Yoshua 20 - Baibuli Ekibono kya Katonda 2014

Ebibuga omuntu mw'asobola okulumukira

¹ Agho Musengwa Katonda yaakoba Yoshua ati:

² “Koba abantu Abaisiraeli oti, ‘Mulondegho ebibuga ole aise omuntu nga tagendereire mw'asobola okulumukira, nga bwe nakoba Musa abakobere.

³ Ole aise omuntu nga tagendereire asobola okulumukira omwo yaawona mwene muntu oyo, aba ng'ali kumwagala olw'okwenda okwesasuuza.

⁴ Omuntu oyo aghanga okulumukira mu kindi ku bibuga ebyo, era bw'atuuka eyo ali n'okuja aghasalirwa emisango, agho ku luya ku mulyango ogw'ekibuga, yainhonhola abataka abakulu ab'ekibuga ekyo byonabyona nga bwe byali. Bw'amala nga bamungiza mu kibuga nga bamugha agh'okubanga.

⁵ Mwene muntu y'aise bw'amunonerezanga ng'ali kwenda okwesasuuza, n'atuuka mu kibuga omwo, ab'omu kibuga omwo tibamumughanga. Bateekwa okumukuuma kuba yaita omuntu aye nga tagendereire.

⁶ Era abanga mu kibuga omwo okutuusa ng'amaze okusalirwa omusango, ng'abantu beesoloiza, era n'okutuusa ng'Omukulu wa Bakabona aligho mu kiseera ekyo amaze okufa. Olwo omuntu oyo yaaghanga okwirayo mu maka ge mu kibuga eky'ewaibwe ye yava.’ ”

⁷ Kale e bugwandhuba wa Yorudani baalondayo Kedeshi eky'e Galilaaya, mu kiketezo eky'ensozi ekya Nafutali ate mu kiketezo eky'ensozi ekya Efuraimu baalondayo Shekemu. Mu kiketezo eky'ensozi ekya Yuda baalondayo Kiriathi Araba, ekyo nga ni Heburoni.

⁸ E buvandhuba wa Yorudani mu museetwe ogw'eirungu, era eyo nga n'e buvandhuba wa Yeriko, baalondayo Bezera mu kiketezo ekya Reubeni. Mu Gileadi baalondayo Ramothi eky'omu kika kya Gadi. Mu Bashani ekiketezo kya Manasse baalondayo Golani.

⁹ Ebyo nga n'ebibuga omuntu mw'asobola okulumukira, ebyalondebwa olw'abantu boonaboona Abaisiraeli era n'olw'omuntu omusenze yeenayeena, kasita yabanga ng'aba mu Isiraeli. Ole yeenayeena eyaitanga omuntu aye nga tagendereire, ng'aghanga okulumukira mu kindi ku bibuga ebyo era yaawona mwene muntu y'aise. Era nga taitibwa okutoolaku ng'amaze okusalirwa omusango ng'abantu beesoloiza.