Zabbuli 115 - Baibuli Ekibono kya Katonda 2014

Katonda mwenemwene ali mulala

¹ Aa Musengwa Katonda, ti niife abagwaniire okugheebwa ekitiisa, ti niife naire naire. Aye niiwe oteekwa okugheebwa ekitiisa, olw'okugonza kwo okutakoma n'obwesigwa bwo.

² Lwaki oleka amaghanga ni gabuuza gati: “Memale Katonda waibwe ali gha?”

³ Ife Katonda owaife ali mu igulu era ky'ayenda ky'akola.

⁴ Aye beene basinza ebitali Katonda ebya feeza ni zaabu, abantu beene bye bakola n'engalo dhaibwe.

⁵ Bibaaku eminwa aye nga tibyogera, byabaaku amaiso aye nga tibibona.

⁶ Biri n'amatu aye nga tibiwulira, byaba n'enhindo aye nga tibiwunhiza.

⁷ Biriku engalo aye nga tibisobola kugema ku kintu ni bikiwulira, byabaaku ebigere aye nga tibitambula, era ghazira iroboozi naire eriva mu mamiro gaabyo.

⁸ Abo ababikola bagwananga boona baaba ng'oti ni byene bwe biri, n'abo ababyesiga boona baabanga batyo.

⁹ Imwe Abaisiraeli mwesigenga Musengwa Katonda! Oyo n'ababeera era n'abakuuma.

¹⁰ Imwe bakabona abagheereza Katonda, mwesigenga Musengwa Katonda! Oyo n'ababeera era n'abakuuma.

¹¹ Mwenamwena abatya Katonda mwesigenga Musengwa Katonda! Oyo n'ababeera era n'abakuuma.

¹² Musengwa Katonda oyo tatwerabira naire, aidha kutughanga enkabi; aidha kughanga Abaisiraeli enkabi, aghenga bakabona abagheereza Katonda enkabi,

¹³ era aghenga n'abo boonaboona abamutya enkabi, abakologho n'abatali bakologho.

¹⁴ Nsaba Musengwa Katonda mwenamwena abaghe eizaire, imwe n'abaana baimwe.

¹⁵ Musengwa Katonda oyo eyakola eigulu n'ensi abaghenga enkabi.

¹⁶ Musengwa Katonda ni mwene igulu, aye ensi yagigha abantu.

¹⁷ Abafu tibasaaka Musengwa Katonda, n'abo abaja e magombe tibamusaaka naire.

¹⁸ Aye ife abakaali abalamu twidha kumusaakanga okuva ni mpegaano n'okutuusa ebyanda n'ebyanda. Mwenamwena musaake Musengwa Katonda.