Zabbuli 102 - Baibuli Ekibono kya Katonda 2014

Okusaba okw'omuntu ali kutawaanizibwa ebizibu

¹ Wo Musengwa Katonda, ndhiraamu okusaba kwange, owulire okulira kwange.

² Bwembanga mu buzibu otandekuliranga bw'agho. Wuliranga kye nkoba, oyangughengaku okumbeera nga nkwese.

³ Obulamu bwange buwaagho ng'oti mwosi; n'amagumba gange gaaya omuliro ng'oti gwa mu luyiira.

⁴ Ndi muniavu ng'oti n'eisubi lye bakubye, era neerabira n'okulya emere.

⁵ Olw'okuwowoola kwange okungi, nsigaire magumba meereere.

⁶ Ndi ng'oti nhonhi ya mu irungu, era nfuuse ng'oti kiwigulu eky'omu mayumba agaavaamu abantu.

⁷ Ni bwenambaala titenduka. Ndi ng'oti n'enhonhi eri yonka edaagira ku kasolya k'enhumba.

⁸ Omusana n'obwire abazigu banvuma, era abo abanvumirira bakozesa eriina lyange nga bakolima banaibwe.

⁹ Nsiiba mu ivu era n'eryanfuukira emere, ate mu buli kye nhwa mwetabulamu amaziga ge ndira.

¹⁰ Olw'ekiruyi n'obusungu by'oli nabyo, wangema wansuula ere.

¹¹ Obulamu bwange buwaagho ng'oti n'ekinsense ekyeigulo ng'endhuba egwire. Ndi ng'oti isubi erikala ni liwaagho.

¹² Aye iwe Musengwa Katonda oli kyabazinga ebyanda n'ebyanda era omanhiibwa abantu ab'ense n'ense.

¹³ Olisitukiramu, waidha waagemerwa Sioni ekivunika; ekiseera kituuse eky'okulinga ku Sioni n'ekisa; eno n'esaawa entuufu.

¹⁴ Abagheereza bo bagonza inho Sioni waire nga kyazikirizibwa; era bakirumirwa inho waire nga kyasigala bwa bifunfugu.

¹⁵ Ensi dhoonadhoona dhija kutya eriina lya Musengwa Katonda; ni bakyabazinga boonaboona ab'oku nsi baja kutya ekitiisa kye.

¹⁶ Musengwa Katonda bw'alizimba Sioni n'akiizaagho alyoleka ekitiisa kye.

¹⁷ Aliwulira okusaba kw'abantu be abanaku, era yaawulirisa okweghemba kwaibwe.

¹⁸ Bino ka bighandiikibwe, abaana ab'oluse oluliidha babisomeku, olwo abantu abakaali kuzaalibwa balisaaka Musengwa Katonda,

¹⁹ bati: yali ghaigulu eyo mu kifo kye ekitukuvu yaalinga ghansi, Musengwa Katonda oyo yaba mu igulu yaalinga ghansi ku nsi.

²⁰ Yawulira okusinda okw'abasibe abali mu ikomera, yaasibula abo abaali balindiriire okwitibwa obwitibwe.

²¹ Olwo abantu balimanhisa eriina lya Musengwa Katonda mu Sioni, baamusaaka mu Yerusalemu,

²² ng'abantu beesoloiza okuva mu bwakyabazinga obw'endhawulo n'ensi edh'endhawulo, okusinza Musengwa Katonda.

²³ Ansaze ku maani nga nkaali muto; akendeeziiza ku nnaku edh'obulamu bwange.

²⁴ Naakoba nti: “Wo Katonda wange, otantwala buti nga nkaali kukairigha, iwe ow'emyaka egitasalikaku ebyanda n'ebyanda.”

²⁵ Eira einho wataagho emisingi egy'ensi, n'eigulu lyona walikola na ngalo dho.

²⁶ Ebyo biidha kuwaagho, aye iwe oligho ekiseera kyonakyona; byonabyona birikairigha ng'oti kivaalo. Olibisuula ere ng'oti ngoye nkaire, byabulagho.

²⁷ Aye iwe osigala nga bw'oli era emyaka gyo tigisalikaku.

²⁸ Abaana b'abo abakutya baidha kubangagho ng'obakuuma, n'abaidhukulu baibwe boona baidha kubanga bagumu gh'oli.