Zabbuli 10 - Baibuli Ekibono kya Katonda 2014

Okusaba okusalirwa omusango mu butuufu

¹ Wo Musengwa Katonda, lwaki oba ghala otyo? Lwaki weegisa mu biseera ebizibu?

² Abakozi b'ebibi beebona nga ba ghaigulu era baakiriga abaavu. Emitego gyene gye batega banaibwe, n'egibe gibategemu.

³ Omukozi w'ebibi yeesaakiriza olw'okwegomba kwe okubi, era omuntu oyo agwidhubanira eby'okufuna, ayogera bubi ku Musengwa Katonda era yaamunhooma.

⁴ Omukozi w'ebibi nga bwe yeebona nga wa ghaigulu, tatwala Musengwa Katonda ng'ekikulu. Mu by'akola byonabyona talaadha Katonda.

⁵ Omukozi w'ebibi kiisi ky'agemaku kimulamira. Tafaayo ku nsambo Katonda y'asaliramu bantu misango, era abazigu be ababona ng'omuzira kantu.

⁶ Munda mule akoba ati: “Nzira kindhugumiza, tija kutuukaku kizibu kyonakyona ebyanda n'ebyanda.”

⁷ Mu by'ayogera n'omwidhwire okukolima, okuguya, n'okwesoomera; olulimi lwe lwidhwire eitima n'okwonoona.

⁸ Yeeteega abantu mu byalo, yaitira abantu mu ngiso abaziraku musango. Aleemesa abo abaziraku ababeera, ng'ayenda okubakola akabi.

⁹ Yeegisa yaabeeteega ng'oti mpologoma eri mu ndungu. Yeegisa asobole okutuumira ku baavu n'okubagema, era yaabagemya mu lutuula lwe yaabakwekwebya.

¹⁰ Abagwaku n'amaani ge amangi einho, baasigala ku itaka nga gabawoire.

¹¹ Munda mule akoba ati: “Katonda tafaayo! Yeeghembye mu maiso era kino taidha kukibona!”

¹² Wo Musengwa Katonda, idha! Katonda wange, kozesa omukono gwo ogw'amaani. Oteerabira abo abadaazibwadaazibwa!

¹³ Lwaki abakozi ab'ebibi banhooma Katonda, ni badhuuba bati Katonda taja kubabonereza?

¹⁴ Aye iwe obona, yii, weetegereza abali mu buzibu n'abadaazibwadaazibwa, era weetegeike okukozesa omukono gwo ogw'amaani. Oyo azira amubeera yeeta mu ngalo dho, kuba buliidho niiwe obeera abaghafu.

¹⁵ Toolagho amaani g'omukozi w'ebibi n'omwonooni. Ja ng'omutondolamu okwonoona kwe, okutuusa lw'olikumumalamu.

¹⁶ Musengwa Katonda ni kyabazinga ow'ebyanda n'ebyanda, abatamutya tibaja kubanga mu nsi ye.

¹⁷ Wo Musengwa Katonda, iwe owulirisa okusaba kw'abo abagonvu, era obagumya emyoyo.

¹⁸ Tega kutu owulirise bamulekwa n'abatuntuzibwa, obasalire omusango mu butuufu basinge, olwo ghabule omuntu yeenayeena ku nsi atiisatiisa obulamu bwa baine.