Zabbuli 139 - Baibuli Ekibono kya Katonda 2014

Katonda aidhi buli kintu era afaayo

¹ Wo Musengwa Katonda, waneekalirisa era wantegeera.

² Oidhi bye nkola byonabyona; otegeera bye ndowooza waire ng'oli ghala.

³ Ombona nga ndi kutambula oba nga ndi kulambaala; ghazira kye nkola ky'otaidhi.

⁴ Ni bwe kuba okwogera mba nkaali, nga wamanhie ira kye nja okukoba.

⁵ Oneezungulwire ng'oti kikomera, wankuuma n'amaani go.

⁶ Okuntegeera kwo okwaga agho kuneewuninkiriza, era kuswikiriire amagezi gange.

⁷ Katyo gha ye nsobola okuja ni nkuvaaku? Era nsobola kulumukira gha y'otali?

⁸ Bwe niina mu igulu oliyo, ni bwe nambaala mu nsi ey'abafu yoona oliyo.

⁹ Bwenguluka ni nja eyo e buvandhuba, oba ni nsenga eyo eghala einho mu bugwandhuba,

¹⁰ yoonayoona oliyo okundaga engira n'okumbeera.

¹¹ Bwenkoba nti ka neegise mu nzikiiza, oba nti omusana oguli ghe ndi gufuuke bwire,

¹² n'enzikiiza yeene teba nzikiiza ku iwe, era obwire bwaka ng'oti musana, kuba enzikiiza eba ng'oti butangaavu ku iwe.

¹³ Niiwe wankola, na buli kitundu kyange eky'omubiri; niiwe wayungayunga ebitundu byange nga ndi mu nda ya maama.

¹⁴ Nkusaaka kuba weewuunhisa era otiibwa. By'okola byonabyona byewuninkiriza. Ekyo nkiidhi bukalamu.

¹⁵ Wamanha bukalamu ng'amagumba gange gakolwa, gaayungwayungwa n'obwegendereza mu ngiso mu nda ya maama.

¹⁶ Amaiso go gaabona ebitundu byange nga bikaali na kukolebwa. Enaku edh'obulamu bwange dhaaghandiikibwa mu kitabo kyo nga dhikaali na kutoolera.

¹⁷ Wo Katonda wange, ng'ebidhuubo byo bya mughendo inho ye ndi! Bw'obisoloza nga biba kamaala!

¹⁸ Bwengezaaku okubibala bisinga omusenho obungi. Bwenzuuka era mba nkaali n'iwe.

¹⁹ Wo Katonda wange, nguli oita ababi, n'obaamingaku abatemo abo!

²⁰ Abantu abo bakwogeraku bubi, baakutakania nga bakola ebibi.

²¹ Wo Musengwa Katonda, nze nkyagha abo abakukyagha, naawulira enaku nga mbona abantu abakudheemera.

²² Mbakyaghira irala, era mbatwala ng'abazigu bange beene.

²³ Wo Katonda wange, neekalirisa otegeere omwoyo gwange, era ondebe omanhe ebidhuubo byange.

²⁴ Bona oba nga mu nze mulimu ekintu ekibi kyonakyona, era ontuuse mu ngira ey'ebyanda n'ebyanda.