Yoshua 3 - Baibuli Ekibono kya Katonda 2014

Abaisiraeli basomoka omwiga Yorudani

¹ Enkeera Yoshua n'Abaisiraeli boonaboona, baawuuna baava e Shittimu ghe baali basimbye weema dhaibwe, baaja baagumba ku mwiga Yorudani nga bateegerera okusomoka.

² Nga bamazeeyo enaku isatu, abakulembeze ab'abantu mu Isiraeli baabitabita mu bantu eyo mu weema dhaibwe nga babakoba bati:

³ “Bwe mubona bakabona nga babbeeda Esanduuku y'Endagaano ya Musengwa Katonda waimwe, musansula weema dhaimwe mwaginonereza.

⁴ Agho mwidha kumanha ghe muja okubita, kuba mubaire timubitangaku eno. Aye mutaseeta kumpi na Sanduuku ya Ndagaano eyo, mulekeghooku eibanga nga lya kilomita namba.”

⁵ Yoshua yaakoba abantu ati: “Mwetegeke, mwetukuze, kuba enkyo Musengwa Katonda aja kukola ekyewuunhio ekikologho nga tubona.”

⁶ Era yaakoba bakabona ati: “Mubbeede Sanduuku y'Endagaano, mukulemberemu abantu.” Era boona baabbeeda Sanduuku y'Endagaano baakulemberamu, abantu baabanonereza.

⁷ Musengwa Katonda yaakoba Yoshua ati: “Ku lunaku luno nja kwoleka Abaisiraeli boonaboona nga bw'oli n'ekitiisa ekya ghaigulu. Baidha kumanha nga ndidha kubanga n'iwe, nga bwe nalinga ni Musa.

⁸ Era koba bakabona ababbeedie Sanduuku y'Endagaano oti, ‘Bwe muba mwakangira muti mu mwiga Yorudani, mwemerere.’ ”

⁹ Agho Yoshua yaakoba abantu ati: “Mwenamwena mwidhe ghano muwulire ebibono bya Musengwa Katonda waimwe.

¹⁰ Bwe munaaja nga mweyongerayo emberi, mwidha kumanha nga Katonda oyo omulamu ali n'imwe, kuba aidha kuja ng'abingagho Abakanaani, Abahitti, Abahivi, Abaperizzi, Abagirigashi, Abamori n'Abayebusi.

¹¹ “Mubone, Sanduuku y'Endagaano ya Musengwa Katonda afuga ensi yoonayoona, eidha kubakulemberamu okutuuka mu Yorudani.

¹² Buti mu bika byaimwe Abaisiraeli mwerondemu abantu ikumi na babiri: nga buli kika mulondamu omuntu mulala mulala.

¹³ Bakabona ababbeedie Sanduuku y'Endagaano eyo bwebanaaniina ebigere byaibwe mu mwiga Yorudani, amaadhi gaidha kulekera agho okutambula, agabaire nga gava eitale gaidha kwebunga mu kifo kirala.”

^14-15 Ebiseera Abaisiraeli bye baaviiramu ghe baali basimbye weema dhaibwe, ni baja okusomoka Yorudani, byali bya makungula. Ebiseera ebyo omwiga Yorudani gwidhula gwabanda. Agho bakabona abaali babbeedie Sanduuku y'Endagaano nga bakulembereiremu abantu boonaboona, olwaniina ebigere byaibwe mu mwiga,

¹⁶ amaadhi gaalekera okutambula, geebunga kumpi n'ekibuga Adamu ekiriiraine ekibuga Zarethani. Amaadhi agaali gaserengeta nga gaja mu Nhandha Eyomuunhu gaalekera agho, abantu baasobola okusomoka nga boolekeire Yeriko.

¹⁷ Abaisiraeli boonaboona baasomoka Yorudani nga batambulira ku itaka ikalu, ng'olwo bakabona beemereire ghagati mu mwiga era boona ku itaka ikalu, nga babbeedie Sanduuku y'Endagaano. Bakabona abo baasigala nga beemereire agho okutuusa abantu boonaboona bwe baamala okusomoka.