Yoshua 17 - Baibuli Ekibono kya Katonda 2014

Abamanasse e bugwandhuba

¹ Abandi ku baidhukulu ba Yosefu nga bava mu mutabane we omukulu Manasse, baagheebwa ekiketezo e bugwandhuba ew'omwiga Yorudani kibe obutaka bwaibwe. Makiri, lata wa Gileadi, n'eyali mutabane wa Manasse omukulu era yaaba omulwani omumanhifu einho. Kyeyava n'agheebwa Gileadi ni Bashani ebiri e buvandhuba wa Yorudani.

² Enda edhindi edha baidhukulu ba Manasse mutabane wa Yosefu, dhaagheebwa emigabo gyadho e bugwandhuba wa Yorudani. Enda edho dhaali nga dhikulirwa abaana ab'abalenzi bano: Abiezeri, Heleki, Asirieli, Shekemu, Heferi ni Shenida.

³ Mu baidhukulu ba Makiri mutabane wa Manasse omukulu, n'omwali omusaadha ye baayetanga Zelofehadi mutabane wa Heferi era nga mwidhukulu wa Gileadi mutabane wa Makiri. Zelofehadi ono yazaala baghala beereere nga muzira mulenzi era nga babeeta: Mahala, Noa, Hogula, Milika ni Tiruza.

⁴ Bano beesitula baaja ye Eleazari kabona, ni Yoshua mutabane wa Nuni, n'abakulu ab'ebikunsu, baabakoba bati: “Musengwa Katonda yalagira Musa okutugha twena emigabo ng'oti ni Bamanasse banaife abasaadha.” Kale nga Musengwa Katonda bwe yalagira baagheebwa emigabo ng'oti ni Bamanasse banaibwe abasaadha.

⁵ Eno n'ensonga lwaki Abamanasse baafuna emigabo ikumi okwongereza ku kiketezo eky'e Gileadi n'eky'e Bashani, ebiri ku luuyi olw'e buvandhuba olwa Yorudani.

⁶ Kuba abaghala abo baafuna emigabo okwongereza ku b'ekika ekyo abasaadha gye baafuna. Ekiketezo kya Gileadi kyagheebwa Abamanasse abandi abaasigalagho.

⁷ Ekiketezo ekyagheebwa Abamanasse nga kiva e Ashera kyatuuka e Mikamethathi e buvandhuba wa Shekemu. Olwo ensalosalo yaaja ku luuyi olw'omukono omusaadha olw'e buvandhuba, yaazingiramu abantu ab'e Entappua.

⁸ Ku nsalosalo y'ekiketezo eky'Abamanasse n'eky'Abaefuraimu, ghaaligho ekibuga ekyetebwa Tappua. Ng'ekiketezo ekyezungulwire ekibuga ekyo kya Bamanasse, aye ekibuga kyene nga kya Baefuraimu.

⁹ Era ensalosalo yaaja yaatuuka ku kaiga akeetebwa Kana. Ebibuga ebiri ku luuyi olw'omukono omusaadha olw'e buvandhuba olw'akaiga ako, bya Baefuraimu, waire nga biri mu kiketezo kya Bamanasse. Ensalosalo ya Manasse yaaja ng'enonereza oluuyi olw'omukono omugooda olw'e buvandhuba olw'akaiga ako, era yaatuuka ku Nhandha Eyaghagati.

¹⁰ Ekiketezo ky'Abaefuraimu nga kiri ku luuyi olw'omukono omusaadha olw'e buvandhuba w'ekiketezo ky'Abamanasse, Enhandha Eyaghagati yaaba ensalosalo ey'e bugwandhuba wa byombi. Ashera kyaba e bugwandhuba w'ekiketezo eky'Abamanasse ekyo, ate Issakari kyaba buvandhuba w'ekiketezo ekyo.

¹¹ Mu biketezo ebyezungulwire Issakari ni Ashera, Abamanasse baalimu n'ebibuga bino n'ebyalo byaku: Bethi Shani, Ibuleamu, Dora ekiri ku mbali okw'enhandha, Endori, Tanaka, Megiddo.

¹² Aye Abamanasse tibaasobola kubinga bantu be baayagaana nga baba mu bibuga ebyo kale Abakanaani baasigala nga bakaali mu bibuga omwo.

¹³ Abaisiraeli ni bwe beeyongera okuba ab'amaani tibaabinga Bakanaani boonaboona kubamalamu aye baabafuula bairu baibwe.

Abaefuraimu n'Abamanasse ab'e bugwandhuba basaba ekiketezo kyaibwe kigaziyizibwe

¹⁴ Lwali lulala baidhukulu ba Yosefu baakoba Yoshua bati: “Lwaki watugha omugabo mulala gwonka okuba obutaka bwaife? Ate nga Musengwa Katonda yatugha enkabi tuli abantu kamaala.”

¹⁵ Yoshua yaabairamu ati: “Oba nga muli kamaala era ng'ekiketezo ekya Efuraimu eky'ensozi tikibamala, muje musaaghe ebibira mu kiketezo ekirimu Abaperizzi n'Abarefa.”

¹⁶ Baamukoba bati: “Bwenebwene ekiketezo eky'ensozi kitono inho tikitumala, aye Abakanaani ababa mu biketezo eby'oku museetwe e Bethi Shani n'ebyalo byakyo ebikyezungulwire n'abo ababa mu Kiiko ky'e Yezireeli, bali n'ebigaali eby'omu lutalo ebyakolebwa mu byuma.”

¹⁷ Yoshua yairamu Abaefuraimu n'Abamanasse ab'e bugwandhuba ati: “Kituufu muli kamaala era muli ba maani timwidha kuba na mugabo mulala gwonka.

¹⁸ Ekiketezo eky'ensozi kiidha kuba kyaimwe waire nga kirimu ebibira mwidha kubisaagha, bube butaka bwaimwe okuva ye kiva okutuuka ye kikanga. Abo Abakanaani mwidha kubabingamu waire nga ba maani era nga bali n'ebigaali eby'omu lutalo ebyakolebwa mu byuma.”