Zabbuli 103 - Baibuli Ekibono kya Katonda 2014

Olwembo olw'okusiima Katonda

¹ Ka nsaake Musengwa Katonda n'omwoyo gwange gwonagwona, na buli kitundu kya mubiri gwange kisaake eriina lye eitukuvu.

² Ka nsaake Musengwa Katonda n'omwoyo gwange gwonagwona, ndobe na kwerabira ebirungi byonabyona by'ankoleire.

³ N'oyo asonigha okwonoona kwange kwonakwona, yaawonia endwaire dhange dhoonadhoona.

⁴ Amponia okunserengeta e magombe, yangonza obutalekera n'okusaasira kwe okungi.

⁵ Ampa buli kikalamu kye neetaaga mu bulamu bwange bwonabwona, naasigala nga ndi mugumu era wa maani ng'oti n'enkookooma.

⁶ Musengwa Katonda asalagho mu butuufu, yaaleetera n'abazira bwogereso okusinga omusango, baakolerwa ebituufu bye bagwaniire.

⁷ Yamanhisa Musa enkola ye, yaalaga Abaisiraeli ebikulu bye yakola.

⁸ Musengwa Katonda asaasira era wa kivunika, alwagho okusungughala era yaagonza inho abantu obutalekera.

⁹ Tajiirajiira inho ku muntu akoze kibi era tiyeegemerera.

¹⁰ Tatubonereza nga bwe tugwaniire olw'ebibi bye tukola, waire okutusasula ekibonerezo ekituukana n'okwonoona kwaife.

¹¹ Ng'eigulu bwe liri eghala einho n'ensi, n'okugonza kwe eri abo abamutya kutyo ye kukoma okuba okungi.

¹² Ng'e buvandhuba bw'eri eghala einho n'e bugwandhuba, n'ebibi byaife atyo bw'abighereekereza, by'atuba ghala.

¹³ Ng'omuzaire bw'aghembeera abaana be, ni Musengwa Katonda atyo bw'aghembeera abo abamutya.

¹⁴ Aidhi bwe twawumbibwa; aidhukira nga tuli nkungu.

¹⁵ Enaku edh'obulamu bw'omuntu ntono ng'oti n'eisubi lye dhimala. Omuntu akula bukalamu yaagimuka ng'oti kimuli kya mu nsiko,

¹⁶ aye empewo olukifuuwaku nga kibulagho, nga ni ghe kyali tighakaamanhika naku.

¹⁷ Aye abo abatya Musengwa Katonda, Musengwa Katonda oyo abagonza obutalekera ebyanda n'ebyanda. Obutukuvu bwe abwoleka ense n'ense,

¹⁸ era yaabwoleka abo abakuuma endagaano, ni bagumira ku biragiro bye.

¹⁹ Musengwa Katonda yata ekityamo kye eky'obwakyabazinga mu igulu, yaakigumya, era ni kyabazinga afuga ebintu byonabyona.

²⁰ Musaake Musengwa Katonda imwe bamalaika be mwenamwena ab'amaani, abawulira ebiragiro bye era abagondera by'akoba.

²¹ Musaake Musengwa Katonda imwe ab'omu igulu ab'amaani mwenamwena, imwe abagheereza be abakola by'ayenda.

²² Musaake Musengwa Katonda imwe ebitonde bye mwenamwena, mu bifo yoonayoona y'afuga. Nze ka nsaake Musengwa Katonda n'omwoyo gwange gwonagwona.