Zabbuli 107 - Baibuli Ekibono kya Katonda 2014

Ekitabo ekyokutaanu Zab 107—150 Tusaake Musengwa Katonda ow'ekivunika ekitaloodheka

¹ Bakagwa, musiime Musengwa Katonda kuba mulungi; okugonza kwe okutakoma kubaagho byanda na byanda!

² Abo Musengwa Katonda be yanunula boona ka bakobe batyo; abo be yatoola mu buyinza bw'abazigu,

³ n'abaiza okuva mu nsi kamaala e buvandhuba n'e bugwandhuba, ni mu nsi edhiri ku luuyi olw'omukono omugooda ni ku lw'omukono omusaadha olw'e buvandhuba.

⁴ Abandi baatambulatambula eyo batyo mu irungu omuzira kantu, engira yaababula ebatuusa ghe basobola okuba.

⁵ Endhala yaabaluma n'endiwo yaabagema, beegomba okutyama bamale gafiira agho!

⁶ Agho baalirira Musengwa Katonda nga bali mu buzibu bwaibwe, Musengwa Katonda yaabawonia.

⁷ Yaabagemya engira entuufu eyabatuusa mu kibuga ghe baali basobola okuba.

⁸ Bagwainenga okwebaza Musengwa Katonda olw'okugonza kwe okutakoma, n'olw'ebyewuunhisa by'akolera abantu!

⁹ Oyo agha abali endiwo okunhwa nga bwe beetaaga, ate abayala yaabaigusa ebirungi.

¹⁰ Abandi baali nga baba mu nzikiiza etiisa einho, nga basibe ku ndhegere era nga badaazibwadaazibwa;

¹¹ kuba baali badheemeire ebiragiro bya Katonda, baanhooma ebyo Ali Ghaigulu Yeene bye yabakoba.

¹² Baali nga bawoiremu olw'emirimo emikalangufu, era ng'ole bw'agwa tighaba amubeera kumubbeedagho.

¹³ Agho baalirira Musengwa Katonda nga bali mu buzibu bwaibwe, Musengwa Katonda yaabawonia.

¹⁴ Yaabatoola mu nzikiiza etiisa einho, yaakutulakutula endhegere edhaali dhibasibye.

¹⁵ Bagwainenga okwebaza Musengwa Katonda olw'okugonza kwe okutakoma, n'olw'ebyewuunhisa by'akolera abantu!

¹⁶ Oyo n'amenhamenha endhigi edhaakolebwa mu kyuma eky'ekikomo, era n'amaniangula empango edhaakolebwa mu kyuma ekigumu einho!

¹⁷ Abandi baali basirusiru olw'ebibi byaibwe, okwonoona kwaibwe okwo nga kubadaazadaaza.

¹⁸ Ku mwoyo nga kwabasemba, nga ghazira mere ebawoomera. Kumpi bafe!

¹⁹ Agho baalirira Musengwa Katonda nga bali mu buzibu bwaibwe, Musengwa Katonda yaabawonia.

²⁰ Yaalagira bulagire baawona, yaabatoola mu maino ga walumbe.

²¹ Bagwainenga okwebaza Musengwa Katonda, olw'okugonza kwe okutakoma, n'olw'ebyewuunhisa by'akolera abantu!

²² Era bagwainenga bagheeyo emisengo olw'okumwebaza, bembenga n'enhembo edh'eisanhu edhoogera ku by'abakolera.

²³ Abandi baavuganga maato ku nhandha, baakoleranga emirimo gyaibwe ku maadhi,

²⁴ baabona ebyewuunhisa Musengwa Katonda by'akola mu maadhi omwo;

²⁵ kuba yalagira empewo ey'amaani, yaaleetera enhandha okwefuukuula einho.

²⁶ Empewo yaabbeedera amaato mu ibbanga, ate gaamala gaika ghansi ku ntobo y'enhandha, agho emyoyo gyabagwa mu bigere.

²⁷ Amaato gaabayuuzayuuza, baagaaliita ng'oti batamiivu. Waire nga baali bagavugiire entangama, ku olwo baaba ng'oti beega.

²⁸ Agho baalirira Musengwa Katonda nga bali mu buzibu bwaibwe, Musengwa Katonda yaabawonia.

²⁹ Yaalekeza empewo ey'amaani, n'okwefuukuula okw'enhandha.

³⁰ Agho baasangaala olw'enhandha okulaala, Musengwa Katonda yaabatuusa bukalamu ku kisomoko kye baayenda.

³¹ Bagwainenga okwebaza Musengwa Katonda olw'okugonza kwe okutakoma, n'olw'ebyewuunhisa by'akolera abantu!

³² Bagwaine bamugulumizenga ng'abantu beesoloiza okumusinza, era bamusaakenga mu lwekobaano olw'abakulu ab'ebika.

³³ Musengwa Katonda oyo afuula aghabaire emiiga ghairagho eirungu, ate aghabaire enhindo edh'emiiga ghaafuuka eitaka eikalu lyene.

³⁴ Eribaire eitaka eigimu alifuula ery'oluunhu erizira muganhulo, olw'obubi bw'abo abalityamaku.

³⁵ Afuula aghabaire eirungu ghairagho ebidiba eby'amaadhi, ate aghabaire eitaka eikalu, ghaafuukagho enhindo edhivaamu emiiga.

³⁶ Era yaaganha abayala baasenga mu bifo ebyo, baatuuka n'okuzimbamu ebibuga byaibwe,

³⁷ baasiga enimiro edha buli nsambo, baasimba n'amasamba ag'emizabbibu, era baafuna amakungula mangi inho.

³⁸ Abagha enkabi baazaala abaana kamaala, n'ebyayo byaibwe byaloba kukendeera naire.

³⁹ Abazigu baibwe bwebabaghangula era ni babaniinirira nga babatuntuza era nga babadaazadaaza,

⁴⁰ Katonda aleetera abazigu abo okunhoomebwa, baaja nga batambulatambula eyo batyo mu irungu omuzira waire akagira.

⁴¹ Aye abanaku abairuukirira, yaabatoola mu kudaagadaaga, baazaalagana, baaghera mangu ng'oti byayo.

⁴² Bino abatuufu babibona baasangaala, aye abakozi b'ebibi baabula eky'okwogera.

⁴³ Buli ali n'amagezi agwaine ebyo okubitangaku omwoyo, era abantu bagwaine okulowoozanga einho ku kugonza kwa Musengwa Katonda okutakoma.