Zabbuli 105 - Baibuli Ekibono kya Katonda 2014

Katonda n'abantu be Abaisiraeli

¹ Mwenamwena musiime Musengwa Katonda, musaake eriina lye; mumanhise amaghanga agandi ebyo bye yakola.

² Mumwembere nga mwemba enhembo edhimusaaka; nga mukobera abantu ebyewuunhisa byonabyona bye yakola.

³ Muwulire okwesiima olw'eriina lye eitukuvu; abo abasinza Musengwa Katonda ka basagambe.

⁴ Musabe Musengwa Katonda ababeerenga; mumusinzenga nga muli gh'ali ekiseera kyonakyona.

⁵ Muteerabiranga ebyewuunhio, n'eby'amaani bye yakola era n'ensala ye yasalamu emisango,

⁶ imwe abaana ba Aburahamu omugheereza we era baidhukulu ba Yakobo ye yeerondera.

⁷ Oyo ni Musengwa Katonda waife, ebiragiro bye bikola mu nsi yoonayoona.

⁸ Akuuma endagaano ebyanda n'ebyanda, yaagumira ku bye yasuubiza ni bweghabitagho ense olukumi.

⁹ Akuuma endagaano ye yakola ni Aburahamu, n'ekisuubizo kye yasuubiza Isaaka nga yeerayirira.

¹⁰ Endagaano eyo yagikola n'omugheereza we Yakobo, yaagitaagho ng'eiteeka era nga n'endagaano n'Abaisiraeli etaliwaagho,

¹¹ ng'akoba ati: “Ndibagha ensi Kanaani, yaaba yaimwe ku bwaimwe.”

¹² Abantu ba Katonda baali bakaali batono abazira ghe baaga, era nga basenze busenze mu nsi eyo.

¹³ Baatambulatambula eyo batyo baava mu nsi eyindi kabiri baaja mu yindi, era baava mu bwakyabazinga obundi, baaja mu bundi.

¹⁴ Aye Katonda tiyaganha muntu yeenayeena kubakiriga; ku lwaibwe yakaabukira ba kyabazinga

¹⁵ ng'abakoba ati: “Ghatabaagho agema ku bantu bange be nasiiga omuzigo; abalanzi bange mutabakola kibi kyonakyona.”

¹⁶ Bwe yabaleetera endhala okugwa mu nsi mwe baali, n'ababuzaaku kiisi kantu koonakoona akasobola okuliibwa,

¹⁷ yali yamala ira okugheerezaayo emberi waibwe, omusaadha ayetebwa Yosefu, ye baatunda yo mu bwiru.

¹⁸ Yateebwa mu ikomera, baamusiba n'endhegere ku bigere, n'ekikomo eky'ekyuma mu nkoto

¹⁹ okutuusa ekyo kye yakoba ati kiribaagho lwe kyatuukirira, ekibono kya Musengwa Katonda ni kimukakasa okuba omutuufu.

²⁰ Olwo Kyabazinga yaatuma baamusibula; oyo afuga abantu yamulekula yeetaaya.

²¹ Yaagha Yosefu oyo okukuumanga amaka ge goonagoona, yaamugha okulabiriranga ebibye byonabyona.

²² Kyabazinga yaamugha obukumu okulagira abakungu be boonaboona nga bwe yayendanga, n'okugha abaami be amagezi.

²³ Agho Isiraeli yaaja mu Misiri; Yakobo yaasenga mu nsi ya Hamu.

²⁴ Musengwa Katonda yaabagha okuzaalagana baayala, baaba ba maani okusinga abazigu baibwe.

²⁵ Yaakyusa emyoyo gy'Abamisiri baakyagha abantu be, era baatoolera okulya mu bagheereza be abo enkwe.

²⁶ Yaabatumira Musa omugheereza we, ni Aaroni ye yeerondera.

²⁷ Baabakolera ebyewuunhio nga babona, era baabakolera eby'amaani nga bali mu nsi ya Hamu.

²⁸ Yabasindikira enzikiiza yaagema ensi yoonayoona, aye era Abamisiri tibaagondera kiragiro kye.

²⁹ Yaakyusa amaadhi gaibwe gaafuuka musaayi, era yaaleetera ebyenhandha byaibwe okufa.

³⁰ Ensi yaibwe yaidhula ebikere, nga biidhwire ni mu kisaagaati kya kyabazinga waibwe.

³¹ Yalagira ebikuukuulu by'ensowera n'obudhuuni byabunia ensi yaibwe.

³² Yabasindikira mugozi mu kifo ky'amaadhi okugwa, n'olukuba lwamyansa lwamazaaku ensi yaibwe.

³³ Yazikiriza emiti gyaibwe emizabbibu n'emitiini, yaamenhamenha n'emiti gyonagyona egy'omu nsi yaibwe!

³⁴ Yalagira enzige dhaidha kamaala, nga n'okubalika tidhibalika,

³⁵ dhaalya kiisi kimera kyonakyona ekyali mu nsi omwo, na kiisi kisimbe kyonakyona.

³⁶ Yaita abaana ababeri abalenzi mu nsi omwo boonaboona, abasooka mu kiisi ndhu.

³⁷ Agho yaatoola Abaisiraeli mu nsi omwo, baaja n'ebintu ebya feeza n'ebya zaabu, nga boonaboona balamu era nga ba maani.

³⁸ Bwe baavaayo Abamisiri baasangaala, kuba baali batooleire okubatya einho.

³⁹ Katonda yaayandhuluza ekire kyabwika abantu be, ate obwire yaataagho omuliro gwabamuliikirira.

⁴⁰ Baamusaba, yaabasindikira obunhonhi obuli ng'oti bukologo, yaabagha n'emere kamaala okuva mu igulu.

⁴¹ Yakuba olubaale lwayawuka, mwafukumukamu amaadhi, gaakuuluula mu irungu ng'oti mwiga;

⁴² kuba yaidhukira endagaano ye entukuvu, ye yakola ni Aburahamu omugheereza we.

⁴³ Kale yaatoola abantu be mu nsi omwo nga basangaavu, abantu be abo be yeerondera baavaamu nga bemba.

⁴⁴ Yaabagha ensi edh'abamaghanga agandi, era beiriza amasamba abantu abandi ge baatakabanira okulima,

⁴⁵ ng'ayenda abantu be abo bagonderenga amateeka ge, era bajiirenga ku biragiro bye. Mwenamwena musaake Musengwa Katonda.