Yoshua 5 - Baibuli Ekibono kya Katonda 2014

¹ Bakyabazinga boonaboona Abamori abaali e buvandhuba wa Yorudani, ni bakyabazinga boonaboona Abakanaani ab'ebiketezo ebituuka ku Nhandha Eyaghagati, bwe baawulira nga Musengwa Katonda yakaliza Abaisiraeli omwiga Yorudani okutuusa bwe baamala okugusala nga mukalu, emyoyo gyabawaamu era boonaboona baawaamu amaani olw'okutya Abaisiraeli.

Okukeketa abasaadha Abaisiraeli okwali e Giligali

² Mu biseera ebyo Musengwa Katonda yaakoba Yoshua ati: “Kola obuntu obusala nga bwogi, okekete Abaisiraeli ababaire nga bakaali kukeketebwa okuva lwe mwava e Misiri.”

³ Kale Yoshua yaakola nga Musengwa Katonda bwe yamulagira, yaabakeketera e Gibeathi Haaralothi.

⁴ Musengwa Katonda yalagira abantu bakeketebwe kuba abasaadha boonaboona abaava mu Misiri nga batuusiiza emyaka egibasobozesa okutabaala, baafiira mu ngira mu irungu nga bamaze okuva mu Misiri.

⁵ Kale waire ng'abantu boonaboona baava mu Misiri nga bakekete, abaana abaazaalirwa mu ngira mu irungu oluvainhuma olw'okuvaayo, baali nga tibakeketebwanga

⁶ kuba Abaisiraeli baatambulira emyaka amakumi ana mu irungu okutuusa abasaadha boonaboona abaava mu Misiri nga batuusiiza emyaka egibasobozesa okutabaala bwe baafa ni bawaagho. Ekyo kyaligho kuba baadheemera Musengwa Katonda. Kale Musengwa Katonda yaaloba kubaganha kubona ku nsi ye yali amaze okusuubiza okugha badhaadha baibwe ensi engimu era erimu ebirungi kamaala.

⁷ Abaana b'abantu abo abaadheemera Katonda baali nga tibakeketebwanga, kuba tiyabaayo kukeketa nga bakaatambula. Kale n'abo Yoshua be yakeketa.

⁸ Abasaadha Abaisiraeli boonaboona bwe baamala okukeketebwa, baasigala mu kifo mwe baasimba weema dhaibwe okutuusa bwe baawona.

⁹ Musengwa Katonda yaakoba Yoshua ati: “Olwaleero mbatoireku eriina eibi ery'okwetebwanga abairu ab'Abamisiri.” Ekifo ekyo kwe kyava okwetebwa Giligali, eriina lye bakaakyeta ni ye buli eno.

¹⁰ Abaisiraeli bwe baali nga bakaagumbye agho e Giligali mu biketezo by'e Yeriko eby'omuseetwe, olw'eigulo baakola Ekibinuko eky'Okwidhukiriraku Okubitizibwa, ng'enaku edh'omwezi ikumi na ina.

¹¹ Olunaku olwairirira ng'Okubitizibwa kuweire, baalya ku birime eby'omu nsi eyo omukuzi ogusooka: emigaati egitazimbulukusiibwa, n'emere ey'empeke enkalange.

¹² Ku olwo mannu yaalekera okumagala, ng'olwo Abaisiraeli tibakaagifuna. Era okuva olwo n'okweyongerayo, nga balya mere eyalimwanga mu nsi eyo Kanaani.

Yoshua abona aduumira eigye lya Musengwa Katonda

¹³ Yoshua bweyali ng'akaali agho okumpi n'e Yeriko, yaja okulinga ati, ng'abona omusaadha ng'amwemereire mu maiso, era ng'agemye empiima. Yoshua yaaja y'ali, yaamubuuza ati: “Oli ku luuyi lwaife oba lwa bazigu baife?”

¹⁴ Omusaadha yaamwiramu ati: “Busa. Ndi ghano ng'aduumira eigye lya Musengwa Katonda.” Yoshua yeeyala ghansi, nga bw'amukoba ati: “Nze ndi mugheereza wo, ky'onankoba kye naakola.”

¹⁵ Ole aduumira eigye lya Musengwa Katonda yaakoba Yoshua ati: “Toolamu engaito, kuba ghano gh'oli, oli mu kifo kitukuvu.” Yoshua yaatoolamu engaito.