Yoshua 4 - Baibuli Ekibono kya Katonda 2014

Amabaale ge baataagho ng'ekiidhukizo

¹ Abaisiraeli boonaboona bwe baamala okusomoka Yorudani, Musengwa Katonda yaakoba Yoshua ati:

² “Mulonde abantu ikumi na babiri, nga mu buli kika mulondamu omuntu mulala.

³ Mubakobe baje mu kifo gheene bakabona ghe babaire beemereire, batoolegho amabaale ikumi n'abiri muje nago, bagate mu kifo ghe muja okusula obwire bwaleero.”

⁴ Agho Yoshua yaayeta abantu eikumi n'ababiri be yali amaze okulonda, yaabakoba ati:

⁵ “Muje mu mwiga Yorudani, mubite ku Sanduuku y'Endagaano ya Musengwa Katonda waimwe, buli muntu abbeede eibaale ku ibega ku lw'ekika kye.

⁶ Amabaale ago gaidha kubabeeranga kamanhiso, abaana baimwe bwe bali buuzanga eyo mu biseera ebiidha bati, ‘Okuta ghano amabaale gano mwali mutegeeza ki.’

⁷ Nga mubakobera muti, ‘Amaadhi ag'omwiga Yorudani gaalekera agho okutambula, Sanduuku y'Endagaano bweyali ng'eri kusala omwiga ogwo.’ Kale amabaale ago ganaabanga kiidhukizo eri abantu Abaisiraeli ebyanda n'ebyanda.”

⁸ Abaisiraeli baakola byonabyona Yoshua bye yabalagira era nga Musengwa Katonda bwe yamulagira. Baabbeeda amabaale ikumi n'abiri ng'ebika byaibwe bwe byali, baagatoola ghagati mu mwiga Yorudani, baaja nago okugatuusa mu kifo ghe baasula obwire obwo, baagaisa agho.

⁹ Yoshua era yaaja ghagati mu mwiga Yorudani, mu kifo bakabona ghe baayemerera nga babbeedie Sanduuku y'Endagaano, yaasimbagho amabaale ikumi n'abiri amabaale ago gakaaligho ni ye buli eno.

¹⁰ Bakabona abaabbeeda Sanduuku y'Endagaano baayemerera ghagati mu mwiga Yorudani okutuusa nga buli kintu Musengwa Katonda kye yalagira Yoshua okukoba abantu ng'abita mu Musa, kiwoire. Abantu baayangugha okusala omwiga Yorudani

¹¹ era boonaboona bwe baamala okusala, bakabona ababbeedie Sanduuku y'Endagaano baakulemberamu abantu.

¹² Abasaadha ab'ekika kya Reubeni, n'ab'ekika kya Gadi, n'ekitundu eky'ab'ekika kya Manasse n'abaasala omwiga okusooka nga bakulembeiremu abantu abandi boonaboona, era nga beetegefu okulwana, nga Musa bwe yabakoba.

¹³ Bano baali baghera emitwalo ng'ena (40,000), nga beetegekeire bukalamu olutalo. Agho baasala omwiga nga Musengwa Katonda ali nabo, bangira ekiketezo ky'e Yeriko eky'omuseetwe.

¹⁴ Ku lunaku olwo, Musengwa Katonda yayoleka Abaisiraeli boonaboona nga Yoshua bweyali n'ekitiisa ekya ghaigulu, era okuva n'olwo baamutya enaku dhoonadhoona edh'obulamu bwe, ng'oti ni bwe baatyanga Musa.

¹⁵ Agho Musengwa Katonda yaakoba Yoshua

¹⁶ ati: “Lagira bakabona ababbeedie Sanduuku y'Endagaano bave mu Yorudani.”

¹⁷ Kale Yoshua yaalagira bakabona baava mu mwiga.

¹⁸ Era bakabona nga babbeedie Sanduuku y'Endagaano olwava mu mwiga, ebigere byaibwe ni biniina ku bukalu biti, amaadhi gairagho mu kifo kyago era gaabanda n'okubanda nga bwe gaali ng'ebyo bikaali kubaagho.

¹⁹ Olunaku Abaisiraeli lwe baasomokeraku Yorudani lwali lwa ikumi olw'omwezi ogusooka, era baaja baasimba weema dhaibwe e Giligali ekiri e buvandhuba wa Yeriko.

²⁰ Era agho Yoshua ghe yasimba amabaale eikumi n'abiri ge baatoola mu Yorudani.

²¹ Agho yaakoba Abaisiraeli ati: “Eyo mu biseera ebiidha abaana baimwe bwe balibabuuzanga amabaale gano kye gategeeza,

²² muli bakoberanga muti, ‘Isiraeli yasomoka Yorudani ku itaka eikalu.’

²³ Kuba Musengwa Katonda waimwe yabakaliza amaadhi mu mwiga Yorudani okutuusa bwe mwagusala, era ng'oti ni bwe yakola Enhandha Emyufu ye yatukaliza okutuusa bwe twamala okugisala.

²⁴ Olw'ekyo abantu boonaboona ku nsi baidhanga kumanha, nga Musengwa Katonda wa bukumu obutaloodheka, era mwena mwidha kutyanga Musengwa Katonda waimwe oyo ebyanda n'ebyanda.”