Yoshua 22 - Baibuli Ekibono kya Katonda 2014

Yoshua asiibula ab'e buvandhuba

¹ Agho Yoshua yaayeta ab'ekika eky'Abareubeni, n'eky'Abagadi, n'eky'Abamanasse ab'e buvandhuba, boonaboona baidha gh'ali.

² Yaabakoba ati: “Mukoze byonabyona Musa omugheereza wa Musengwa Katonda bye yabalagira, era mwagondera ebiragiro byange byonabyona.

³ Ekiseera kino kyonakyona mubaire mulwanira ghalala n'Abaisiraeli banaimwe nga timubaleka. Era nga mwegendereza okubona nga mugondera ebiragiro bya Musengwa Katonda waimwe.

⁴ Buti Musengwa Katonda oyo Katonda waimwe, aghaire Baisiraeli banaimwe abo emiraala nga bwe yabasuubiza. Kale, mwireyo mu maka gaimwe, mu kiketezo kye mwamala okutwala nga buti kyaimwe, e buvandhuba wa Yorudani, Musa omugheereza wa Musengwa Katonda kye yabagha.

⁵ Mwegenderezenga mulobe kuva ku mateeka n'ebiragiro Musa omugheereza wa Musengwa Katonda bye yabagha: okugonzanga Musengwa Katonda oyo Katonda waimwe okwebisanga nga mwene bw'ayenda okukuumanga ebiragiro bye obutamuvangaku era n'okumugheerezanga n'omwoyo omulala.”

⁶ Kale Yoshua yaabasabira enkabi yaabasiibula, era baaja ewaibwe mu maka gaibwe.

⁷ Ekitundu ku Bamanasse, Musa yali amaze okubagha obutaka bwaibwe e Bashani e buvandhuba wa Yorudani, ate ekitundu ekindi Yoshua yaakigha obutaka bwakyo e bugwandhuba wa Yorudani, ghalala n'ebika ebindi ebya Isiraeli. Era Yoshua bweyali asiibula abaali baja ewaibwe,

⁸ yabakoba ati: “Muli kwirayo mu maka gaimwe n'obukombe kamaala, n'ente kamaala, ni feeza, ni zaabu, n'ebyuma eby'ekikomo, n'ebyuma ebigumu einho, n'ebivaalo kamaala mugabane ni baganda baimwe ebyo bye mwanhaga ku bazigu baimwe.”

⁹ Kale batyo Abareubeni, n'Abagadi, n'ekitundu ku Bamanasse, baaleka ebika ebindi nga bikaali e Shilo mu Kanaani, bairayo ewaibwe e Gileadi mu kiketezo kye baafuna beene ng'obutaka bwaibwe, nga Musengwa Katonda bwe yalagira ng'abita mu Musa.

Alutaari ye baazimba kumpi ni Yorudani

¹⁰ Ab'ekika eky'Abareubeni, n'eky'Abagadi, n'eky'Abamanasse ab'e buvandhuba bwe baatuuka e Gelilothi, nga bakaali e bugwandhuba wa Yorudani, baazimba alutaari enkologho agho kumpi n'omwiga Yorudani.

¹¹ Abaisiraeli bale abandi baakoberwa bati: “Muwulire! Abareubeni, n'Abagadi, n'Abamanasse ab'e buvandhuba, baazimba alutaari e Gelilothi ku luuyi olwaife olwa Yorudani!”

¹² Abaisiraeli abo abandi bwe baakiwulira, boonaboona beesololeza e Shilo nga benda baje balwane n'ebika ebyo eby'e buvandhuba.

¹³ Aye nga bakaali, baasooka baatumayo Finehasi mutabane wa Eleazari kabona,

¹⁴ ghalala n'abantu abandi ikumi abakulu ab'ebika.

¹⁵ Baatuuka e Gileadi eri Abareubeni, n'Abagadi, n'ekitundu ku Bamanasse ab'e Buvandhuba.

¹⁶ Agho boonaboona baabakoba bati: “Tuli kwogera mu liina ly'abantu ba Musengwa Katonda boonaboona tuti, lwaki mukoze ekintu kino ekibi Katonda wa Isiraeli ky'atenda? Okuzimba alutaari eno kitegeeza muli kudheemera Musengwa Katonda, mwalekera agho okukola by'ayenda.

¹⁷ Aye mwidhukire ekibi kye twakola nga tuli e Peori, era mwidhukire Musengwa Katonda bwe yasindika mu bantu be endwaire embi ng'ekibonerezo. Endwaire eyo ekaatudaaza, imwe mudhuuba ng'ekyo kyali kitono?

¹⁸ Buti musazeegho obutakola nga Musengwa Katonda mwene bw'ayenda? Bwe musalagho okumudheemera olwaleero, enkyo aja kusungughalira Abaisiraeli twenatwena.

¹⁹ “Ekiketezo kyaimwe bwe kiba nga tiikirongoofu, nga timusobola kusinzizaamu Musengwa Katonda, mwidhe eno eri Weema ey'Okwagaananirangamu ni Musengwa Katonda. Mwidhe mufune eno ye tuli obutaka, aye mutadheemera Musengwa Katonda oba okutufuula twenatwena abadheemu nga muzimbayo alutaari eyindi ate nga eya Musengwa Katonda waife erigho.

²⁰ “Mwidhukire Akyani mutabane wa Zera eyaloba okugondera ekiragiro kya Musengwa Katonda, ng'aloba okuzikiriza ebyo bye baamukoba okuzikiriza Abaisiraeli boonaboona baabonerezebwa olw'ekyo. Akyani ti n'eyafa yenka olw'ekibi kye ekyo.”

Ebika eby'e buvandhuba biinhonhola lwaki byazimba alutaari

²¹ Agho Abareubeni, n'Abagadi, n'ekitundu ku Bamanasse, bairamu abakulu ab'ebika bire ebindi eby'e bugwandhuba bati:

²² “Ow'amaani ni Katonda! Oyo ni Musengwa Katonda! Aidhi lwaki twakola ekyo era twenda mwena mukimanhe. Bwe tuba nga twadheema era nga tituli beesigwa eri Musengwa Katonda, mutwite tulobe kwongera kuba balamu.

²³ Bwe tuba nga twadheemera Musengwa Katonda, ni twezimbira alutaari eyaife ku bwaife nga ya kwokerangaku misengo, oba okugheerangaku ebigheebwayo eby'emere ey'empeke, oba ebigheebwayo olw'okutabagana, leka Musengwa Katonda mwene atubonereze.

²⁴ Aye ekyo twakikola lwa kutya tuti tomanha ye bwidha eyo baidhukulu baimwe bwe baboola baidhukulu baife nga babakoba bati, ‘Imwe mwidhi ki ku Musengwa Katonda, Katonda wa Isiraeli?

²⁵ Yataagho Yorudani ng'ensalosalo ghagati ghaife n'imwe Abareubeni n'Abagadi ebya Musengwa Katonda waife ghazira ghe bibagemeraku.’ Olwo baidhukulu baimwe baaba nga balobera baidhukulu baife okusinza Musengwa Katonda.

²⁶ Tuzimba alutaari ti lwa kwokerangaku misengo oba okugheerangaku ebigheebwayo,

²⁷ aye ebe ng'akamanhiso okwoleka abantu baife n'abantu baimwe, n'okwoleka ense edhiritwiririra, nga bwenebwene bwe tusinza Musengwa Katonda era nga bwe tuja mu maiso ga Weema ye entukuvu okumugheereza ebigheebwayo ebyokebwa, n'emisengo, era n'okughaayo ebigheebwayo olw'okutabagana. Ekyo kyaligho olw'okulobera baidhukulu baimwe okukoba abaife bati ebya Musengwa Katonda ghazira ghe bibagemeraku.

²⁸ Ekyo n'ekyali ekidhuubo kyaife, tuti bweghabaagho atukoba ebibono ng'oti n'ebyo, oba abikoba baidhukulu baife mu biseera ebiidha, olwo tuliba nga tusobola okukoba tuti, ‘Bona! Badhaadha baife baazimba ekifaanana ng'oti alutaari ya Musengwa Katonda, aye nga ti kya kwokerangaku bigheebwayo oba kugheerangaku misengo, aye nga kamanhiso bumanhiso eri ife n'abantu baife, n'eri imwe n'abantu baimwe.’

²⁹ Ife titusobola naire okudheemera Musengwa Katonda, oba buti okukyuka ni tulekera okujiira ku by'akoba, ni tuzimba alutaari okwokerangaku ebigheebwayo, oba okugheerangaku emere ey'empeke, oba emisengo. Titusobola kuzimba alutaari yindi ate nga eya Musengwa Katonda waife eri agho gha mberi gha Weema ey'Okwagaananirangamu ni Musengwa Katonda.”

³⁰ Finehasi kabona n'abasaadha bale eikumi abakulu ab'ebika be yali nabo, bwe baawulira okwinhonhola okw'Abareubeni, n'Abagadi, n'Abamanasse ab'e buvandhuba, baikiriza.

³¹ Era Finehasi oyo mutabane wa Eleazari kabona yaabakoba ati: “Buti twidhi nga Musengwa Katonda ali n'ife, era olw'okuba timwamudheemera, ife Abaisiraeli twenatwena mutuwoniiza Musengwa Katonda oyo okutubonereza.”

³² Olwo Finehasi mutabane wa Eleazari kabona n'abakulu ab'ebika bale, baaleka Abareubeni n'Abagadi mu Gileadi, bairayo mu Kanaani y'Abaisiraeli, baabakobera nga bwe byali.

³³ Abaisiraeli baasangaala okuwulira ebyo bye baabakobera, baasaaka Katonda era n'eby'okulwana n'Abareubeni n'Abagadi, n'okuzikiriza ekiketezo ghe baasenga, baabivaaku.

³⁴ Abareubeni n'Abagadi baatuuma alutaari eriina “Budhulizi” nga bakoba bati alutaari eyo n'obudhulizi ye bali boonaboona, nga baikiriza nga Musengwa Katonda ni Katonda.