Yoshua 18 - Baibuli Ekibono kya Katonda 2014

Engabania ey'ekiketezo ekyasigalagho

¹ Abaisiraeli bwe baamala okughangula ekiketezo kyonakyona Katonda kye yabagha, beesololeza e Shilo boonaboona, era nga bali eyo baasimba Weema ey'Okwagaananirangamu ni Musengwa Katonda.

² Ghaali nga ghakaaligho ebika musanvu eby'Abaisiraeli ebyali bikaali kugheebwa migabo gyabyo egy'obutaka.

³ Kale Yoshua yaakoba Abaisiraeli ati: “Muja kumala kiseera kyaga gha nga muteegerera, memale mutoole ekiketezo Musengwa Katonda, Katonda wa badhaadha baimwe kye yabagha?

⁴ Mwerondemu abantu basatubasatu okuva mu buli kika. Abantu abo ndidha kubatuma baje bakebere bukalamu nga baghandiika ebifa ku kiketezo kye mwenda okutwala ng'obutaka bwaimwe memale baidhe bankobere.

⁵ Olumaliira baidha kukigabaniamu ebitundu musanvu: Abayuda baidha kusigala nga bakaali mu kiketezo kyaibwe ekiri ku luuyi olw'omukono omusaadha olw'e bugwandhuba, ate ab'enda ya Yosefu boona basigale mu kyaibwe ku luuyi olw'omugooda era olw'e buvandhuba.

⁶ Baidha kundeetera ebighandiiko ebiinhonhola ebitundu ebyo omusanvu, nze mbakubire obululu ghano mu maiso ga Musengwa Katonda waife.

⁷ Abalevi bazira mugabo mu imwe, kuba omugabo gwaibwe kugheereza Musengwa Katonda nga bakabona. Ate Abagadi, n'Abareubeni, n'Abamanasse ab'e buvandhuba, baamala ira okufuna emigabo gyaibwe e buvandhuba wa Yorudani, Musa omugheereza wa Musengwa Katonda gye yabagha.”

⁸ Kale abasaadha abo be baalonda baatoolera olugendo lwaibwe okuja okughandiika Yoshua bye yabakoba. Yoshua era yaabakoba ati: “Muje mukebere bukalamu nga mughandiika ebifa ku kiketezo ekyo, memale mwidhe munkobere. Nze ndidha kubakubira obululu mu maiso ga Musengwa Katonda ghano e Shilo.”

⁹ Kale abasaadha abo baaja, baakebera bukalamu nga baghandiika ebifa ku bitundu omusanvu eby'ekiketezo ekyo nga kiisi kibuga bakiinhonhola lwakyo. Bwe baamala bairayo ye Yoshua ye baasimba weema dhaibwe e Shilo.

¹⁰ Yoshua yaabakubira obululu mu maiso ga Musengwa Katonda agho e Shilo. Yaagabira ebika omusanvu eby'Abaisiraeli ebyali bisigaire, ekiketezo ekyo.

Ekiketezo ekyagheebwa Ababenjamini

¹¹ Ekiketezo ekyasooka okukubwaku akalulu kyali ghagati gh'ekiketezo eky'Abayuda n'eky'Abayosefu. Era akalulu kaagwa ku Babenjamini ng'enda dhaibwe bwe dhaali.

¹² Ensalosalo yaakyo ng'eva ku luuyi olw'omukono omugooda olwa Yorudani olw'e buvandhuba, yaaja yaatuuka ku lusozi Yeriko oluli ku luuyi lwene olwo, yaaniinaniina mu nsozi edhiri e bugwandhuba, yaakoma ku irungu ery'e Bethaveni.

¹³ Yaava agho ku luuyi olw'omukono omusaadha ng'olingiriire e buvandhuba yaatuuka ku kibuga Luzi, ekyo nga ni Betheli, agho yaaserengeta yaatuuka ku kibuga Atarothi Addari ekiri ku lusozi oluli ku luuyi lwene olwo olw'ekibuga Bethi Horoni Ekyeifo.

¹⁴ Agho ensalosalo yaakyusa ku luuyi olundi yaasimbira e bugwandhuba, ku lusozi oluli ku luuyi olw'omukono omusaadha olw'e buvandhuba, olulingagaine ni Bethi Horoni, era yaakoma e Kiriathi Baali ekyo nga ni Kiriathi Yearimu ekibuga eky'Abayuda. Eyo n'eyali ensalosalo ey'e bugwandhuba.

¹⁵ Ensalosalo ey'oku luuyi lwene olwo, ng'eva mu mbali omw'ekibuga Kiriathi Yearimu, yaaja yaatuuka ku Efuroni ku kaiga ak'Amaadhi ga Nefutoa.

¹⁶ Agho yaaserengeta yaatuuka ghansi gh'olusozi olulingiriire ekiiko kya mutabane wa Hinnomu ekiri aghakoma ekiiko ky'Abarefa, ku luuyi olw'omukono omugooda olw'e buvandhuba. Era yaava agho yaika mu kiiko kya Hinnomu ekyo, ku luuyi olw'omukono omusaadha olw'e buvandhuba mu mbali mw'olusozi olw'Abayebusi, kabiri yaaserengeta okutuuka ku kibuga Enirogeli.

¹⁷ Agho yaakyuka yaasimbira ku luuyi olw'omukono omugooda olw'e buvandhuba, yaaja yaatuuka ku kibuga Enishemeshi, era yeeyongerayo okutuuka e Gelilothi ekiringagaine n'olusozi Adummimu, olwo yaaserengeta ku ibaale lya Bohani mutabane wa Reubeni

¹⁸ yaalibitaku ku luuyi lwene olwo olw'olusozi Bethi Araba, yaika okutuuka ku kiiko ekirimu omwiga Yorudani.

¹⁹ Yeeyongerayo ng'ebitira ku luuyi lwene olwo olw'olusozi Bethi Hogula, era yaakoma ku kikono eky'Enhandha Eyomuunhu ekiri ku luuyi lwene olwo olwa Yorudani, ghe gufukira mu nhandha eyo. Eyo nga n'ensalosalo ey'oku luuyi olw'omukono omusaadha olw'e buvandhuba ey'ekiketezo ekyo.

²⁰ Omwiga Yorudani nga n'ogukola ensalosalo ey'ekiketezo ekyo e buvandhuba. Edho dhoonadhoona n'ensalosalo edh'ekiketezo ekyagheebwa ekika eky'Ababenjamini, ng'enda dhaibwe bwe dhaali.

²¹ Ebibuga ghalala n'ebyalo byaku ebyagheebwa ekika eky'Ababenjamini nga bajiira ku nda dhaibwe byali nga ni bino: Yeriko, Bethi Hogula. Emeki Kezizi,

²² Bethi Araba, Zemaraimu, Betheli,

²³ Avvimu, Para, Ofura,

²⁴ Kefarammoni, Ofuni, ni Geba. Ebyo nga n'ebibuga eikumi n'ebibiri n'ebyalo byaku.

²⁵ Ghaabaagho ekiketezo ekindi kye baabagha ekyalimu ebibuga bino: Gibeoni, Rama, Beerothi,

²⁶ Mizipa, Kefira, Moza,

²⁷ Rekemu, Irupeela, Tarala,

²⁸ Zela, Haelefu, Yebusi, ekyo nga ni Yerusalemu, Gibea, ni Kiriathi Yearimu. Ebyo nga n'ebibuga eikumi n'ebina (14) n'ebyalo byaku. Ebyo byonabyona nga n'omugabo ogwagheebwa ekika eky'Ababenjamini ng'enda dhaibwe bwe dhaali.