Zabbuli 112 - Baibuli Ekibono kya Katonda 2014

Omuntu atya Musengwa Katonda aba n'enkabi

¹ Mwenamwena musaake Musengwa Katonda. Wa nkabi omuntu atya Musengwa Katonda, asangaalira okukola ng'ebiragiro bye bwebikoba.

² Abaana be n'abaidhukulu baba ba maani mu nsi; oluse oluva mu muntu oyo atya Katonda luba lwa nkabi.

³ Ab'omu maka ge baba bafuni nga bakombe, era wa kusiimibwanga Katonda ebyanda n'ebyanda.

⁴ Obutangaavu bwidha mu nzikiiza bwamuliikirira abo abatya Katonda, era bwayakira abo ab'ekivunika, abasaasizi era abatuufu.

⁵ Wa nkabi omuntu oyo omugabi era awola baine empiiya, n'akola buli kintu mu mazima.

⁶ Omuntu atya Katonda ghazira kisobola kumutengeesa; aidha kwidhukirwanga ebyanda n'ebyanda.

⁷ Amawulire amabi tigamutiisa, omwoyo gwe mugumu nga yeesiga Musengwa Katonda.

⁸ Omwoyo gwe tigukyukakyuka waire okutya; okutuusa lw'abona ng'abazigu be baghangwirwa.

⁹ Agabira abaavu na mwoyo mulala, era ekisa kye tikimuwaaku, aidha kusiimibwanga Katonda era agheebwenga ekitiibwa ebyanda n'ebyanda.

¹⁰ Omubi bw'abona ekyo asungughala, yeeguguna era yaaseenena, aye bye yeegomba okukola tabifuna.