwanirira n'abaavu balobe kunhigirizibwa.

¹³ Bwenebwene abatuufu baidha kukusaakanga; abo abagondera ebiragiro byo baidha kubanga gh'oli.