Zabbuli 14 - Baibuli Ekibono kya Katonda 2014

Musengwa Katonda ye neesiga

¹ Abasiru bakoba mu myoyo gyaibwe bati: “Katonda azirayo.” Baidhwire obukupya, bakola ebyenhinhasa era boonaboona bakola bikyamu byereere.

² Musengwa Katonda aba mu igulu yaalingirira ghansi, okubona oba nga eriyo omuntu alimu amagezi, asinza Katonda.

³ Aye boonaboona baaghaba, boonaboona baidhwire bukupya. Ghazira akola kituufu, ghazira naire omulala ati.

⁴ Aye abakozi b'ebibi bano boonaboona, abalya abantu bange ng'oti balya mere, kiki kyene kye bataidhi, ekibalobera okusinza Musengwa Katonda?

⁵ Aye ni, baidha kuba mu kutya okw'amaani, kuba abatuufu Katonda b'afaaku.

⁶ Abakozi b'ebibi balemya omwavu okutuukiriza entegeka dhe, ate nga Musengwa Katonda n'amukuuma.

⁷ Katonda agwananga yaaleetagho alizaawula Isiraeli ng'ava mu Sioni! Musengwa Katonda bw'aliiriza abantu be obukombe, aba Yakobo balisagamba, aba Isiraeli baasangaala!