Yoshua 2 - Baibuli Ekibono kya Katonda 2014

Yoshua atuma abakeesi mu kibuga Yeriko

¹ Agho Yoshua yaatuma abantu babiri nga baviira agho e Shittimu ghe baali basimbye weema dhaibwe, baje babone mu nkweko ensi Kanaani bw'efaanana, n'okusingira irala ekibuga Yeriko, baire bamukobere. Bwe baatuuka mu kibuga, baaja okusula mu ndhu ya malaaya ye baayetanga Rahabu.

² Aye ghaabaagho abaaja ni bakobera omukulu w'ekibuga Yeriko bati: “Ghaligho Abaisiraeli abaidhie eigulo lino okukeeta ensi yaife.”

³ Kale omukulu w'ekibuga oyo yaatumira Rahabu ng'amukoba ati: “Abasaadha ababiri abaidhie ewuwo, baidhie kukeeta nsi yaife eno yoonayoona. Kale bampeereze.”

^4-6 Rahabu yaamwiramu ati: “Kituufu ghaligho abasaadha abaidhie ghano, aye timanhie ye baviire. Era baizeeyo agho ng'endhuba eri kugwa, ng'omulyango ogw'ekibuga gukaali kwigalwa. Titegeire ye babaire bali kuja, aye bwe mubalumuukirira musobola okubaagaana mwabagema.” Agho yali amaze okubatwala ghaigulu ku ndhu ye, era ng'abagisiiza mu mmungo edh'obuti dhe yali amaze okutegeka obukalamu. Obuti obwo n'omwavanga wuuzi dhe baalukangamu engoye empegheevu.

⁷ Kale abasaadha abaava ew'omukulu w'ekibuga baafuluma okuva mu kibuga, era olwafuluma bati omulyango ogw'ekibuga gwaigalwa. Baaja nga baagala abakeesi Abaisiraeli okutuukiza irala mu kifo omwiga Yorudani ghe gusomokerwa.

Abakeesi baasuubiza Rahabu

⁸ Ng'abakeesi Abaisiraeli bakaali kutenduka waire okulambaala, Rahabu yaajaayo ye baali ghaigulu ku ndhu.

⁹ Yaabakoba ati: “Ndidhi nga Musengwa Katonda yabagha ensi eno era twenatwena tubatya emyoyo gyaife gyatweghanika ira.

¹⁰ Kuba twawulira nga Musengwa Katonda yakaliiza Enhandha Emyufu bwe mwagituukaku nga muva e Misiri. Era twawulira bye mwakola bakyabazinga Abamori abaali e buvandhuba ew'omwiga Yorudani: Sihoni ni Ogi be mwazikiriza.

¹¹ Bwe twawulira ekintu ekyo twatya inho era twawaamu n'amaani olwaimwe, kuba twidhi nga Musengwa Katonda waimwe, ni Katonda ow'eigulu ghaigulu era ow'ensi ghansi.

¹² Agho ni mundayirire mu liina lya Musengwa Katonda oyo muti mulibisa bukalamu, ab'endhu ya lata wange, ng'oti ninze bwembabisiisa obukalamu. Era mbasaba mumpe akamanhiso akakakafu.

¹³ Muwonie obulamu bwa lata ni maama, n'obwa baganda bange ni baanhinaze, n'obw'abantu baibwe boonaboona be bali nabo. Mutuwonie okwitibwa.”

¹⁴ Abakeesi baamukoba bati: “Musengwa Katonda atwalanga obulamu bwaife bwemufanga. Bw'otalikoberaku bandi ku bye tuli kukola, twidha kuba beesigwa y'oli era tukubise bukalamu, nga Musengwa Katonda atughaire ensi eno.”

¹⁵ Endhu Rahabu ye yasulangamu yali ku mbali kwa kibuga, era ng'oluuyi lwayo olundi lwayungibwa ku kimante ekyezungululanga ekibuga. Kale ku luuyi lwene olwo kwe yabaikiza ku mugugha ng'ababisa mu dinisa.

¹⁶ Yaabakoba ati: “Musooke muje mu nsozi mwegiseeku eyo enaku isatu, abasaadha b'omukulu w'ekibuga balobe kubabona. Olumaliira bwe baliba baize muliirayo mu idembe.”

¹⁷ Ng'akaali kubaisa, abakeesi baamukoba bati: “Titwidha kuloba kutuukiriza ebyo by'otulayiiza.

¹⁸ Era ka tukugalagire ky'olikola: bwe tulingira mu nsi yaimwe, osibanga akawuuzi kano ak'olugoye lw'erangi ya kasaayisaayi mu dinisa eno y'oja okutwikizaamu. Era osololezanga ghano lata wo, n'inhoko, ni baanhoko, n'abantu boonaboona ab'omu ndhu ya lata wo, mwaba ghalala mu ndhu yo.

¹⁹ Omuntu yeenayeena alifuluma okuva mu ndhu yo n'aitirwa eyo mu nguudo edh'ekibuga, omusango guliba gugwe ti gwaife, aye ye baligemaku ng'ali mu ndhu yo muno, ogwo omusango guliba gwaife.

²⁰ Aye bye tuli kukola bw'olibikobera abantu, agho ghaliba ghazira kiritukaka kukuuma kirayiro ky'otulayiiza.”

²¹ Agho yaabakoba ati: “Ndidha kukola nga bwe munkobye.” Yaabasiibula baaja. Era nga bamaze okuja, yaasiba akawuuzi kale ak'olugoye lw'erangi ya kasaayisaayi mu dinisa.

²² Agho abakeesi baaja mu nsozi, baamalayo enaku isatu okutuusa abasaadha b'omukulu w'ekibuga bwe bairayo mu kibuga, nga babanooniiza mu ngira mwonamwona baaloba kubabona.

²³ Olwo abakeesi bombi baava mu nsozi, baasomoka Yorudani, bairayo ye Yoshua baamukobera byonabyona bye baabitamu.

²⁴ Era baakakasa Yoshua bati: “Bwenebwene Musengwa Katonda yatugha ensi ere yoonayoona. Abantu baayo boonaboona emyoyo gyabeeghanika ira bwe baawulira nga tuli kubajiira.”