Yoshua 7 - Baibuli Ekibono kya Katonda 2014

Ekibi Akyani kye yakola

¹ Musengwa Katonda yalagira Abaisiraeli okuzikiriza Yeriko n'ebikirimu byonabyona. Aye omusaadha eyayetebwanga Akyani tiyagondera kiragiro ekyo, yaatwala ku bintu ebyali biri n'okuzikirizibwa. Akyani ono yali mutabane wa Karumi era mwidhukulu wa Zabudi, era mwidhukulu wa Zera ow'ekika kya Yuda. Agho obusungu bwa Musengwa Katonda bwayakira ku Baisiraeli ng'oti muliro.

² Yoshua ng'akaali e Yeriko yatuma abasaadha baje e Ayi, ekyali okumpi n'ekibuga Bethaveni e buvandhuba ow'e kibuga Betheli. Yaabakoba ati: “Muje mukeete ensi eyo.” Era abasaadha baaja baakeeta Ayi.

³ Bwe baira baakobera Yoshua bati: “Otadaaza bantu boonaboona kuja ere, kuba abantu abaliyo batono bati. Leka abantu ng'enkumi ibiri oba isatu n'ababe baje bakirumbe.”

⁴ Kale abantu ng'enkumi isatu (3,000) baava mu Baisiraeli baaja okulumba Ayi. Aye bale baabaiririza nga balumuka

⁵ era abasaadha ab'e Ayi abo baabingirira Abaisiraeli okuviira irala ku mulyango okubatuusa a Shebarimu. Abaisiraeli bwe baali nga baserengeta, bale baabaitamu abantu ng'asatu na mukaaga, era baawaamu amaani baatenha.

⁶ Agho Yoshua n'abakulu ab'ebikunsu mu Isiraeli baayuza ebivaalo byaibwe, beeyala wa mberi gh'Esanduuku y'Endagaano ya Musengwa Katonda, era beeyugha enkungu mu mitwe, baaba agho okutuusa eigulo. Ebyo byonabyona baabikola olw'okunakughala.

⁷ Yoshua yaasaba ati: “Wo Musengwa Katonda, iwe afuga abantu boonaboona, bwenebwene lwaki watusomosa Yorudani? Obwo bwene wayenda kutughaayo mu ngalo dh'Abamori batuzikirize? Ngoli twasigala ku luuyi kule okwa Yorudani tikyandisinze?

⁸ Musengwa Katonda, Abaisiraeli bakyuse baalumuka abazigu, tiidhi na kya kwogera

⁹ kuba Abakanaani n'abantu abandi boonaboona abali mu nsi eno baja kukiwulira, batuzingize batwite twenatwena. Olwo Musengwa Katonda olikola ki, eriina lyo eikologho okusigaza ekitiisa?”

¹⁰ Musengwa Katonda yaakoba Yoshua ati: “Situka! Weeyalira ki ghansi otyo?

¹¹ Abaisiraeli n'abaakola ekibi, baadheemera ekiragiro kye na balagira, baatwala ku bintu ebyali biri n'okuzikirizibwa. Baabiiba, baaguya bati byaibwe, era baabita ghalala n'ebyaibwe.

¹² Eyo n'ensonga lwaki buti tibasobola kulwanisa muzigu abalumbye. Bamulumuka bulumuke, kuba beene boona baafuuka ba kuzikiriza. Tikairayo kuba ku luuyi lwaimwe kabiri, okutoolaku nga muzikiriiza ebyo bye nabalagira okuzikiriza bye muli nabyo.

¹³ Situkiramu okobe abantu beetukuze era beetegeke okwidha ye ndi. Bakobe enkyo babe nga beetegeike, kuba nze Musengwa Katonda wa Isiraeli ndi kuja okubakoba nti, ‘Imwe Abaisiraeli, ghaligho ebintu bye muli nabyo bye nabalagira okuzikiriza. Buti timusobola kulwanisa muzigu abalumbye okutuusa nga mwetoiremu ebintu ebyo.’

¹⁴ Kale bakobe oti enkyo baidha kwesoloza ghalala, olwo abantu abali mu buli kika baire emberi, nga buli kika kiidha lwakyo ndidha kwoleka ekika ekirimu eyasobya. Abantu abali mu buli nda baidha kwidha emberi, nga buli nda eidha lwayo ndidha kwoleka enda erimu eyasobya. Abantu abali mu buli ndhu edhiri mu nda eyo, baidha kwidha emberi, nga buli ndhu eidha lwayo ndidha kwoleka endhu erimu eyasobya. “Abantu ab'endhu eyo baidha kwidha emberi, nga buli muntu aidha lulwe.

¹⁵ Ndidha kwoleka omuntu ali n'ebintu ebyo ebyali biri n'okuzikirizibwa. Omuntu oyo mwidha kumwokya n'ab'omu maka ge boonaboona, na kiisi kintu kyayeta ati kikye, kuba yakola bubi inho okudheemera ekiragiro kyange era n'okuswaza Isiraeli obwaga agho.”

¹⁶ Enkyo einho ku lunaku olwairirira, Yoshua yaayeta Abaisiraeli boonaboona ghalala. Yaayeta ebika, nga buli kika kiidha lwakyo emberi. Ekika ekya Yuda kyalondebwamu.

¹⁷ Mu kika ekyo yaayetamu enda edhirimu, nga buli ndala eidha lwayo emberi. Enda ya Zera yaalondebwamu. Mu nda ya Zera, yaayetamu endhu edhirimu, nga buli ndhu eidha lwayo emberi. Endhu ya Zabudi yaalondebwamu.

¹⁸ Mu ndhu ya Zabudi yaayetamu abasaadha abaalimu, nga buli musaadha aidha lulwe. Akyani mutabane wa Karumi, era mwidhukulu wa Zabudi yaalondebwamu.

¹⁹ Yoshua kyeyava naakoba Akyani ati: “Mwana wange, yogera amazima mu maiso ga Musengwa Katonda, Katonda wa Isiraeli weenenie. Nkobera kye wakola otakingisa.”

²⁰ Akyani yairamu ati: “Mu butuufu bwene nakola ekibi eri Musengwa Katonda wa Isiraeli era biti bwe byali:

²¹ mu bintu bye twanhaga nabonamu ekivaalo ekiboneka obulungi einho, nga kyakolebwa e Babilonia. Naabonamu ni kilo ng'oti ibiri edha feeza, n'ekitundu ekya kilo ekya zaabu, naabyegomba era naabitwala. Ebintu ebyo mwidha kubyagaana nga nabiziika mu weema yange, nga feeza n'eri ghansi.”

²² Kale Yoshua yaatuma abasaadha, baalumuka baaja mu weema baayagaana nga bwenebwene ebintu biziike omwo, nga feeza n'eri ghansi.

²³ Baabitoola mu weema baabitwalira Yoshua n'Abaisiraeli boonaboona, baabiisa agho ghansi mu maiso ga Musengwa Katonda.

²⁴ Yoshua n'Abaisiraeli abandi boonaboona baagema Akyani, ni feeza, n'ekivaalo, n'ekitundu kya zaabu era okwo kwe baateera ni batabane ba Akyani ni baghala be, n'ente, n'endogoyi, n'entaama, ni weema ye, na kiisi kintu kyonakyona ekikye. Baabatwala mu kyetebwa Ekiiko eky'Ebizibu.

²⁵ Bwe baatuuka eyo Yoshua yaakoba Akyani ati: “Lwaki watuleetaku obuzibu obwaga agho? Leka buti weena Musengwa Katonda akuleeteku obuzibu!” Agho abantu boonaboona baakuba Akyani amabaale yaafa. N'ab'omu maka ge boona baabakuba amabaale baafa, era baabookya n'ebyaibwe byonabyona.

²⁶ Bwe baamala, baamubungaku emungo ey'amabaale enkologho ekaaliyo ni ye buli eno. Era ekifo ekyo kyekiva kyetebwa Ekiiko eky'Ebizibu. Olwo Musengwa Katonda yaalekera agho okusungughala.