Zabbuli 129 - Baibuli Ekibono kya Katonda 2014

Okusaba okuwona abazigu

¹ “Okuva mu buto bwange abazigu bange babaire bandaazadaaza inho.” Abantu ba Isiraeli mukobe muti:

² “Okuva mu buto bwange abazigu bange babaire bandaazadaaza inho, aye baalemwa okumpangula.

³ Omugongo gundidhwire bigufulugufulu, ng'oti n'enimiro ye balimiisa embago y'ente.

⁴ Aye Musengwa Katonda oyo Omutuufu, yasala emigugha egy'ababi egyali ginsibye.”

⁵ Boonaboona abakyagha Sioni, bagwananga baabairirizaayo ekyeinhumainhuma baaswala.

⁶ Ka babe ng'oti n'eisubi erimera ku ngulu kw'endhu, aye erikala nga likaali na kukula,

⁷ omuntu ly'atasobola na kusibamu kinhwa, waire akafaaganda akaidhuza engalo.

⁸ Era bagwananga baabulwa omuntu abitagho ng'abakoba ati: “Enkabi dha Musengwa Katonda dhibe n'imwe.” Olwo boona ni bairamu bati: “Tubendeza enkabi mu liina lya Musengwa Katonda.”