Zabbuli 109 - Baibuli Ekibono kya Katonda 2014

Okusaba okw'omuntu ali n'abazigu

¹ Wo Katonda wange, niiwe ye nsaaka, otansiriikirira!

² Abakozi b'ebibi n'abaguya bandhogeraku nga bampaama bye ntakola.

³ Buli kiseera bandhogeraku eby'obukyayi, ate nga baanumbagana bya bwereere.

⁴ Bandhogeraku bibi byereere, waire nga nze mbagonza era naabasabira.

⁵ Kale bwe mbakolera ebikalamu bansasulamu bibi, bwe mbagonza bansasulamu kunkyagha!

⁶ Wo Katonda wange, omuzigu wange musimbe mu maiso ag'omulamuzi omubi asaliriza, era owundi ku bazigu be beene n'abe amulumirize.

⁷ Muwozese omusango gumusinge, n'okwewolereza kwe kufuukemu kibi.

⁸ Enaku edh'obulamu bwe dhigwananga dhaakendeera; omuntu owundi yaatwala ebintu bye

⁹ Abaana be bagwananga bafuuka bamulekwa, ni mukazi we yaaba namwandu.

¹⁰ Abaana be bagwananga baatambulatambula eyo batyo nga basabiriza, era baabingibwa mu bifulukwa mwe baba.

¹¹ Ole amubandha agwananga yaamugemaku ebibye byonabyona yaabitwala, n'abantu b'ataidhi baamukambulaku ebintu bye byonabyona bye yafuna mu maani ge.

¹² Agwananga yaabulwa omuntu amugemerwa ekivunika, waire asaasira abaana be bamulekwa.

¹³ Abaana be n'abaidhukulu bagwananga baawaagho, ghaabula ow'oluse olwidha amwidhukira naire.

¹⁴ Musengwa Katonda agwananga yaidhukira okwonoona kwa badhaadha be, yaalobera irala n'okusonigha ebibi bya inhina.

¹⁵ Musengwa Katonda agwananga yaidhukira ebibi byaibwe buli kaakyeire, ate beene, abantu baabeerabirira irala ku nsi.

¹⁶ Kuba omuntu oyo tiyaliimu kisa naire, aye yakiriga abanaku n'abaavu n'abawoiremu emyoyo, yaabatuusa ni ku kufa.

¹⁷ Yayendanga inho okukolimira abantu abandi, yeena ka bamukolimire. Era nga tayendeza muntu wundi nkabi, yeena ka ghabule amwendeza enkabi.

¹⁸ Okukolima abandi tikwamuvangaku ng'oti kivaalo, aye ebikolimo bye byene ka bimwirireku bimuboze omubiri ng'oti maadhi era bimungire bimutuuke ni mu magumba ng'oti muzigo.

¹⁹ Leka abivaale nga tibimuvaaku ng'oti kivaalo, era abyesibe mu nkende ng'oti lusibiro.

²⁰ Wo Musengwa Katonda, otyo bw'obe obonereze abazigu bange abo abandhogeraku obubi.

²¹ Aye iwe Musengwa Katonda wange, ba ku luuyi lwange ombeere nga bwewasuubiza, ondokole kuba okugonza kwo okutakoma kulungi.

²² Nze ndi mughafu era omwavu, ndi n'enaku nnene ku mwoyo.

²³ Ndi kuwaagho ng'oti n'ekinsense ekyeigulo ng'endhuba egwire, era baamansulira bw'ere ng'oti nzige.

²⁴ Ebivu biinafiighe olw'okusiiba endhala, n'omubiri gwange guniaire, guli magumba meereere.

²⁵ Abazigu bange bansekerera, baatengeesa n'emitwe nga bandhogeraku.

²⁶ Wo Musengwa Katonda wange, mbeera era ondokole kuba ongonza obutalekera.

²⁷ Wo Musengwa Katonda, abazigu bange ka bamanhe nga niiwe ondokola.

²⁸ Ka bankolimire aye nga iwe ompa bwa nkabi! Ni bwe baanumba, ka baswale aye nga nze omugheereza wo nsangaala busangaale.

²⁹ Abazigu bange bagwananga baanhoomebwa, baidhula ensoni edhitabavaaku ng'oti kivaalo.

³⁰ Ndidha kusiimanga inho Musengwa Katonda; mmusaakenga nga ndi mu bantu be abeesoloiza okumusinza,

³¹ kuba aba ku luuyi lw'omwavu, yaamuwonia abo abamusalira ogw'okufa.