Zabbuli 135 - Baibuli Ekibono kya Katonda 2014

Musaake Musengwa Katonda

¹ Mwenamwena musaake Musengwa Katonda! Imwe mwenamwena abagheereza ba Musengwa Katonda, mumusaake.

² Musaake Musengwa Katonda imwe ababa mu ndhu ye mu luya olw'endhu ya Katonda waife.

³ Musaake Musengwa Katonda kuba mulungi inho! Era mwembe enhembo edhisaaka eriina lye, kuba wa kivunika.

⁴ Musengwa Katonda yeerondera aba Yakobo, abantu ba Isiraeli, yaabafuula ababe ku bubwe.

⁵ Nze ndidhi nga Musengwa Katonda mukologho, era nga n'asinga bakatonda boonaboona ab'amaghanga agandi.

⁶ Musengwa Katonda ky'ayenda ky'akola, ka mube mu igulu oba ku nsi, ka mube mu nhandha oba ku ntobo y'enhandha.

⁷ Oyo n'asitusa ebire okuva ensi y'ekoma n'asindika olukuba mu maadhi agali kugwa, era n'atoolayo empewo ng'oti n'omuntu bw'atoolayo ebintu bye mu byagi.

⁸ Oyo n'eyaita abaana boonaboona ababeri ab'Abamisiri, n'ensolo dhoonadhoona edh'Abamisiri edhaazaalibwa mu luzaalo olusooka.

⁹ Oyo n'eyakolera mu Misiri ebyewuunhio n'ebyewuninkiriza, okubonereza kyabazinga wa Misiri n'abantu be.

¹⁰ Oyo n'eyazikiriza amaghanga kamaala, era n'eyaita bakyabazinga ab'amaani bano:

¹¹ Sihoni kyabazinga w'Abamori, ni Ogi kyabazinga wa Bashani, ni bakyabazinga boonaboona ab'e Kanaani.

¹² Eitaka lyaibwe yaaligha abantu be Abaisiraeli, ng'omugabo gwaibwe.

¹³ Wo Musengwa Katonda, eriina lisigalagho ebyanda n'ebyanda; abantu ab'ense n'ense baidha kukumanhanga.

¹⁴ Musengwa Katonda aidha kulwaniriranga abantu be; aidha kugemerwanga abagheereza be ekivunika.

¹⁵ Ebintu abamaghanga agandi bye basinza, bya feeza na zaabu, abantu bye bakola n'engalo dhaibwe.

¹⁶ Bibaaku eminwa aye nga tibyogera, byabaaku amaiso aye nga tibibona.

¹⁷ Bibaaku n'amatu aye nga tibiwulira era tibisobola waire na kugheera.

¹⁸ Abo ababikola ghalala n'abo ababyesiga, bagwananga boona baaba ng'oti ni byene bwe biri.

¹⁹ Imwe Abaisiraeli, musaake Musengwa Katonda; imwe bakabona abagheereza Katonda, musaake Musengwa Katonda!

²⁰ Imwe Abalevi abagheereza mu ndhu ya Katonda, musaake Musengwa Katonda! Imwe mwenamwena abatya Musengwa Katonda, mumusaake!

²¹ Musengwa Katonda asaakibwe mu Sioni, oyo aba mu Yerusalemu. Mwenamwena musaake Musengwa Katonda!