Yoshua 24 - Baibuli Ekibono kya Katonda 2014

Endagaano ey'e Shekemu

¹ Agho Yoshua yaayeta ebika eby'Abaisiraeli byonabyona byesololeza e Shekemu. Yaaja ng'ayeta abakulu ab'ebika, abakulu ab'ebikunsu, n'abakulembeze mu Isiraeli, baidha baayemerera aghali Esanduuku ey'Endagaano ya Musengwa Katonda.

² Yoshua yaakoba abantu boonaboona ati: “Musengwa Katonda, Katonda wa Isiraeli akoba ati, ‘Eira, badhaadha baimwe, Tera lata wa Aburahamu ni Nahori, baabanga luuyi ere ng'osomoike omwiga Eufurate, era nga basinza bakatonda abandi.

³ Agho naatoola Aburahamu eyo ye yali ng'osomoike omwiga Eufurate, naamubisa mu kiketezo eky'e Kanaani kyonakyona, naamugha Isaaka n'abaidhukulu kamaala.

⁴ Isaaka naamugha Yakobo ni Esau. Esau naamugha ensi ey'ensozi Edomu nga n'obutaka bwe. Aye dhaadha waimwe Yakobo n'abaana be, baaja e Misiri.

⁵ Nga ghabiseegho ekiseera naatuma Musa ni Aaroni, okubatoola mu Misiri, era naata ku Misiri obuzibu obutakobeka, naabatoolayo.

⁶ Badhaadha baimwe abo bwe nabatoola mu Misiri ni batuuka ku Nhandha Emyufu, Abamisiri baababingirira n'ebigaali eby'omu lutalo, ghalala n'abalwani ab'oku mbalaasi.

⁷ Badhaadha baimwe bwe baatuuka ku Nhandha Emyufu bandirira mbabeere. Agho naaleetagho enzikiiza ghagati ghaibwe n'Abamisiri, era naalagira enhandha okubayoolookeraku era ebasandikire. Mwidhi bukalamu kye nakola Abamisiri. “ ‘Imwe mwaba mu irungu okumala entangama ndeeyi

⁸ memale olwo naabatuusa mu kiketezo eky'Abamori abaabanga ku luuyi olw'e buvandhuba olwa Yorudani. Bano baabalwanisa aye naagha imwe obughanguzi, naabazikiriza era mwatwala ekiketezo kyaibwe.

⁹ Kyabazinga w'e Moabu ye baayetanga Balaki mutabane wa Zippori, yeena yabalwanisa era yaayeta Balaamu mutabane wa Beori abakolimire.

¹⁰ Aye nze naaloba kumuganha kukikola, mu kifo ky'ekyo naamuleetera okubasabira enkabi, agho naaba nga mbawoniiza Balaki.

¹¹ Mwasomoka Yorudani mwatuuka e Yeriko, abasaadha ab'e Yeriko baabalwanisa nga kw'otaire n'Abamori, n'Abaperizzi, n'Abakanaani, n'Abahitti, n'Abagirigashi, n'Abahivi era n'Abayebusi. Aye naagha imwe obughanguzi mwababinga.

¹² Mwaja okubatuukaku nga mbaswiremu okutya n'okudhugumira, ekyaleetera bakyabazinga Abamori ababiri okulumuka embiro empiima dhaimwe n'obulaso bwaimwe ti n'ebyabaleetera okughangula.

¹³ Nabagha emisiri gye mutaasimba, era naabagha ebibuga bye mutaazimba, era buti mwe muli. Mulya emizabbibu n'ebibala eby'emiti emyoliva gye mutaasimba.’

¹⁴ “Mpegaano ni mutyenga Musengwa Katonda era mumugheerezenga n'omwoyo mulala nga muli beesigwa. Musuule ere bakatonda badhaadha baimwe be baagheerezanga nga bakaali eruuyi ere ng'osomoike omwiga era ni bwe baali nga bakaali e Misiri, mugheereze Musengwa Katonda yenka.

¹⁵ Aye oba nga timuli beetegefu kugheereza Musengwa Katonda, musalegho olwaleero luno ye munaagheerezanga: oba musalagho kugheereza bakatonda badhaadha baimwe be baasinzanga nga bakaali eruuyi ere ng'osomoike omwiga, oba bakatonda ab'Abamori abaali beene kiketezo kino buti ghe muli. Aye nze ku lwange n'ab'endhu yange twidha kugheerezanga Musengwa Katonda.”

¹⁶ Agho abantu bairamu bati: “Tituja kuleka Musengwa Katonda ni tugheereza bakatonda bandi.

¹⁷ Musengwa Katonda waife n'eyatoola badhaadha baife, n'ife beene, mu Misiri ye twalinga mu bwiru, era n'eyakola ebyewuunhisa ebikologho nga tubona. Yatukuumanga bukalamu eyo yoonayoona ye twabitanga, era yaatubisanga bukalamu mu maghanga goonagoona ge twabitamu.

¹⁸ Yabingangho Abamori abaabanga ghano. Kale twena twidha kugheerezanga Musengwa Katonda, kuba oyo ni Katonda waife.”

¹⁹ Aye Yoshua yaakoba abantu ati: “Timusobola kugheereza Musengwa Katonda, kuba oyo ni Katonda omutukuvu era Katonda ow'enkikidi. Taja kubasonigha kwonoona kwaimwe oba ebibi bye mukola.

²⁰ Bwe mumuvaaku ni mugheereza bakatonda ab'amaghanga agandi be basinza, aja kukyusa abakole bubi inho abazikirize, abe ng'oti tabangaku mulungi ye muli.”

²¹ Abantu baakoba Yoshua bati: “Busa, ife tuja kugheerezanga Musengwa Katonda.”

²² Yoshua yaabakoba ati: “Oba nga beene musazeegho okugheereza Musengwa Katonda, imwe beene niimwe abadhulizi b'ekyo kye musazeegho.” Abantu baamwiramu bati: “Yii, bwenebwene tuli badhulizi baakyo.”

²³ Yoshua yaabakoba ati: “Kale ni musuule ere emisambwa gye muli nagyo egisinzibwa abamaghanga agandi, era mweyame okubanga abeesigwa eri Musengwa Katonda, Katonda wa Isiraeli.”

²⁴ Abantu baakoba Yoshua bati: “Twidha kugheerezanga Musengwa Katonda waife, era twidha kugonderanga ebiragiro bye.”

²⁵ Kale ku lunaku olwo Yoshua yaakolera abantu endagaano e Shekemu, era yaabagha amateeka n'ebiragiro eby'okujiirangaku.

²⁶ Yoshua yaaghandiika ebiragiro bino mu kitabo eky'amateeka ga Katonda. Agho yaatoola eibaale eikologho yaalisimba ghansi agh'omuti omuvule mu kifo kya Musengwa Katonda ekitukuvu.

²⁷ Yaakoba abantu boonaboona ati: “Eibaale lino liidha kubanga mudhulizi, kuba liwuliire ebibono byonabyona Musengwa Katonda by'atukobye. Kale liidha kubanga mudhulizi abalumiriza okubalobera okudheemera Katonda waimwe.”

²⁸ Agho Yoshua yaasiibula abantu era buli muntu yairayo mu kiketezo kye.

Okufa kwa Yoshua n'okwa Eleazari

²⁹ Ebyo nga biwoire Yoshua mutabane wa Nuni era omugheereza wa Musengwa Katonda yaafa ng'agheziiza emyaka egy'obukulu kikumi na ikumi.

³⁰ Era baamuziika ghe yafuna ng'obutaka bwe e Timunathi Sera ekiri mu kiketezo eky'ensozi eky'Abaefuraimu, ku luuyi olw'omukono omugooda olw'e buvandhuba w'olusozi Gaashi.

³¹ Abaisiraeli baagheerezanga Musengwa Katonda ekiseera kyonakyona Yoshua kye yamala ng'ali kubakulembera, era n'ekiseera ekyairirira kye baamala nga bakulemberwa abakulu ab'ebikunsu Yoshua be yalekagho. Abakulu abo n'abaamanha ebyo byonabyona Musengwa Katonda bye yakolera Isiraeli.

³² Amagumba ga Yosefu, Abaisiraeli ge baidha nago okuva e Misiri, baagaziika e Shekemu mu itaka Yakobo lye yagula ku batabane ba Hamori lata wa Shekemu. Eitaka eryo yaligula ebitundu bya feeza kikumi, era lyafuuka obutaka obwa baidhukulu ba Yosefu.

³³ Mu biseera ebyo, Eleazari mutabane wa Aaroni yeena yaafa, era baamuziika kumpi n'ekibuga Gibea ekiri mu kiketezo eky'ensozi eky'Abaefuraimu, ekibuga ekyo nga kyagheebwa mutabane we Finehasi.