Zabbuli 118 - Baibuli Ekibono kya Katonda 2014

Okwebaza Musengwa Katonda olw'obughanguzi

¹ Bakagwa, musiime Musengwa Katonda kuba mulungi, okugonza kwe tikukoma kubaagho byanda na byanda.

² Abaisiraeli ka bakobe bati: “Okugonza kwe tikukoma kubaagho byanda na byanda.”

³ Bakabona abagheereza Katonda ka bakobe bati: “Okugonza kwe tikukoma kubaagho byanda na byanda.”

⁴ Abo abatya Musengwa Katonda ka bakobe bati: “Okugonza kwe tikukoma kubaagho byanda na byanda.”

⁵ Bwenali ndi mu kweraliikirira nalirira Musengwa Katonda yampulira, yantoola mu buzibu.

⁶ Musengwa Katonda n'omubeezi wange, ghazira kye nsobola kutya. Omuntu obuntu katyo asobola kunkola ki?

⁷ Musengwa Katonda ali ku luuyi lwange okumbeera, ndidha kubona abazigu bange nga baghangwirwa.

⁸ Okwesiga Musengwa Katonda n'ekisingaku okwesiga abantu.

⁹ Okwesiga Musengwa Katonda n'ekisinga, okusinga okwesiga abafuzi.

¹⁰ Abazigu kamaala baali baneezungulwire, aye olw'amaani ga Musengwa Katonda, boonaboona naabamulungula!

¹¹ Baali nga baneezungulwire ku buli luuyi, aye olw'amaani ga Musengwa Katonda boonaboona naabamulungula!

¹² Baaneebungaku ng'oti muzinga gwa ndhuki, aye baazikira mangu ng'oti muliro gwa isandha, olw'amaani ga Musengwa Katonda boonaboona naabamulungula.

¹³ Nanhigirizibwa kumpi ngwe, aye Musengwa Katonda yambeera.

¹⁴ Musengwa Katonda n'omubeezi wange ampa amaani era n'eyandokola.

¹⁵ Wulira emizira egy'obughanguzi egiri kuva mu weema edh'abantu ba Katonda! Bali kwemba bati: “Omukono gwa Musengwa Katonda gukoze eby'amaani!

¹⁶ Omukono gwa Musengwa Katonda mughanguzi! Omukono gwa Musengwa Katonda gukoze eby'amaani!”

¹⁷ Tiri wa kufa, ndidha kuba mulamu, nomboodhe ebyo Musengwa Katonda bye yankolera.

¹⁸ Waire yankangaivula inho, tiyaleka lumbe kuntwala.

¹⁹ Mundhiguliregho emiryango egy'eisinzizo, egibitamu abantu ba Katonda abatuufu, nhingire nje neebaze Musengwa Katonda.

²⁰ Guno n'omulyango gwa Musengwa Katonda abantu ba Katonda abatuufu mwe banaingirira.

²¹ Wo Musengwa Katonda, nsiimye kuba onkoleire nga bwe nkusabye era wampa obughanguzi.

²² Eibaale abazimbi lye baaloba bati lizira mugaso, n'eryafuuka empagi ey'omusingi mu nsonda.

²³ Ekyo Musengwa Katonda n'eyakikola, era okukibona tukyewuunhia inho.

²⁴ Luno n'olunaku Musengwa Katonda lw'aghanguliireku, ka tusangaale era tusagambe.

²⁵ Wo Musengwa Katonda, tukweghembye tuwonie okuzikirira Wo Musengwa Katonda, tukweghembye tughe okughangula mu kiisi kye tukola.

²⁶ Katonda aghe enkabi oyo aingira mu liina lya Musengwa Katonda! Tubasabira Katonda abaghe enkabi mwenamwena, nga tuli ghano mu ndhu ya Musengwa Katonda.

²⁷ Musengwa Katonda ni Katonda, yatukolera ebirungi kamaala. Aleeni mutoolere ekibinuko nga mugemye ensaga, nga mukaadha okutuukira irala ku alutaari.

²⁸ Niiwe Katonda wange, era ndidha kukusiimanga iwe Katonda wange, ndidha kukoberanga abantu nga bw'oli omukologho.

²⁹ Bakagwa, musiime Musengwa Katonda kuba mulungi, okugonza kwe tikukoma kubaagho byanda na byanda.