Zabbuli 119 - Baibuli Ekibono kya Katonda 2014

Okusaaka Amateeka ga Musengwa Katonda

¹ Ba nkabi abo abaziraku kye banenezebwa, abatambulira ku mateeka ga Musengwa Katonda.

² Ba nkabi abo abakola kiisi Musengwa Katonda ky'abakoba, ni bajiira ku by'abagalagira n'omwoyo gwonagwona

³ era abatakola bibi, ni bajiira ku by'ayenda.

⁴ Wo Musengwa Katonda, niiwe wataagho amateeka go era waalagira gakuumibwe butiribiri.

⁵ Ha, kale ngoli neekuuma ni ntasobya, ni nkuuma by'olagira!

⁶ Olwo tyandiswaziibwa, kuba omwoyo gwange gwonagwona gwandibaire ku biragiro byo byonka.

⁷ Ndidha kukusaakanga n'omwoyo omunaabuufu, nga mmaze okwega ensala yo entuufu.

⁸ Ndidha kugonderanga by'olagira; nkweghembye otandekulira agho ntyo.

Okugondera ebiragiro bya Musengwa Katonda

⁹ Omwisuka asobola atya okukuuma obulamu bwe nga butereevu? Kasita aba nga yeekuuma, n'ajiira ku kibono ky'okoba.

¹⁰ Nfuba inho okukugheereza n'omwoyo gwange gwonagwona, otandeka kuva ku biragiro byo.

¹¹ By'onkoba mbita ku mwoyo buliidho, ndobe kwonoona y'oli.

¹² Wo Musengwa Katonda, nkusaaka ndhegeresa okukola by'olagira.

¹³ Nze mwene ndidha kulomboodheranga abantu amateeka go.

¹⁴ Wo Musengwa Katonda, mba musangaavu okukola iwe by'onkoba, okusinga okuba omukombe einho.

¹⁵ Ndidha kwefumintirizanga ku mateeka go, era amaiso gange tigaavenga ku biragiro byo.

¹⁶ Ndidha kubanga musangaavu okukola iwe by'olagira, era tyerabirenga kibono ky'onkobye.

Okusangaala okuva mu kugondera Amateeka ga Musengwa Katonda

¹⁷ Wo Musengwa Katonda, ndhughaaku enkabi dho nze omugheereza wo, mbenga mulamu era ngonderenga ebiragiro byo.

¹⁸ Nzibula amaiso, nsobole okubona endhegeresa eyewuunhisa eri mu mateeka go.

¹⁹ Ku nsi kuno ndiku ng'omugeni omugenze; mpa okutegeera ebiragiro byo.

²⁰ Omwoyo gunsiriira olw'okwegomba einho okumanha buli kiseera ensala yo entuufu.

²¹ Ovumirira abo abeekuluntaza, abalaame abo, abava ku biragiro byo.

²² Balekeze okunvumanga n'okuunhoomereranga, kuba nze neekuumye nga nkola by'okoba.

²³ Waire abafuzi ab'obukumu batyama beeteesa okuunumba, nze omugheereza wo ndidha kwefumintirizanga ku ebyo by'olagira.

²⁴ Mba musangaavu okukola nga bw'onkoba, kuba by'onkoba n'ebimpa amagezi.

Obumalirivu mu kugondera Amateeka ga Musengwa Katonda

²⁵ Neegolomoire agho ku itaka gampweire. Wo Musengwa Katonda, ndhizaamu amaani buyaaka nga bwe wansuubiza.

²⁶ Bwe nakukobera byonabyona bye nakola, wandhiramu; ndhegeresa okukola by'olagira.

²⁷ Iwe nhamba okutegeera amateeka go bye gakoba, olwo ndidha kwefumintirizanga inho ku byewuunhisa by'okola.

²⁸ Nseeneine olw'enaku enhingi. Wo Musengwa Katonda, ndhizaamu amaani buyaaka nga bwe wansuubiza.

²⁹ Ntoolaamu emize emibi, olw'ekisa kyo ondhegerese amateeka go.

³⁰ Nsazeegho okuba omwesigwa y'oli, nga buli kaseera njiira ku nsala yo.

³¹ Wo Musengwa Katonda, neekalanguliire ku kukola by'okoba; mponia okuswala.

³² Ndidha kwangughangaku okukola ng'ebiragiro byo bwe binkoba, ng'ogaziiya okutegeera kwange.

Okusaba okugheebwa okutegeera Amateeka ga Musengwa Katonda

³³ Wo Musengwa Katonda, ndhegeresa okutegeera ebyo by'olagira, ndidha kubijiirangaku ekiseera kyonakyona.

³⁴ Ngalagira ntegeere amateeka go; ndidha kugagonderanga n'omwoyo mulala.

³⁵ Nhamba okwebisa ng'ebiragiro byo bwe bikoba, kuba mba musangaavu okukola nga bwe bikoba.

³⁶ Nhamba okwendanga okukola by'okoba, okusinga okwendanga eby'obufuni.

³⁷ Nkyusa nve ku bintu ebiziramu muganhulo; ombeere okwebisa nga bw'oyenda.

³⁸ Tuukiriza ekyo kye wansuubiza nze omugheereza wo, ekyo ky'osuubiza abo abakutya.

³⁹ Mponia okuvumibwa kwe ntya ekibitiriire; kuba ensala yo ntuufu yeeneyeene.

⁴⁰ Bona, neegomba inho amateeka go; mpa obulamu olw'obutuufu bwo.

Okwesiga Amateeka ga Musengwa Katonda

⁴¹ Wo Musengwa Katonda, ndaga nga bw'ongonza einho, ondokole nga bwe wansuubiza.

⁴² Olwo ndidha kwiramu abo abandheeyereza, kuba neesiga ekisuubizo kyo.

⁴³ Nhamba okwogeranga amazima buli kiseera, kuba eisuubi lyange liri mu nsala yo.

⁴⁴ Ndidha kujiiranga ku mateeka go buli kaseera ebyanda n'ebyanda.

⁴⁵ Era ndidha kutambulanga nga neetaaya, kuba nfuba inho okujiira ku mateeka go ago.

⁴⁶ By'okoba byonabyona ndidha kubikoberanga bakyabazinga, nga ghazira kingemya nsoni.

⁴⁷ Mba musangaavu okukola ebyo by'olagira, kuba ebyo bye nhenda einho.

⁴⁸ Ebiragiro byo mbyenda inho era mbigha ekitiisa; ndidha kwefumintirizanga ku ebyo by'olagira.

Obugumu obuva mu kujiira ku Mateeka ga Musengwa Katonda

⁴⁹ Wo Musengwa Katonda, oteerabira kibono kye wankoba nze omugheereza wo; kuba ekyo n'ekyandeetera okusuubira.

⁵⁰ Ni bwemba nga ndi mu buzibu, okusuubira okwo n'okumpa obulamu.

⁵¹ Abo abeekuluntaza baanhoomerera, aye tija kukyuka kuva ku mateeka go.

⁵² Wo Musengwa Katonda, bwendidhukira ensala yo ey'eira, nsigala nga ndi mugumu.

⁵³ Bwembona abakozi b'ebibi nga tibali kujiira ku mateeka go, obusungu bungema bungi.

⁵⁴ Ebiragiro byo n'ebimpa amaani, nga ndi ku nsi kuno ng'omugeni omugenze.

⁵⁵ Wo Musengwa Katonda, tyerabira liina lyo waire buba bwire, ebirowoozo byange biba ku mateeka go.

⁵⁶ Mba musangaavu okujiira ku biragiro byo.

Okweghaayo okugondera Amateeka ga Musengwa Katonda

⁵⁷ Wo Musengwa Katonda, niiwe ekirungi kyonka kye ndi nakyo; nkusuubiza okugemanga ebiragiro byo.

⁵⁸ Nkweghembye n'omwoyo gwange gwonagwona, ongemerwe ekivunika nga bwe wansuubiza.

⁵⁹ Neefumintiriiza ku mpisa dhange, era ndi kukusuubiza okujiiranga ku by'onkoba byonka.

⁶⁰ Nze nsitukiramu busitukire, naayangugha okukola ng'ebiragiro byo bwe binkoba.

⁶¹ Waire ababi bantega entuula dhaibwe, tija kwerabira mateeka go.

⁶² Mu bwire ghagati nsituka, naakusaaka olw'ensala yo entuufu eziramu kwekubira.

⁶³ Abo boonaboona abakutya n'ababa bakagwa bange, abo boonaboona abajiira ku mateeka go.

⁶⁴ Wo Musengwa Katonda, okugonza kwo eri abantu kungi tikukoma; ndhegeresa okukola by'olagira.

Amateeka ga Musengwa Katonda ga mughendo

⁶⁵ Wo Musengwa Katonda, ombisiiza bukalamu nze omugheereza wo, nga bwe wansuubiza.

⁶⁶ Nkusaba ompe okumanha n'okusalangagho ekituufu, kuba neesiga ebiragiro byo.

⁶⁷ Nali ndaaliimye okuva mu ngira entuufu, iwe wankangaivula, aye buti tiva ku kibono kyo.

⁶⁸ Oli mukalamu, ni by'okola bikalamu; nkweghemba ondhegerese okukola by'olagira.

⁶⁹ Abo abeekuluntaza bandhogeraku eby'obuguya, ate nga nze njiira ku mateeka go n'omwoyo gwange gwonagwona.

⁷⁰ Abantu abo baziramu kategeera naire, aye nze mba musangaavu okujiira ku mateeka go.

⁷¹ Okukangaivulwa kwange kwankola bukalamu, kuba kwandeetera okwega okukola by'olagira.

⁷² Amateeka ge watugha ga mughendo ye ndi okusinga emungo ya feeza ni zaabu.

Mu Mateeka ga Musengwa Katonda muzira kusaliriza

⁷³ Niiwe wampumba n'engalo dho wantaagho, nkusaba ompe okutegeera, memale ndhege ebiragiro byo kye binkoba.

⁷⁴ Abo abakutya bwe banambonanga baidha kusagambanga, kuba neesiga kye wasuubiza.

⁷⁵ Wo Musengwa Katonda, ndidhi ng'ensala yo ntuufu eziramu kwekubira, era ndidhi nga wankangaivula kuba oli mwesigwa mu by'osuubiza.

⁷⁶ Nkusaba ongumye ng'ongonza obutalekera, nga bwe wansuubiza nze omugheereza wo.

⁷⁷ Nsaasira ompe obulamu, kuba mba musangaavu okujiira ku mateeka go.

⁷⁸ Swaza abo abeekuluntaza, kuba baanumiriza bye ntakolangaku; aye nze ndidha kwefumintirizanga inho ku mateeka go.

⁷⁹ Abo abakutya baidhe ye ndi, baidha kumanha by'okoba.

⁸⁰ Nkusaba ombeere okugema ebiragiro byo n'omwoyo gwange gwonagwona, ndobe kuswala.

Okusaba okuwona abazigu

⁸¹ Omwoyo gunsiriira olw'okuteegerera einho iwe okwidha okundokola; aye neesiga kye wayogera.

⁸² Nkooye okukanula amaiso nga nteegerera kye wansuubiza, era mbuuza nti: “Oliidha li okumbeera?”

⁸³ Nze nafuuka ng'oti n'endyanga ey'oluwu etakaagasa; aye tyerabirangaku biragiro byo naire.

⁸⁴ Wo Musengwa Katonda, nze omugheereza wo ndiguminkiriza kutuuka li? Abankiriga oja kubasalira li omusango?

⁸⁵ Abantu abeekuluntaza abatagema mateeka go, baasima ebiina okuntega ngwemu.

⁸⁶ Abantu abo bankiriga nga bandhogeraku eby'obuguya; aye iwe ebiragiro byo byesigika lubeerera. Wo Musengwa Katonda, nhamba.

⁸⁷ Abantu abo baabulaku katono okundhita, aye tyakyuka kuva ku mateeka go.

⁸⁸ Olw'okungonza kwo okutakoma, kuuma obulamu bwange, olwo nkolenga by'onkoba.

Okwikiriza kuli mu Mateeka ga Musengwa Katonda

⁸⁹ Wo Musengwa Katonda, iwe ky'okoba kirigho era kya kubaagho mu igulu ebyanda n'ebyanda.

⁹⁰ Oli mwesigwa eri abantu mu nse dhoonadhoona; wataagho ensi era waagigumya mu kifo kyayo.

⁹¹ Olw'ekiragiro kyo ebintu byonabyona bikaaligho ni ye buli eno, kuba ebintu byonabyona bigheereza mulala iwe.

⁹² Nguli amateeka go ti n'agandeetera okuba omusangaavu, nandibaire nga nazikirira bwe nadaazibwadaazibwa.

⁹³ Tija kwerabira by'olagira, kuba mu ebyo mwe wampeera okuba omulamu.

⁹⁴ Ndi wuwo, mponia abazigu, kuba nfuba okujiira ku mateeka go.

⁹⁵ Abakozi b'ebibi baneeteeze benda kunzikiriza, aye nze neefumintiriza inho ku by'okoba.

⁹⁶ Nkizwire nga buli kintu kibaaku enkomerero; aye ebiragiro byo biziraku ghe bikoma.

Okugonza Amateeka ga Musengwa Katonda

⁹⁷ Wo Musengwa Katonda, nze nga ngonza inho amateeka go! Tirekera kugeefumintirizaaku olunaku lwonalwona.

⁹⁸ Ebiragiro byo binfuula okuba omugezi okusinga abazigu bange, kuba buli kaseera mbyefumintirizaaku.

⁹⁹ Ntegeera inho okusinga abandhegeresa, kuba omwoyo gwange guli ku by'okoba buli kaseera.

¹⁰⁰ Ntegeera inho okusinga n'abakaire, kuba buli kaseera nkola by'olagira.

¹⁰¹ Neesamba empisa embi dhoonadhoona, nsobole okukola by'onkoba.

¹⁰² Tirekerangaku kujiira ku by'olagira, kuba wandhegeresa.

¹⁰³ By'ondhegeresa bidhuudhuula, bwene byasinga n'omudheenene ogw'endhuki!

¹⁰⁴ Mu mateeka go nfunamu okutegeera, kyenva ni nkyagha empisa edh'obuguya dhoonadhoona.

Obutangaavu obuva mu Mateeka ga Musengwa Katonda

¹⁰⁵ Ekibono kyo n'eitaala eriimuliikirira ghe mbita, ni mbona engira.

¹⁰⁶ Neeyamye era tija kwerabira okujiiranga ku nsala yo entuufu eziramu kwekubira.

¹⁰⁷ Wo Musengwa Katonda, ndaazibwadaazibwa ebitaloodheka; nkweghembye mpa obulamu nga bwe wasuubiza.

¹⁰⁸ Wo Musengwa Katonda, siima okusaba kwange nga nkwebaza, ondhegerese okujiira ku nsala yo entuufu.

¹⁰⁹ Waire nga obulamu bwange buli mu kabi ka kufa buli kiseera, tija kwerabira mateeka go.

¹¹⁰ Abakozi b'ebibi bantega omutego, aye naaloba kudaaliima kuva ku biragiro byo.

¹¹¹ By'okoba mbitwala ng'omugabo ogwange ku bwange ebyanda n'ebyanda; bwenebwene mu ebyo n'omuva okusangaala okw'omwoyo gwange.

¹¹² Nsazeegho okukolanga ng'amateeka go bwe gakoba ekiseera kyonakyona.

Amateeka ga Musengwa Katonda gatukuuma bukalamu

¹¹³ Nkyagha abantu abayuugayuuga ni batagema mateeka na mwoyo mulala, aye nze ngonza inho amateeka go.

¹¹⁴ Niiwe onkuuma era n'onwanirira, nze nsuubirira mu bye wankoba.

¹¹⁵ Muve ghe ndi imwe abakozi b'ebibi, nze ngeme ebiragiro bya Katonda wange.

¹¹⁶ Ngemaaku ongumye mbe mulamu nga bwe wansuubiza; otandeka kuswala kubona nga bye nasuubira tibituukiriire.

¹¹⁷ Ngemerera ghabule ekibi ekintuukaku, ndidha kwegenderezanga ebyo by'olagira buli kaseera.

¹¹⁸ Iwe okyagha abo boonaboona abadaaliima ni bava ku biragiro byo, olugezigezi lwaibwe lwonalwona muzira makulu.

¹¹⁹ Abakozi b'ebibi boonaboona obabona nga baziramu makulu ng'oti bidomboodo, kyenva ni ngonza okukola ebyo by'okoba.

¹²⁰ Zeenazeena ndhugumira olw'okukutya; ensala yo ngitya inho.

Obuwulize eri Amateeka ga Musengwa Katonda

¹²¹ Nze nkola ebikalamu era ebituufu; otandekulira agho mu ngalo edh'abazigu bange.

¹²² Otandekulira bwagho aye mbeera nze omugheereza wo; otaganha abo abeekuluntaza kuunhigiriza.

¹²³ Nkooye okukanula amaiso nga nteegerera iwe okundokola, otuukirize ekyo kye wasuubiza.

¹²⁴ Ndaga nga bw'ongonza einho obutalekera nze omugheereza wo, ondhegerese okukolanga by'olagira.

¹²⁵ Nze ndi mugheereza wo, mpa okutegeera, nsobole okumanhanga by'olagira.

¹²⁶ Wo Musengwa Katonda, ekiseera kituuse obeeku ni ky'okola, kuba abantu bamenha amateeka go.

¹²⁷ Nze ngonza inho ebiragiro byo, mbigonza inho okusinga ni zaabu, zaabu ole mwene omukenenule.

¹²⁸ Kyenva neesibirira ku kujiira ku ebyo by'olagira; ni nkyagha empisa embi dhoonadhoona.

Obuwulize eri Amateeka ga Musengwa Katonda

¹²⁹ By'okoba bikalamu inho kyenva ni mbigondera n'omwoyo gwange gwonagwona.

¹³⁰ Omuntu bw'ainhonholwa ebibono byo afunamu obutangaavu n'ole azira magezi yaafunamu amagezi.

¹³¹ Ndhasaime omunwa ndi kulakalaka olw'amairu ge ndi nago, ag'okwenda okukola ebyo by'olagira.

¹³² Nningirira ongemerwe ekivunika, nga bw'okola abo abakugonza.

¹³³ Gumya ebigere byange ku itaka ndobe kugwa nga bwe wasuubiza; otaganha kibi kyonakyona kumpangula.

¹³⁴ Mponia okunhigirizibwa abantu, nsobole okugema amateeka go.

¹³⁵ Nningaaku n'amaiso ag'ekivunika nze omugheereza wo, ondhegerese okukola by'olagira.

¹³⁶ Amaziga gakuuluula okunva mu maiso ng'oti miiga, olw'okubona ng'abantu tibagema mateeka go.

Amateeka ga Musengwa Katonda tigeekubira

¹³⁷ Wo Musengwa Katonda, iwe watuukirira mu buli ngeri, n'ensala yo ntuufu.

¹³⁸ Bye wakoba byonabyona bituufu, byesigika ekiseera kyonakyona.

¹³⁹ Obusungu bungema inho naayenda na kwabika, olw'abazigu bange abatajiira ku by'okoba.

¹⁴⁰ Ebisuubizo byo byesigika, era nze omugheereza wo mbigonza inho!

¹⁴¹ Nze ndi ng'oti kanampuni abantu ke banhooma, aye era tisobola kwerabira mateeka go.

¹⁴² Oli mutuufu ebyanda n'ebyanda, n'amateeka go matuufu lubeerera.

¹⁴³ Ebizibu n'obweraliikirivu ndi na kamaala, aye okugema ebiragiro byo kunsangaaza.

¹⁴⁴ By'okoba byonabyona bituufu, biziramu kwekubira ebyanda n'ebyanda; mpa okubitegeeranga nsobole okuba omulamu.

Okusaba okutoolebwa mu ngalo dh'abazigu

¹⁴⁵ Wo Musengwa Katonda, nkweta n'omwoyo gwange gwonagwona nga nkweghemba; ndhiraamu, olwo ndidha kugonderanga by'olagira.

¹⁴⁶ Nkweghembye mponia abazigu, nsobole okukolanga by'okoba.

¹⁴⁷ Mu nkyonkyo mpuuna naakusaba okumbeera nga neesiga ekisuubizo kyo.

¹⁴⁸ Obwire bwonabwona titenduka, nga ndi kwefumintiriza ku bye walagira.

¹⁴⁹ Wo Musengwa Katonda, olw'okungonza kwo einho obutalekera, wulirisa bye nkusaba; okuume obulamu bwange iwe asala mu mazima.

¹⁵⁰ Abankiriga banseetaku nga benda okunkola akabi, abantu abo tibagema mateeka go.

¹⁵¹ Aye iwe Musengwa Katonda ondi kumpi, n'ebiragiro byo bituufu lubeerera.

¹⁵² Okuva eira nayega by'olagira; naamanha nga wabitaagho bibeegho ebyanda n'ebyanda.

Okusaba Musengwa Katonda akubeere

¹⁵³ Nkusaba obone bwendaazibwadaazibwa omponie, kuba nze tyerabira mateeka go.

¹⁵⁴ Mpolerezaayo omponie abazigu, mbe mulamu nga bwe wasuubiza.

¹⁵⁵ Abakozi b'ebibi tibaja kulokolebwa, kuba tibakola by'olagira.

¹⁵⁶ Aye iwe Musengwa Katonda, okusaasira kwo kungi inho; nkweghemba ompe obulamu kuba oli mutuufu.

¹⁵⁷ Abankiriga ndi na kamaala n'abazigu ndi na kyodo, aye tidaaliimangaku kuva ku by'olagira.

¹⁵⁸ Abantu abatakutya bangemya obusungu inho buli lwe mbabona, kuba tibagema biragiro byo.

¹⁵⁹ Bona nga bwe ngonza einho amateeka go onkuume nga ndi mulamu, kuba iwe ongonza inho obutalekera.

¹⁶⁰ Ekibono kyo n'amazima geene, n'ensala yo yoonayoona ntuufu eziramu kwekubira ebyanda n'ebyanda.

Okwegheerayo irala okugema Amateeka ga Musengwa Katonda

¹⁶¹ Abantu abali n'obuyinza bankiriga ng'ate bazira nsonga ntuufu, aye nze ntya inho ebiragiro byo.

¹⁶² Nsagamba inho olw'ebyo bye wasuubiza, naaba ng'oti n'ole agwire mu by'obukombe kamaala.

¹⁶³ Tyenda buguya era mbwenhinhala, aye ngonza inho amateeka go.

¹⁶⁴ Nkusaaka emikuzi musanvu olunaku, olw'ensala yo entuufu eziramu kwekubira.

¹⁶⁵ Abagonza amateeka go bawulira miraala myereere, ghazira kisobola kubasuula.

¹⁶⁶ Wo Musengwa Katonda, nsuubira nga niiwe oidha okundokola, era nkola ng'ebiragiro byo bwebikoba.

¹⁶⁷ Ngondera n'omwoyo gwange gwonagwona ebyo by'onkoba, era mbigonza ebitaloodheka.

¹⁶⁸ Ngema amateeka go ni by'onkoba byonabyona; kuba iwe ombona nga bwe neebisa.

Okusaba Musengwa Katonda akubeere

¹⁶⁹ Wo Musengwa Katonda, nkweghemba owulire kye nsaba, ompe okutegeera nga bwe wasuubiza.

¹⁷⁰ Ganha owulire okusaba kwange, ontoole mu ngalo dh'abazigu nga bwe wasuubiza.

¹⁷¹ Ndidha kukusaakanga buli kaakyeire, kuba niiwe ondhegeresa amateeka go.

¹⁷² Ndidha kwembanga bye walagira, kuba ebiragiro byo bituufu lubeerera.

¹⁷³ Banga mwetegefu okumbeera buliidho, kuba nasalagho okujiiranga ku mateeka go.

¹⁷⁴ Wo Musengwa Katonda, neegomba inho ondokole, era mba musangaavu okugema amateeka go.

¹⁷⁵ Mpa obulamu nsobole okukusaakanga, ng'ensala yo entuufu n'enkuuma.

¹⁷⁶ Nadaaliima ng'oti n'entaama eyabula, nkusaba onnoonie ye ndi kuba tyerabiranga biragiro byo.