Zabbuli 116 - Baibuli Ekibono kya Katonda 2014

Eyawona okufa asaaka Katonda

¹ Nze ngonza Musengwa Katonda olw'okuba awulira amamiro gange nga ndi kumweghemba.

² Era olw'okuba ampulirisa, ndidha kumuliriranga okutuusa lwe ndiva ku nsi.

³ Olumbe lwaneezungulula ng'oti lutuula lwa muyiizi; amagombe gaayasama okuumira, naidhula okutya n'okweraliikirira.

⁴ Olwo naalirira Musengwa Katonda nti: “Wo Musengwa Katonda, nkweghembye mponia okufa.”

⁵ Musengwa Katonda wa kivunika era mulungi. Katonda waife asaasira!

⁶ Musengwa Katonda akuuma abaghafu; bwe nali nga ndi mu buzibu n'eyamponia.

⁷ Olwo naalekera okweraliikirira, kuba Musengwa Katonda yankolera bukalamu.

⁸ Musengwa Katonda yamponia okufa, yandheya amaziga, era yamponia okughangulwa.

⁹ Era buti ntambula mu maiso ge nga ndi ku nsi ey'abalamu.

¹⁰ Nasigala nga nkaikiriza Musengwa Katonda, waire nga mule nakoba nti: “Yii, nga numizibwa inho.”

¹¹ Era nga ndi mu kutya naakoba nti: “Okwesiga omuntu kuba kumala biseera.”

¹² Musengwa Katonda ndimugha ki oyo ankoleire ebirungi ebyaga agho?

¹³ Ndidha kughaayo ekigheebwayo eky'omwenge ogw'emizabbibu, mmusiime olw'okundokola.

¹⁴ Era ndidha kutuukiriza ebyo bye neeyama eri Musengwa Katonda, nga ndi mu bantu be abeesoloiza okumusinza.

¹⁵ Musengwa Katonda atwala okufa okw'abantu be abamutya nga kwa mughendo inho.

¹⁶ Wo Musengwa Katonda, nze ndi mugheereza wo nga maama bwe yali. Niiwe omponiiza okufa!

¹⁷ Wo Musengwa Katonda, ndidha kukugheereza omusengo olw'okukusiima, era mpeereze n'okusaba kwange y'oli.

¹⁸ Era ndidha kutuukiriza ebyo bye neeyama y'oli, nga ndi mu bantu bo abeesoloiza okukusinza

¹⁹ ghano mu Yerusalemu, mu mpya edh'eisinzizo lyo. Mwenamwena musaake Musengwa Katonda!