Yoshua 21 - Baibuli Ekibono kya Katonda 2014

Ebibuga ebyagheebwa Abalevi

¹ Agho abakulu ab'enda edh'Abalevi baidha aghali Eleazari kabona, ni Yoshua mutabane wa Nuni, n'abakulu ab'ebika byonabyona eby'Abaisiraeli,

² e Shilo mu kiketezo eky'Abakanaani. Baabakoba bati: “Musengwa Katonda ng'abita mu Musa yalagira ati tuli n'okugheebwa ebibuga mwe tube tubenga. Era tugheebwe n'ebiketezo ebibyezungulwire omuli eisubi, twayirengamu ebyayo byaife.”

³ Kale nga Musengwa Katonda bwe yalagira atyo, Abaisiraeli boonaboona baagha Abalevi ku bibuga byaibwe n'ebiketezo ebibyezungulwire omuli eisubi, olw'okwayirangamu.

⁴ Baidhukulu ba Aaroni kabona, ab'enda ya Kohathi, n'abaasooka okukubirwa akalulu baagheebwa ebibuga ikumi na bisatu okuva ku biketezo bino: ekya Yuda, n'ekya Simeoni, n'ekya Benjamini.

⁵ Abaasigalagho ku nda ya Kohathi, boona baakubirwa akalulu, baagheebwa ebibuga ikumi okuva ku biketezo bino: ekya Efuraimu, n'ekya Dani n'eky'Abamanasse ab'e bugwandhuba.

⁶ Era nga bakozesa akalulu, baagha baidhukulu ba Gereshoni ebibuga ikumi na bisatu okuva ku biketezo bino: ekya Issakari, n'ekya Asheri, n'ekya Nafutali, n'eky'Abamanasse ab'e buvandhuba.

⁷ Ab'enda ya Merari baagheebwa ebibuga ikumi na bibiri okuva ku biketezo bino: ekya Reubeni, n'ekya Gadi, n'ekya Zebuluni.

⁸ Batyo Abaisiraeli bwe baagha Abalevi ebibuga eby'okubangamu, n'ebiketezo ebibyezungulwire omuli eisubi ery'okwayirangamu. Ekyo baakikola nga bakuba bululu nga Musengwa Katonda bwe yalagira ng'abita mu Musa.

⁹ Gano n'amaina ag'ebibuga ebyatoolebwa ku biketezo: ekya Yuda n'ekya Simeoni. Ebibuga ebyo byagheebwa,

¹⁰ ab'ekika kya Levi, baidhukulu ba Aaroni ku nda ya Kohathi, kuba, ku abo akalulu kwe kaasooka okugwa.

¹¹ Baagheebwa ekibuga kya Araba, buti ekyetebwa Heburoni, ekiri mu kiketezo eky'ensozi ekya Yuda, era baabagheeraku n'ekiketezo ekikyezungulwire omuli eisubi ery'okwayirangamu. Araba oyo nga n'azaala Anaki.

¹² Aye ebyayiro ebyezungulwire ekibuga ekyo Heburoni n'ebyalo byakyo, byali nga byamala ira okugheebwa Kalebu mutabane wa Yefunne ng'omugabo gwe.

¹³ Heburoni ekyo n'ekindi ku bibuga ebyalondebwa okulumukirangamu ole aise omuntu nga tagendereire. Ku ekyo Abalevi baayongerezebwaku ebibuga bino: Libuna,

¹⁴ Yattiri, Eshitemoa,

¹⁵ Holoni, Debiri

¹⁶ Aini, Yutta, ni Bethi Shemeshi, nga ku byonabyona babagheeraku n'ebiketezo omwalinga eisubi ery'okwayirangamu. Bino byali ebibuga mwenda era nga n'ebyava ku biketezo bino: ekya Yuda n'ekya Simeoni.

¹⁷ Okuva ku kiketezo kya Benjamini baabaghaaku ebibuga bina, nga ni bino: Gibeoni, Geba,

¹⁸ Anathothi, ni Alumoni, nga babagheeraku n'ebiketezo omuli eisubi ery'okwayirangamu.

¹⁹ Woonawoona, bakabona baidhukulu ba Aaroni baagheebwa ebibuga ikumi na bisatu, ghalala n'ebiketezo byaku omuli eisubi ery'okwayirangamu.

²⁰ Abaasigalagho ku nda ya Kohathi era nga ba kika kya Levi, baagheebwa ku bibuga ebyatoolebwa ku Baefuraimu.

²¹ Baagheebwa ebibuga bina, nga ni bino: Shekemu, n'ebiketezo ebibyezungulwire omuli eisubi ery'okwayirangamu, nga kino kiba mu kiketezo eky'ensozi eky'Abaefuraimu, era nga n'ekindi ku bibuga ebyalondebwa okulumukirangamu ole aise omuntu nga tagendereire. Ebibuga ebindi byali nga ni bino: Gezeri,

²² Kibuzaimu, ni Bethi Horoni, aghalala n'ebiketezo ebibyezungulwire omuli eisubi ery'okwayirangamu.

²³ Era baagheebwa ebibuga bina nga bitoolebwa ku Badani, nga ni bino: Eliteke, Gibbethoni,

²⁴ Aiyaloni, ni Gathirimmoni, aghalala n'ebiketezo ebibyezungulwire omuli eisubi ery'okwayirangamu.

²⁵ Era baagheebwa ebibuga bibiri nga bitoolebwa ku Bamanasse ab'e bugwandhuba nga ni bino: Taanaki, ni Gathirimmoni, n'ebiketezo ebibyezungulwire omuli eisubi ery'okwayirangamu.

²⁶ Woonawoona, ab'enda ya Kohathi abo baafuna ebibuga ikumi, ghalala n'ebiketezo ebibyezungulwire omuli eisubi ery'okwayirangamu.

²⁷ Abalevi abandi abaagheebwa ebibuga, n'abo abaava mu nda ya Gereshoni, era bano baafuna ebibuga bibiri okuva ku kiketezo eky'Abamanasse ab'e buvandhuba nga ni bino: Golani eky'omu Bashani era nga n'ekirala ku ebyo ebyalondebwa okulumukirangamu ole aise omuntu nga tagendereire, ni Beeshitera, era n'ebiketezo ebibyezungulwire omuli eisubi ery'okwayirangamu.

²⁸ Era baafuna ebibuga bina okuva ku kiketezo eky'Abaissakari nga ni bino: Kishioni, Daberathi,

²⁹ Yaramuthi, ni Engannimu, era n'ebiketezo ebibyezungulwire omuli eisubi ery'okwayirangamu.

³⁰ Era baafuna ebibuga bina okuva ku kiketezo eky'Abasheri, nga ni bino: Mishali, Abudoni,

³¹ Helikathi, ni Rehobu, n'ebiketezo ebibyezungulwire omuli eisubi ery'okwayirangamu.

³² Era baafuna ebibuga bisatu okuva ku kiketezo eky'Abanafutali, nga ni bino: Kedeshi eky'omu Galilaaya era ekindi ku byalondebwa okulumukirangamu ole aise omuntu nga tagendereire, ni Hammothi Dori, ni Karitanu, n'ebiketezo ebibyezungulwire omuli eisubi ery'okwayirangamu.

³³ Woonawoona, enda ya Gereshoni yafuna ebibuga ikumi na bisatu n'ebiketezo ebibyezungulwire omuli eisubi ery'okwayirangamu.

³⁴ Abalevi abaasigalagho, ab'enda ya Merari, baafuna ebibuga bina okuva ku kiketezo eky'Abazebuluni, nga ni bino: Yokoneamu Karita,

³⁵ Dimuna, ni Nahalali, era n'ebiketezo ebibyezungulwire omuli eisubi ery'okwayirangamu.

³⁶ Era baafuna ebibuga bina okuva ku kiketezo eky'Abareubeni, nga ni bino: Bezeri, Yahazi,

³⁷ Kedemothi, ni Mefaathi, n'ebiketezo ebibyezungulwire omuli eisubi ery'okwayirangamu.

³⁸ Era baafuna ebibuga ebindi bina okuva ku kiketezo eky'Abagadi, nga ni bino: Ramothi eky'omu Gileadi, ekindi ku ebyo ebyalondebwa okulumukirangamu ole aise omuntu nga tagendereire, ni Mahanaimu,

³⁹ Heshiboni, ni Yazeri, n'ebiketezo ebibyezungulwire omuli eisubi ery'okwayirangamu.

⁴⁰ Woonawoona, ab'enda ya Merari baafuna ebibuga ikumi na bibiri.

⁴¹ Ku kiketezo kyonakyona Abaisiraeli kye baafuna, ebibuga amakumi ana na munaana byagheebwa Abalevi.

⁴² Ebibuga bino buli kirala nga kyezungulwirwa ekiketezo omuli eisubi ery'okwayirangamu.

Abaisiraeli batyama mu kiketezo Musengwa Katonda kye yabagha

⁴³ Kale Musengwa Katonda yaagha Abaisiraeli ekiketezo kyonakyona kye yasuubiza okugha badhaadha baibwe. Era bwe baakifuna baakityamamu baatereera.

⁴⁴ Musengwa Katonda yaabagha emiraala woonawoona mu kiketezo ekyo, era nga bwe yasuubiza badhaadha baibwe. Ku bazigu baibwe nga ghazira waire mulala ati asobola okubeegezaamu, kuba Musengwa Katonda ng'asobozesa Abaisiraeli okughangula abazigu baibwe abo boonaboona.

⁴⁵ Musengwa Katonda yaatuukiriza kiisi kyonakyona kye yasuubiza okukolera Abaisiraeli.