Zabbuli 132 - Baibuli Ekibono kya Katonda 2014

Ekisuubizo eri Daudi

¹ Wo Musengwa Katonda, oteerabira mugheereza wo Daudi era oteerabira bukaluubirivu bwe yagumira.

² Wo Musengwa Katonda, idhukira ebyo Daudi oyo bye yasuubiza, ebyo bye yeeyama eri iwe Omukologho wa Yakobo.

³ Yakoba ati: “Tiidha kuja ka, waire okungira mu buliri bwange;

⁴ tija kuganha maiso gange kukomba ku ndoolo naire, waire okuganha ebigowe byange okuwongera,

⁵ okutuusa nga ntairegho ekifo Musengwa Katonda mw'aba, ekifo Omukologho wa Yakobo mw'asula.”

⁶ Bona, Esanduuku ey'Endagaano twagiwuliza ng'eri e Bethelehemu, twagibona ng'eri mu biketezo bya Yaari.

⁷ Agho twakoba tuti: “Ka tuje mu ndhu ya Musengwa Katonda, tuje tweyale gha bigere bye tumusinze.”

⁸ Wo Musengwa Katonda, situkiramu oje otyame mu kifo kyo obeemu n'Esanduuku yo ey'Endagaano eyoleka obukumu bwo.

⁹ Bakabona bo baghe okukolanga ebituufu buliidho; abo abakutya obaghe okukuba emizira olw'eisanhu.

¹⁰ Wo Musengwa Katonda, kola nga bwe wasuubiza omugheereza wo Daudi; otamusuula ere oyo kyabazinga ye walonda.

¹¹ Kuba wasuubiza era toja kukyusaamu oti: “Nditoola mulala ku baana bo, naamufuula kyabazinga, yaafuga nga iwe oviiregho.

¹² Ekyo kiribaagho kasita abaana bo abo bakuuma ndagaano, ni bagema n'ebiragiro byange bye mbalagira. Era boona, abaana abaibwe n'abaja okukusikiranga ku bwakyabazinga ebyanda n'ebyanda.”

¹³ Musengwa Katonda yeerondera Sioni, ng'agho gh'aidha okubanga.

¹⁴ Yaakoba ati: “Kino n'ekifo kyange ebyanda n'ebyanda; ghano ghe ndidha okubanga, kuba mwene ntyo bwe nhenze.

¹⁵ Ab'omu Sioni ndidha kubagha byonabyona bye beetaaga mu bungi, abaavu baamu boonaboona baidha kulyanga emere baigute.

¹⁶ Bakabona baamu ndidha kubagha enkabi mu bye bakola byonabyona, n'abantu baamu abatya Katonda mbaleetere okukuba emizira olw'eisanhu.

¹⁷ Omwo mwe nditoola kyabazinga, nga wa ku nda ya Daudi; omulonde wange oyo afugenga nga ninze mmukuuma.

¹⁸ Abazigu be nja kubaswaza, aye obwakyabazinga bwe buja kusigala nga bukaaligho.”