Zabbuli 101 - Baibuli Ekibono kya Katonda 2014

Okweyama kwa Kyabazinga

¹ Ka nhembe ku bwesigwa ni ku nsala ey'amazima nga nhembera iwe Musengwa Katonda.

² Ndidha kwebisanga mu ngeri etandeetere kwogerwaku. Oliidhaku li ye mba? Ndidha kubanga mwesigwa okuviira irala mu ndhu yange.

³ Tija kuganhanga kwereeterezaaku kintu kyonakyona kibi. Nkyaghira irala ebikolwa by'abo abava ku Katonda. Tija kukolagananga nabo naire.

⁴ Tija kwereeterezangaku buguya, era ndidha kwesambiranga irala ekibi.

⁵ Nja kuzikirizanga omuntu yeenayeena ageya mwine, era tija kuguminkiriza muntu eyeekulumbaza era eyeesaakiriza.

⁶ Abo abeesigwa baidha kubanga bagonzi ye ndi, era baidha kubanga ghalala ninze. Ate abo ab'empisa enkalamu baidha kubanga bagheereza bange.

⁷ Tija kuganha muntu muguya kubanga mu ndhu yange; n'oyo asalira baine enkwe ndidha kumubinganga ghe ndi.

⁸ Buli lunaku ndidha kuzikirizanga abakozi b'ebibi mu nsi, ndekeze ababi okubanga mu kibuga kya Musengwa Katonda.