Yoshua 8 - Baibuli Ekibono kya Katonda 2014

Okugema n'okuzikiriza Ayi

¹ Musengwa Katonda yaakoba Yoshua ati: “Lekera agho okutya n'okuwaamu amaani. Situkiramu n'abasaadha bo abalwani boonaboona, muje mulumbe Ayi. Kuba bona eno, mmaze okukuta mu ngalo kyabazinga wa Ayi n'abantu be, n'ekibuga, n'ensi ye.

² Kye mwakola Yeriko ni kyabazinga waakyo, kye mube mukole ekibuga Ayi ni kyabazinga waakyo. Aye ku luno musobola okutwala kye munaaba munhaze, ng'ebintu n'ensolo. Mubazinduukirize mubagweku nga mubava inhuma.”

³ Kale Yoshua yaategeka okuja e Ayi n'abasaadha be abalwani boonaboona. Yaalondaku abasaadha emitwalo esatu (30,000) abalwani einho, yaabalagira baje obwire,

⁴ ng'abakoba ati: “Muje mubwame einhuma ow'ekibuga era nga timuli ghala nakyo, nga muli beetegefu okulumba.

⁵ Nze n'abantu boonaboona be ndi nabo, twidha kwidha nga tukiva emberi waakyo. Bwe tunaabona abasaadha ab'e Ayi nga baidha okutulumba, twidha kukyuka tulumuke nga bwe twakola ku mukuzi gule.

⁶ Baidha kudhuuba bati tuli kubalumuka, nga ku mukuzi gule, batubingirire okutuusa nga tubalesiiza ekibuga ghala.

⁷ Ng'olwo musituka okuva ghe munaaba mubwaime, nga mugema ekibuga ekyo kuba Musengwa Katonda waimwe aidha kukibata mu ngalo.

⁸ Bwe mumala okukigema mukikunaanieku omuliro, nga Musengwa Katonda bwe yalagira. Mugeme ebiragiro ebyo obutabivaaku.”

⁹ Kale Yoshua yaabasindika, baaja baabwama nga ghazira ababona e bugwandhuba wa Ayi okwolekera Betheli. Beeteega agho obwire obwo, aye Yoshua obwire obwo yaabumala mu bantu abaasigala.

¹⁰ Enkyo einho ku lunaku olwairirira, Yoshua yaawuuna yaayeta abasaadha abalwani boonaboona, mwene yaabakulemberamu n'abakulu ab'ebikunsu eby'endhawulo, baayolekera Ayi.

¹¹ Baaja baatuuka kumpi n'ekibuga, agho emberi waakyo, ku luuyi lwakyo olw'omukono omugooda olw'e buvandhuba, baagumba agho nga ghaligho bwa kiiko ghagati ghaibwe n'ekibuga Ayi.

¹² Yoshua yaalagira abasaadha ng'enkumi itaanu (5,000) baabwama e bugwandhuba ow'ekibuga Ayi ku luuyi lwakyo oluliku ekibuga Betheli.

¹³ Kale batyo abasaadha be abalwani bwe baategekebwa ekikunsu ekisinga bunene kyaba ku luuyi olw'omukono omugooda olw'e buvandhuba ow'ekibuga ekyo Ayi, abandi baaba e bugwandhuba wa kyo. Yoshua mwene obwire obwo yasula mu kiiko.

¹⁴ Kyabazinga ow'e Ayi bwe yababona, mwene n'abasaadha be boonaboona baayangugha, baaja nga boolekeire ekiiko ekirimu Yorudani okulwana n'Abaisiraeli mu kifo kirala ekyo ng'omukuzi gule. Baali nga tibaidhi ng'eriyo abaja okubalumba nga babava e mugongo.

¹⁵ Yoshua n'abasaadha be beefuula ng'abali kubalumuka, baaja mu irungu.

¹⁶ Abantu boonaboona abaali mu Ayi baayetebwa okubingirira Abaisiraeli. Era mu nsambo oti n'eyo Abaisiraeli baalesa ab'e Ayi ekibuga kyaibwe.

¹⁷ Mu Ayi timwasigala musaadha yeenayeena ataaja kubinga Baisiraeli, era baaleka emiryango egy'ekibuga nga gyasaamiriire.

¹⁸ Agho Musengwa Katonda yaakoba Yoshua ati: “Lingiriza eifumo lyo ekibuga ekyo Ayi, kuba ndidha kukikugha.” Yoshua yaakola nga bwe baamukoba,

¹⁹ era olwagalula omukono n'eifumo eryamuli mu ngalo ati, abasaadha abaali babwaime nga beeteeze, baziinhuukayo, bangira mu kibuga baakigema. Era mu kiseera kyene ekyo baakikumaku omuliro.

²⁰ Abasaadha ab'e Ayi baaja okulingaku einhuma, nga babona omwosi ogw'ekibuga kyaibwe ekiri kuya guli mu bire ng'ate bazira na gha kulumukira. Kuba Abaisiraeli abaali bali kulumuka nga boolekeire eirungu, baakyuka baatoolera okulumuka nga baidha ye bali okubalumba.

²¹ Yoshua n'abasaadha be, bwe baabona nga banaibwe bagemye ekibuga era nga bakikunaaniizaaku n'omuliro, baatoolera okwita abasaadha ab'e Ayi.

²² Bale abaagema ekibuga boona bwe baamala, baidha okulumba ab'e Ayi. Kale ab'e Ayi baaba nga bali ghagati gh'ebikunsu byombi eby'Abaisiraeli. Abaisiraeli baita ab'e Ayi ghaabula asigala nga mulamu oba abalumukaku

²³ okutoolaku kyabazinga we Ayi ye baagema ni bamutwalira Yoshua ng'akaali mulamu.

²⁴ Abaisiraeli bwe baamala okwita abasaadha ab'omu Ayi boonaboona, abaali bali kubabingirira eyo mu irungu, baaja baita abo boonaboona abaali basigaire mu kibuga.

²⁵ Abantu ab'e Ayi boonaboona abaafa ku lunaku olwo baali omutwalo mulala n'enkumi ibiri (12,000), abasaadha n'abakazi.

²⁶ Kuba Yoshua tiyaisa mukono gwe ogwalimu eifumo ng'aliringiriiza Ayi, okutuusa nga bamaze okwita abantu baamu boonaboona.

²⁷ Abaisiraeli baatwala ensolo n'ebintu ebindi bye baanhaga mu kibuga, nga Musengwa Katonda bwe yakoba Yoshua.

²⁸ Kale Yoshua yaayokya ekibuga Ayi, yaakireka nga kiri byanhe byereere nga bwekiri ni ye buli eno.

²⁹ Era yaaghanika kyabazinga ow'e Ayi ku muti, yaalengeedhera okwo yaafa. Omulambo gwe baaguleka ku muti okwo okutuusa olw'eigulo. Endhuba bweyali ng'eri kumpi kugwa Yoshua yaalagira, baatoola omulambo ogwo ku muti, baagusuula aghaalinga omulyango ogwangiranga mu kibuga. Bwe baamala, baagubungaku emungo ey'amabaale enkologho ekaaligho ni ye buli eno.

Amateeka gaasomerwa abantu ku Lusozi Ebali

³⁰ Nga ghabiseeghooku entangama, Yoshua yaaja ku Lusozi Ebali yaazimbirayo Musengwa Katonda, Katonda wa Isiraeli Alutaari.

³¹ Yagizimba ng'ajiira ku ebyo Musa omugheereza wa Musengwa Katonda bye yagalagira Abaisiraeli, nga bwekiri mu mateeka ga Musa oyo, nti: alutaari ezimbwa na mabaale gatali mateme gaaku na kyuma. Ku alutaari okwo baagheeraku Musengwa Katonda emisengo egyokebwa, era n'ebigheebwayo olw'okutabagana.

³² Nga bakaali agho, Yoshua yaaghandiika amateeka ku mabaale ng'Abaisiraeli boonaboona balingiriire, nga Musa bwe yaleka ng'agaghandiise.

³³ Abaisiraeli boonaboona abazaale baamu n'abasenze, baayemerera gha Sanduuku y'Endagaano ya Musengwa Katonda nga bagiri eruuyi n'eruuyi. Baali n'abakulu baibwe ab'ebikunsu, n'abakulembeze baibwe, era n'abalamuzi baibwe, nga balingiriire bakabona Abalevi abaabbeedanga Sanduuku eyo. Abandi baali bakubye Olusozi Gerizimu emigongo, ate ng'abandi emigongo gyaibwe bagiringiriiza Olusozi Ebali. Atyo Musa omugheereza wa Musengwa Katonda bwe yalagira okusabiranga Abaisiraeli enkabi.

³⁴ Agho Yoshua yaasomera abantu amateeka goonagoona nga bawulira, ng'omwo n'omuli n'enkabi, n'ebikolimo, nga bwe byaghandiikibwa mu kitabo eky'Amateeka.

³⁵ Ku ebyo Musa bye yalagira ghazira Yoshua ky'ataasoma, era mu Baisiraeli abeesoloza okumuwulira ng'asoma, n'omwali abakazi, n'abaana, n'abasenze abaali baba aghalala n'Abaisiraeli.