Yoshua 9 - Baibuli Ekibono kya Katonda 2014

Abantu ab'e Gibeoni abaaguya Yoshua

¹ Bakyabazinga ab'e bugwandhuba obw'omwiga Yorudani baawulira ng'Abaisiraeli bwe baaghangula abazigu baibwe. Bakyabazinga abo, ni bano: ab'omu biketezo eby'ensozi, n'ab'omu biiko, n'ab'omu biketezo ebiri ku mbali okw'Enhandha Eyaghagati ng'oja e Lebanoni. Abantu abaali mu biketezo bino, ni bano: Abahitti, Abamori, Abakanaani, Abaperizzi, Abahivi, n'Abayebusi.

² Bano baaba ghalala boonaboona, baisania beeyimbe balwanise Yoshua n'Abaisiraeli.

³ Aye abantu ab'e Gibeoni, nga Bahivi, baawulira Yoshua kye yakola Yeriko ni Ayi.

⁴ Kale beene baasalagho okumuguya. Baafunayo emere baagita mu ndyanga enkaire einho, baagitwika endogoyi dhaibwe ghalala n'ensawo enkaire edh'amawu edh'omwenge ogw'emizabbibu dhe baagheraghera ni dhiidula ebighero.

⁵ Baavaala mu bigere engaito edhaaseenena era nga baadhigheraghera, era baavaala n'ebivaalo ebikuunhuufu. Emere ye baasiba ng'entanda yali yakala ira era nga yamera obukuku.

⁶ Baaja e Giligali Abaisiraeli ghe baasimba weema dhaibwe, baakoba Yoshua n'Abaisiraeli abo bati: “Tuva eyo mu nsi ya ghala era twidhie okukola n'imwe endagaano.”

⁷ Aye Abaisiraeli baabakoba bati: “Tusobola tutya okukola n'imwe endagaano? Musobola okuba nga muva kumpi ghano.”

⁸ Baakoba Yoshua bati: “Kye munaatukoba kyonakyona kye tunaakola.” Yoshua yaababuuza ati: “Niimwe baani era muva gha?”

⁹ Agho baamukoba bati: “Tuva ghala inho aye olw'okuba twawulira ku bintu Musengwa Katonda waimwe by'akola, kye tuviire ni twidha.

¹⁰ Twawulira bye yakola bakyabazinga ababiri Abamori abaali e buvandhuba ewa Yorudani: Sihoni eyali kyabazinga wa Heshiboni, ni Ogi eyali kyabazinga wa Bashani eyabanga mu kibuga Ashitarothi.

¹¹ Abakulira ebikunsu byaife era n'abantu abandi ab'ensi yaife boonaboona, baatukoba tusibe entanda twetegekere olugendo luno, era twidhe tubabone. Batutumye tubakobere tuti tuli beetegefu okuba abagheereza baimwe, era tubasabe mukole n'ife endagaano.

¹² Mubone emere yaife eno, yali nsu bukalamu ghe twagisibira nga tuva eka okwidha okubabona aye buti yakala era yaagema obukuku.

¹³ Mu nsambo n'endala, ensawo dhino edh'amawu dhaali mpyaka ghe twadhifukiramu omwenge ogw'emizabbibu, aye buti dhaatulikatulika. Era n'ebivaalo byaife bikuunhwike n'engaito dhaaseenena, olw'olugendo okuba oluleeyi einho.”

¹⁴ Kale Abaisiraeli baaganha okulya ku mere eyo abasaadha abo ye baasiba, ng'akamanhiso ak'endagaano. Aye kino baakikola nga tibeebuuziizaaku ku Musengwa Katonda.

¹⁵ Yoshua yaakola nabo endagaano, yaabalayirira obutabaita era n'abakulu ab'ebikunsu mu Isiraeli baakola batyo.

¹⁶ Bwe ghaabitagho enaku eisatu nga bamaze okukola endagaano, Abaisiraeli baakizuula ng'abantu abo baliraanwa baibwe era nga baba nabo ghalala.

¹⁷ Agho Abaisiraeli baatoolera okutambula, era ku lunaku olwokusatu baatuuka mu bibuga eby'abantu abo era ni bino: Gibeoni, Kyefira, Beerothi, ni Kiriathi Yearimu.

¹⁸ Aye ng'Abaisiraeli tibaghanga kwita bantu abo, kuba abakulu ab'ebikunsu mu Isiraeli baali nga bamaze okubalayirira mu liina lya Musengwa Katonda wa Isiraeli. Agho Abaisiraeli boonaboona beemuluguunhiza abakulu abo.

¹⁹ Aye abakulu abo baabakoba bati: “Abantu abo twabalayirira mu liina lya Musengwa Katonda wa Isiraeli, buti titughanga kubakola kabi koonakoona.

²⁰ Kye tuli n'okukola, kubaleka nga balamu bwe tutakola tutyo, obusungu bwa Musengwa Katonda bwidha kutwakiraku ng'oti muliro.

²¹ Mubaleke baidha kutwasaagiranga enku n'okutusomberanga amaadhi.” Era kityo bwe kyali.

²² Yoshua yaayetesa abantu ab'e Gibeoni yaabakoba ati: “Lwaki mwatuguya muti muva ghala inho ate nga muli ba ghano, mu ife mwene?

²³ Mbeeni nga bwemwakola mutyo, Musengwa Katonda aidha kubabonereza, abantu baimwe baidha kubanga bairu kwasaaganga nku na kuja maadhi ga ndhu ya Katonda wange.”

²⁴ Baamwiramu bati: “Ekyatukoza ekyo lwa kuba ife abagheereza bo twawulira aghazira kubuusabuusa, nga Musengwa Katonda waimwe yalagira omugheereza we Musa, okubagha ekiketezo kino kyonakyona, era n'okuzikiriza abantu baamu boonaboona kiisi ye munaabanga muja. Kale twatya inho nga mwidha kutwita.

²⁵ Era buti tukuli mu ngalo okutukola iwe mwene ky'onaabona nga n'ekirungi era ekituufu.”

²⁶ Yoshua yaabatangirira, yaalobera Abaisiraeli okubaita.

²⁷ Aye yaabafuula bairu okwasaagiranga Abaisiraeli enku n'okubajiiranga amaadhi, era n'okwasaagiranga alutaari ya Musengwa Katonda enku n'okugijiiranga amaadhi. Ebyo bye bakola ni ye buli eno, mu kifo woonawoona Musengwa Katonda gh'aba ng'alonze okumusingiza.