Zabbuli 12 - Baibuli Ekibono kya Katonda 2014

Okusaba obuyambi

¹ Wo Musengwa Katonda, tubeere otuwonie, kuba tighakaaligho bantu bakaakutya iwe, waire okubaagho abakaakwesiga.

² Buli muntu aguya mwine, yaasuutiriza mwine ku munwa, aye nga mu mwoyo muguya.

³ Wo Musengwa Katonda, sirisa abo abasuutiriza banaibwe, n'abo abeesaaka ebiziramu

⁴ nga bakoba bati: “Ife mu kwogera mwe tufunira bye twenda. Ife ab'eminwa gyaife naani atukobaku?”

⁵ Aye Musengwa Katonda akoba ati: “Leka ndidhe, kuba abakozi b'ebibi badaazadaaza abaavu era baakiriga abaghafu. Ndidha kukuuma abaavu n'abaghafu abo, kuba ekyo kye beegomba.”

⁶ Ebisuubizo bya Musengwa Katonda byesigika ng'oti ni feeza alongooseibwa, ng'abisibwa mu muliro emikuzi omusanvu.

⁷ Wo Musengwa Katonda, tukuume era otughambaatire, otuwonie abantu ab'oluse luno.

⁸ Buli gh'olinga obona abakozi b'ebibi abatambula, era abantu bakibona ng'okukola ekibi kintu kya ghaigulu.