Zabbuli 106 - Baibuli Ekibono kya Katonda 2014

Katonda agonza abantu be ni bwe badaaliima

¹ Mwenamwena musaake Musengwa Katonda! Musiime Musengwa Katonda kuba mulungi; okugonza kwe tikukoma, kubaagho byanda na byanda.

² Naani asobola okulomboodha n'amalayo eby'amaani Musengwa Katonda by'akola? Naani asobola okumusaaka nga bw'agwaine okusaakibwa?

³ Beesiimye abo abakolera ku mazima, ni bakola ebituufu ekiseera kyonakyona.

⁴ Wo Musengwa Katonda, ondidhukiranga lw'oligemerwa abantu bo ekivunika; ombeeranga wamponia ghalala nabo.

⁵ Nsobole okubona ng'abantu bo be weerondera, obulamu bubajiira bukalamu. Olwo nsagambire ghalala n'eighanga lyo, era neesiime n'abo ababo.

⁶ Ife, ni badhaadha baife twayonoona; twakola ebibi ebitasaana.

⁷ Badhaadha baife nga bakaali mu Misiri, ebyewuunhisa Musengwa Katonda bye yakolanga tibaabitwalanga ng'ekikulu; tibaidhukirangaku naire bwe yabagonzanga obutalekera. Baadheemera oyo Ali Ghaigulu Yeene, bwe baali mu Nhandha Emyufu.

⁸ Aye era yabawonia okuzikirira ku lw'obulungi obw'eriina lye, asobole okwoleka obuyinza bwe obungi.

⁹ Yakaabukira Enhandha Emyufu yaakala; yaasomosa abantu be okubita ku ntobo y'enhandha ng'ekaze ng'oti irungu.

¹⁰ Kale yaabatoola mu ngalo dh'abazigu baibwe; yaabawonia abo ababakiriga.

¹¹ Amaadhi gaafundekeza abazigu baibwe; ghaabula asigalagho waire omulala ati.

¹² Olwo abantu be baakakasa bye yabasuubiza, era baayemba enhembo edhimusaaka.

¹³ Aye beerabira mangu bye yabakolera, baalekera n'agho okumalanga okumwebuuzaaku abaghe ku magezi.

¹⁴ Ate baidhamu amairu amabitirivu nga bali eyo mu irungu, baaleba Katonda nga bali eyo.

¹⁵ Kale yaabagha kye baamusaba, aye kabiri yaamala yaabaleetera endwaire embi einho eyabagoogombyanga.

¹⁶ Olundi nga bali mu kifo ghe baasimba weema dhaibwe, ghaabaagho abantu abaagemerwa Musa ensaalwa, ni Aaroni omugheereza wa Musengwa Katonda omutukuvu.

¹⁷ Aye ensi yaayasama yaamira Dathani, era yaabuutikira Abiramu n'abantu be.

¹⁸ N'omuliro gwaika ku bantu abo, gwayokya abakozi b'ebibi abo.

¹⁹ Ate olundi Abaisiraeli baakola ekifaananie eky'ente ento nga bali ku lusozi Horebu, era baasinza ekifaananie ekyo ekyakolebwa mu kyuma ekisaanuusiibwa.

²⁰ Baalekera okugha Katonda ekitiisa, baakigha ekifaananie eky'ente erya obw'eisubi!

²¹ Baava ku Katonda eyabawonia okuzikirira, era eyakola ebintu ebikologho mu Misiri,

²² eyakola ebyewuninkiriza mu nsi ya Hamu, era eyakola ebyewuunhisa nga bali mu Nhandha Emyufu.

²³ Kyeyava n'akoba ati aja kubazikiriza, okutuusa Musa omulonde we, bweyayemereragho mu maiso ge, n'abawolerezaayo, era n'aikaikania obusungu bwa Katonda eyali aja okubazikiriza.

²⁴ Agho baanhoomerera ensi engimu, olw'okuba baali tibaikiriza Katonda kye yabasuubiza.

²⁵ Baaduuduumira mu weema dhaibwe, baaloba kugondera ebyo Musengwa Katonda bye yabakoba.

²⁶ Kyeyava n'abalabula nga yeerayirira, boonaboona okubaitira mu irungu omwo,

²⁷ asansaanie abaana baibwe n'abaidhukulu, eyo mu nsi edh'abatatya Katonda, bafiire eyo mu nsi edh'eghala.

²⁸ Agho beeyimba n'abantu mu kusinza omusambwa Baali ogw'e Peori, era baalya ku misengo egigheebwayo eri ebintu ebiziramu na bulamu.

²⁹ Olw'ebikolwa byaibwe ebyo baaleetera Musengwa Katonda okusungughala, yaabaleetamu endwaire embi einho eyabamulungula.

³⁰ Aye Finehasi yaasitukiramu yaabonereza abo abaakola ekibi, olwo Musengwa Katonda yaalekeza endwaire eyo embi.

³¹ Kino kyamuleetera okusiimibwa, era abantu ab'ense n'ense banaamwidhukiranga olw'ekyo.

³² Olundi era, baaleetera Musengwa Katonda okusungughala nga bali gha maadhi ag'e Meriba, baaleetera Musa obuzibu olw'ekyo kye baakola;

³³ kuba baamuleetera okusungughala einho, kyaviiramu Musa oyo okwogera nga tasoose kulowooza.

³⁴ Baaloba okuzikiriza abamaghanga agandi, nga Musengwa Katonda bwe yabalagira,

³⁵ aye baafumbiraganwa nabo, era baayega empisa dhaibwe,

³⁶ nga basinza ebitali Katonda era ekyo kyabaviiraku okuzikirira.

³⁷ Baaghangayo abaana baibwe abalenzi n'abaghala ng'emisengo eri emizimu emibi.

³⁸ Baayughanga emisaayi egyo egiziraku musango, egy'abaana baibwe abalenzi n'abaghala be baaghangayo ng'emisengo eri ebintu ebyo ab'e Kanaani bye baasinzanga ebitali Katonda. Olwo ensi yaafuuka nnhonoonefu olw'obutemo obwo.

³⁹ Batyo beene beereetaku okuba aboonoonefu olw'ebikolwa byaibwe ebyo, era baava ku Katonda.

⁴⁰ Agho obusungu bwa Musengwa Katonda bwatumbukira ku bantu be abo ng'oti muliro, Musengwa Katonda oyo yaatuuka okwesinwa abantu be abo beene be yeerondera.

⁴¹ Kyeyava n'abaleka mu buyinza bw'abamaghanga agandi, abantu abo baabafuga n'enfuga embi.

⁴² Abazigu baibwe baababuza obwogereso, era baabakaka okuba mu bufuge bwaibwe.

⁴³ Emikuzi kamaala nga Musengwa Katonda abatoola mu bizibu, aye baamala baasalagho okumudheemera. Kale beeyongera okuba ababi olw'ebibi byaibwe.

⁴⁴ Aye waire nga beebisa batyo, tiyabatoolaku mwoyo. Bwebaalira yabafaaku.

⁴⁵ Ku lwaibwe yaidhukira endagaano ye era yaabairiramu olw'okugonza kwe okutakoma.

⁴⁶ Yaleetera abo boonaboona abaali babakiriga, okubagemerwa ekivunika.

⁴⁷ Wo Musengwa Katonda waife kola otuwonie, otusoloze okuva eyo mu maghanga ye twasansaanira. Olwo tukusiimenga olw'eriina lyo eitukuvu, era tukusaakenga olw'ekitiisa kyo.

⁴⁸ Musengwa Katonda asaakibwe, oyo Katonda wa Isiraeli! Asaakibwe buti era n'ebyanda n'ebyanda. Abantu boonaboona ka bakobe bati: “Amiina!” Mwenamwena musaake Musengwa Katonda!