Zabbuli 111 - Baibuli Ekibono kya Katonda 2014

Musengwa Katonda asaakibwenga

¹ Mwenamwena musaake Musengwa Katonda. Ndidha kusiimanga Musengwa Katonda n'omwoyo gwange gwonagwona, nga ndi mu bantu abeesoloiza okumusinza.

² Ebintu Musengwa Katonda by'akola bikologho ate bikulu, abo boonaboona ababyenda babyetegereza.

³ Ebyo by'akola biidhwire ekitiisa n'obufuzi, era mutuufu ebyanda n'ebyanda.

⁴ Musengwa Katonda by'akola byewuunhisa, tabiganha kwerabirwa; wa kivunika era musaasizi.

⁵ Abo abamutya abafunira eky'okulya, era tiyeerabira ndagaano ye.

⁶ Yayoleka abantu be nga bw'ali ow'obukumu mu by'akola, yaabafuula beene nsi, mu nsi edhitaali dhaibwe.

⁷ Mu byonabyona by'akola yesigika era wa mazima; ebiragiro bye biziramu buguya,

⁸ tibikyukamu naire ebyanda n'ebyanda, byakolebwa mu bwesigwa ni mu butuufu.

⁹ Yanunula abantu be, yaakola nabo endagaano etavaagho ebyanda n'ebyanda. Eriina lye itukuvu era litiibwa.

¹⁰ Mu kutya Musengwa Katonda n'omusookera amagezi; abo abagondera ebiragiro bye abagha okutegeera. Musengwa Katonda asaakibwenga ebyanda n'ebyanda.