Zabbuli 104 - Baibuli Ekibono kya Katonda 2014

Okusaaka omutonzi

¹ Ka nsaake Musengwa Katonda n'omwoyo gwange gwonagwona. Wo Musengwa Katonda wange, oli mukologho inho. Oidhwire ekitiisa n'obwakyabazinga,

² weebwika obutangaavu ng'oti kivaalo, era waayandhuluza eigulu ng'oti weema.

³ Oba eyo ghaigulu ku maadhi, waavuga ebire ng'oti n'ekigaali kyo eky'omu lutalo, waajiira ku maghagha ag'empewo.

⁴ Ofuula empewo okuba abakwenda bo, n'enimi edh'omuliro waadhifuula okuba abagheereza bo.

⁵ Wataagho ensi ku misingi gyayo, yaaba nga tesobola kuseetuka.

⁶ Waagighembaku amaadhi ag'enhandha gaaba ng'ekivaalo kyayo, amaadhi gaaba ghaigulu gh'ensozi.

⁷ Bwe wagakaabukira gaalumukagho; bwegaawulira amamiro go ng'oli kutyabuka gaaswankukagho.

⁸ Gaakuuluulira ghaigulu ku nsozi, ni ghansi mu biiko, okutuuka mu kifo kye wagategekera.

⁹ Wataagho ensalosalo ye gatateekwa kubitaku galobe kwiramu kabiri kughemba ku nsi.

¹⁰ Oleetera emiiga okutiiriika nga giva mu biiko, gyakuuluula nga gibita ghagati gh'ensozi.

¹¹ Olwo gyagha ensolo edh'omu nsiko edha buli ngeri amaadhi ag'okunhwa; endogoyi edh'omu nsiko dhaawona endiwo.

¹² Era agho gha miiga, enhonhi edh'omu ibbanga ghe dhikola ebisu, dhaayemba nga dhiri eyo mu nsaga edh'emiti.

¹³ Ng'oli eyo ghaigulu y'oba, ofukirira ensozi amaadhi, ensi yeesiima n'ebibala ebiva mu ngalo dho.

¹⁴ Okuza eisubi olw'ente okulya era waakuza ebirime eby'omuntu, omuntu asobole okufuna emere ku nsi.

¹⁵ Afune n'omwenge ogw'emizabbibu ogumusangaaza, n'omuzigo ogw'ebibala eby'emiti emyoliva ogumusanhusa, era afune n'emere emugha amaani mu mubiri.

¹⁶ Emiti gya Musengwa Katonda gifuna amaadhi kamaala agagwa, era egyo nga n'emivule egy'e Lebanoni mwene gye yasimba.

¹⁷ Omwo enhonhi mwe dhizimba ebisu byadho, ni sekanhulya ku miti emireeyiriri kw'akola ebisu.

¹⁸ Mu nsozi endeeyiriri n'eba embuzi edh'omu nsiko, ate obuduuyu bwegisa mu gabaale.

¹⁹ Wataagho omwezi okugereraku ebiseera eby'omwaka, n'endhuba yaamanha ekiseera kyayo eky'okugwa.

²⁰ Wakola enzikiiza ereetera obwire okuziba, ensolo dhoonadhoona edh'omu nsiko dhaatoolera okutambula.

²¹ Empologoma ento dhaawologoma nga dhiri ku muyiigo, nga dhaagala eky'okulya Katonda ky'anaadhigha.

²² Endhuba bw'evaayo dhiirayo, dhalambaala mu bifo bya dho.

²³ Abantu baaja ku mirimo gyaibwe, era baatakabana okutuusa bwebuziba.

²⁴ Wo Musengwa Katonda, nga wakola ebintu nga bya nsambo kamaala! Ate waabikola mu magezi amangi oti ki! Ensi eidhwire ebitonde byo.

²⁵ Enhandha yiire ogibona nga nkologho era nga ngazi inho. Eidhwire ebintu ebiramu ebitabalika, ebitono n'ebinene.

²⁶ Okwo n'okuseeyeeyeza emeeri, era omwo n'omuzaanhira ogusota ogwetebwa Leviathani.

²⁷ Bino byonabyona biringirira ku iwe okubigha emere yaabyo mu kiseera ekituufu.

²⁸ Bw'obigha nga bitoola; bw'obigha biiguta ghaabula ekisigala nga kikaayenda.

²⁹ Bw'otabifaaku biwaamu inho omwoyo; bw'obitoolamu omuuka gwo, olwo nga bifa, nga biirayo mu nkungu mwe by'ava.

³⁰ Aye bw'obigha omuuka gwo bitondebwa, n'ensi yaafuna obulamu obuyaaka.

³¹ Ekitiisa kya Musengwa Katonda ka kibengagho ebyanda n'ebyanda, era kiisi Musengwa Katonda ky'akola kimuleeterenga okusangaala.

³² Oyo alinga bulinge ku nsi yaadhugumira, ate yaagema bugeme ku nsozi dhaanioka omwosi.

³³ Nze ndidha kwemberanga Musengwa Katonda oyo obulamu bwange bwonabwona; nga nkaali mulamu tija kulekera kwemba nhembo dhisaaka Katonda wange oyo.

³⁴ Nsaba Musengwa Katonda asiime olwembo lwange, kuba okusagamba kwange kuva y'ali.

³⁵ Aye aboonooni bagwananga baazikirira baava ku nsi, n'abakozi ab'ebibi baabuliragho irala. Ka nsaake Musengwa Katonda n'omwoyo gwange gwonagwona. Mwenamwena musaake Musengwa Katonda.